Azərbaycan-Macarıstan Hökumətlərarası Komissiyanın 6-cı iclası əməkdaşlığın daha da genişlənməsi üçün əlverişli imkanlar yaradır

Bakı:

31 °C

45 %

8 m/s

AZ RU EN

Ana səhifə / Siyasət / Azərbaycan-Macarıstan Hökumətlərarası Komissiyanın 6-cı iclası əməkdaşlığın daha da genişlənməsi üçün əlverişli imkanlar yaradır

Azərbaycan-Macarıstan Hökumətlərarası Komissiyanın 6-cı iclası əməkdaşlığın daha da genişlənməsi üçün əlverişli imkanlar yaradır

29.06.2016 [10:09]

Azərbaycanın xarici işlər naziri Elmar Məmmədyarov iyunun 28-də Macarıstanın xarici işlər və ticarət naziri Peter Siyarto ilə görüşüb.
Xarici İşlər Nazirliyinin mətbuat xidmətindən AZƏRTAC-a bildiriblər ki, görüşdə Azərbaycan və Macarıstan arasında siyasi dialoqun inkişaf səviyyəsindən məmnunluq ifadə olunub və ölkələrimizin əməkdaşlığının strateji tərəfdaşıq müstəvisində inkişaf etdiyi vurğulanıb.
Nazir Elmar Məmmədyarov Bakıda keçirilən Azərbaycan Respublikası Hökuməti və Macarıstan Respublikası Hökuməti arasında İqtisadi Əməkdaşlıq üzrə Birgə Komissiyanın 6-cı iclasının iqtisadiyyat, nəqliyyat, enerji, əczaçılıq, informasiya və kommunikasiya texnologiyaları, kənd təsərrüfatı və digər sahələrdə əməkdaşlığın inkişafı üçün əlverişli imkanlar yaratdığını söyləyib.
Peter Siyarto Azərbaycanın mötəbər beynəlxalq tədbirlərə və idman yarışlarına yüksək səviyyədə ev sahibliyi etdiyini deyərək bu xüsusda birinci Avropa Oyunlarını, Formula-1 Avropa Qran-pri yarışını və gələn il keçiriləcək İslam Həmrəylik Oyunlarını qeyd edib. O, Azərbaycan Respublikası Hökuməti və Macarıstan Respublikası Hökuməti arasında İqtisadi Əməkdaşlıq üzrə Birgə Komissiyanın həmsədri kimi Bakıda keçirilən 6-cı iclasdan məmnunluğunu ifadə edib, iclasda qarşılıqlı maraq doğuran sahələr üzrə praktiki əməkdaşlıq layihələrinin müzakirə edildiyini bildirib. Nazir Macarıstan şirkətlərinin Azərbaycandan olan tərəf müqabilləri ilə əməkdaşlıqda maraqlı olduqlarını deyib.
Elmar Məmmədyarov Azərbaycanın Avropa İttifaqı ilə strateji tərəfdaşlıq əlaqələrinin inkişafında Macarıstanın dəstəyinin təqdir edildiyini diqqətə çatdırıb.
Nazir Azərbaycanın iştirakı ilə həyata keçirilən irimiqyaslı nəqliyyat və enerji layihələri, o cümlədən Şimal-Cənub, Şərq- Qərb nəqliyyat dəhlizi və TANAP/TAP-ın icrası haqqında məlumat verib.
Ermənistan-Azərbaycan münaqişəsinin həlli üzrə aparılan danışıqlar prosesinə toxunan Elmar Məmmədyarov bütün beynəlxalq ictimaiyyətin, o cümlədən ATƏT-in Minsk qrupunun həmsədrlərinin dövlət başçıları səviyyəsində mövcud status-kvonun qəbuledilməz və qeyri-davamlı olduğunu qəbul etdiklərini bildirib.
Görüşdə Azərbaycanın və Macarıstanın beynəlxalq təşkilatlar çərçivəsində uğurlu əməkdaşlığı və bir-birini dəstəkləməsinin vacibliyi qeyd edilib. Peter Siyarto BMT-nin İqtisadi və Sosial Şurasının (ECOSOC) 2017-2019-cu illərdə üzvlüyünə seçilməsi münasibətilə Azərbaycanı təbrik edib.
Görüşdə beynəlxalq gündəlikdə duran məsələlər, Avropa İttifaqı daxilində cərəyan edən proseslər ətrafında fikir mübadiləsi aparılıb.

Paylaş:

Baxılıb: 593 dəfə