AŞPA-da Azərbaycanın multikultural modelindən və gənclər siyasətindən danışılıb

Bakı:

25 °C

60 %

13 m/s

Əlaqə

AZ RU EN

Ana səhifə / Siyasət / AŞPA-da Azərbaycanın multikultural modelindən və gənclər siyasətindən danışılıb

AŞPA-da Azərbaycanın multikultural modelindən və gənclər siyasətindən danışılıb

24.06.2016 [10:06]

Avropa Şurası Parlament Assambleyasının (AŞPA) dünənki sessiyası “Mədəniyyət və demokratiya” məruzəsinin müzakirəsi ilə başlayıb.
Milli Məclisin deputatı, AŞPA-nın Miqrasiya, qaçqınlar və məcburi köçkünlər üzrə komitəsinin sədri Sahibə Qafarova müzakirələrdə iştirak edib.
Əvvəlcə S.Qafarova erməni deputata cavab verərək Azərbaycanın qədim mədəniyyətə malik olduğunu, qədim mədəni və tarixi irsinin dünyaya bəlli olduğunu söyləyib. Sonra o, müzakirə olunan məsələlərin vacibliyini vurğulayaraq ölkəmizdə multikulturalizmin təşviqi, mədəni və tarixi irsin qorunub saxlanması istiqamətində görülən işlərdən danışıb.
Milli Məclisin deputatı qlobal proseslər və maliyyə böhranının, eləcə də siyasi arenadakı qarşıdurmaların iqtisadiyyata mənfi təsirlərindən söz açıb. O bildirib ki, dini və irqi ayrı-seçkiliyin, terror aktlarının yayılması kimi problemlərə laqeyd qalmaq olmaz. Qeyd edilib ki, Avropa qlobal iqtisadiyyatının rəqabətədavamlılığı və stabilliyi, eləcə də infrastruktur, təhlükəsizlik sahələrində olduğu kimi, mədəniyyət və təhsil sahələrində insan kapitalına da eyni səviyyədə sərmayə yatırmaq və onlara prioritet vermək lazımdır. Bu gün dövlətlər məhdud resurslardan daha səmərəli istifadə etmək yox, həm də mədəniyyət və təhsilə lazımi diqqət ayırmaq və siyasi prioritet vermək üçün yollar tapmalıdır. Deputat Azərbaycan dövlətinin bu istiqamətdə gördüyü tədbirlərdən söz açaraq Qərb və Şərq mədəniyyətlərini özündə birləşdirən ölkəmizin mədəni irs baxımından zəngin olduğunu qeyd edib. O, Azərbaycan dövlətinin multikulturalizm, milli mədəniyyətin inkişafı üçün səmərəli və kompleks tədbirlər gördüyünü, mədəni irsin qorunub saxlanması istiqamətində fəaliyyəti təşviq etdiyini diqqətə çatdırıb.
Azərbaycan nümayəndə heyətinin üzvü 2014-cü ildə ölkəmizdə Millətlərarası, Multikulturalizm və Dini Məsələlər üzrə Dövlət Müşavirliyi Xidmətinin, Prezidentin Fərmanı ilə Bakı Beynəlxalq Multikulturalizm Mərkəzinin (BBMM) və Bilik Fondunun təsis edildiyini vurğulayıb. Bildirib ki, bu qurumların əsas məqsədi müxtəlif ölkələrin multikulturalist modelinin sosial, siyasi və digər aspektlərinin Azərbaycan multikultural modeli ilə uyğunluğunu, eləcə də qloballaşma şəraitində baş verən prosesləri təhlil etmək, elmi, texniki, sosial-iqtisadi və humanitar bilikləri möhkəmləndirməkdir. S.Qafarova 2016-cı ilin ölkəmizdə “Multikulturalizm ili” elan edildiyini diqqətə çatdırıb. O, təhsilin mədəniyyət və demokratiya sahələrində oynadığı böyük roldan, istedadlı gənclərə dövlət dəstəyinin vacibliyindən danışıb.
Milli Məclisin deputatı Azərbaycanda gənclər siyasəti sahəsində qanun qəbul edildiyini və xüsusi dövlət proqramının həyata keçirildiyini, bu sənədlərin gənclərin inkişafı sahəsində xüsusi tədbirləri əks etdirdiyini bildirib.
Gənclərin potensialının inkişafının təşviq və təbliği, gənclərin yaradıcılıq imkanlarının genişləndirilməsi, onların fəaliyyətinin və idarəçilik qabiliyyətinin motivasiyası məqsədilə Gənclər Fondu təsis edildiyi diqqətə çatdırılıb. Hər il yüzlərlə gəncin xaricdə təhsilinin dövlət tərəfindən maliyyələşdirildiyi bildirilib.
Azərbaycan nümayəndə heyətinin üzvü radikallaşmanın qarşısının alınması, demokratik vətəndaşın formalaşması sahəsində vətəndaş cəmiyyətinin hüquq və imkanlarının genişləndirilməsi üçün mədəniyyət və təhsilin güclü vasitələr olduğunu qeyd edib.

Paylaş:

Baxılıb: 612 dəfə