Əli Əhmədov: "Gallup" təşkilatının keçirdiyi sorğunun nəticələri Azərbaycan vətəndaşlarının Prezident İlham Əliyevə münasibətini ifadə edir

Bakı:

16 °C

67 %

11 m/s

AZ RU EN

Ana səhifə / Siyasət / Əli Əhmədov: "Gallup" təşkilatının keçirdiyi sorğunun nəticələri Azərbaycan vətəndaşlarının Prezident İlham Əliyevə münasibətini ifadə edir

Əli Əhmədov: "Gallup" təşkilatının keçirdiyi sorğunun nəticələri Azərbaycan vətəndaşlarının Prezident İlham Əliyevə münasibətini ifadə edir

19.08.2009 [02:32]

“Gallup” bütün dünyada tanınan nüfuzlu təşkilatdır. Təşkilat öz sorğularının nəticələrinə hörmətlə yanaşır və bu sorğularda ictimai rəyi dəqiqliklə ortaya çıxarmaq təcrübəsi var. Azərbaycan vətəndaşları ətraf dövlətlərdə baş verən prosesləri izləyir və bütün bunların müqayisəsi nəticəsində bu qənaətə gəlib ki, Azərbaycanda sabitlik, əmin-amanlıq, inkişaf var və insanların həyat səviyyəsi yüksəlir. Bütün bunların fonunda ölkə Prezidentinə münasibət formalaşıb”. Bu sözləri Yeni Azərbaycan Partiyası Sədrinin müavini-İcra katibi Əli Əhmədov ABŞ-ın nüfuzlu “Gallup” təşkilatının postsovet məkanında keçirdiyi sorğunun nəticələrinə münasibət bildirərkən deyib.
Əli Əhmədov qeyd edib ki, xalqın hakimiyyətə münasibəti hakimiyyətin fəaliyyətinin əsasında müəyyənləşir. Onun sözlərinə görə, Prezident İlham Əliyevin rəhbərliyi ilə Azərbaycan son illər əhəmiyyətli dərəcədə dəyişib, inkişaf edib: “Həyatımız tanınmaz dərəcədə müasirləşib. Azərbaycanın hər bir guşəsində inkişaf hiss olunmaqdadır. Bu, sadəcə, abstrakt şəkildə yeniləşmə deyil, hər bir insanın həyatının dəyişməsidir, yaxşılaşmasıdır. Bu yaxşılaşmanı insanlar ölkə Prezidentinin həyata keçirdiyi siyasətlə bilavasitə əlaqələndirir. Prezident İlham Əliyevin həyata keçirdiyi siyasətin nəticələri yalnız insanlara xidmət edir”.
YAP Sədrinin müavini qeyd edib ki, bu sorğunu şübhə altına almaq qeyri-ciddi hərəkətdir. Onun fikrincə, təşkilatın Azərbaycan iqtidarına xidmət etməsi haqqında iddialar tamamilə cəfəng fikirlərdir. “Gallup” bütün dünyada nüfuzlu təşkilat kimi tanınır və kiməsə xoş gəlmək üçün öz nüfuzunu şübhə altına almaz.
“Siyasətdə səmimilik həlledici məqamdır. Əgər hansısa siyasətçilər səmimilik amilindən uzaqlaşarsa, deməli, onlar xalqdan uzaqlaşırlar. Azərbaycan iqtidarının xalq tərəfindən dəstəklənməsini ortaya çıxaran sorğuya şübhə ilə yanaşanlar, əslində, nə dərəcədə real həyat gerçəkliklərindən uzaqda dayandıqlarını nümayiş etdirirlər. Azərbaycan vətəndaşları Prezident İlham Əliyevin həyata keçirdiyi siyasəti dəstəkləyir və bunu heç zaman gizlətməyib. Beynəlxalq təşkilat da keçirdiyi sorğu nəticəsində bu faktı ortaya çıxararaq bütün dünyaya açıqlayıb. çünki bu siyasət insanlara xidmət edir. Ona görə də bu sorğunun nəticələrinə kölgə salmaq mümkün deyil”, - deyə Əli Əhmədov vurğulayıb.

Paylaş:

Baxılıb: 1246 dəfə