Almaniyanın “Ostexperte” internet portalında Azərbaycanda dinlər və sivilizasiyalar arası dialoqa dair reportaj yerləşdirilib

Bakı:

27 °C

50 %

11 m/s

AZ RU EN

Ana səhifə / Siyasət / Almaniyanın “Ostexperte” internet portalında Azərbaycanda dinlər və sivilizasiyalar arası dialoqa dair reportaj yerləşdirilib

Almaniyanın “Ostexperte” internet portalında Azərbaycanda dinlər və sivilizasiyalar arası dialoqa dair reportaj yerləşdirilib

05.02.2019 [10:01]

Almaniyanın “Ostexperte” internet portalında “Dinlər və sivilizasiyalararası dialoqdan əməkdaşlığa doğru” mövzusunda Berlində keçilmiş beynəlxalq konfrans haqqında reportaj yerləşdirilib.
AZƏRTAC xəbər verir ki, müəllif Urs Unkauf reportajda konfransın “Bakı Beynəlxalq dinlər və sivilizasiyalararası əməkdaşlıq Mərkəzi”nin, Azərbaycanın Almaniyadakı səfirliyinin, Almaniya-Azərbaycan Forumunun və Berlin Mədəni Diplomatiya Akademiyasının birgə təşkilatçılığı ilə keçirildiyini qeyd edib. Tədbirdə Azərbaycandan və Almaniyadan yüksək səviyyəli ictimai və siyasi xadimlərin, o cümlədən Qafqaz Müsəlmanları İdarəsinin sədri, “Bakı Beynəlxalq dinlər və sivilizasiyalararası əməkdaşlıq Mərkəzi”nin baş katibi şeyxülislam Allahşükür Paşazadənin, Almaniya Bundestaqının üzvü, dini azadlıqlar üzrə federal hökumətin xüsusi müvəkkili Markus Qrübelin və səfir Ramin Həsənovun iştirak etdikləri bildirilib. Tunisin sabiq prezidenti Məhəmməd Mansof Marzukinin, dünyanın bir çox ölkələrindən gəlmiş müxtəlif dinlərin nümayəndələrinin, Bundestaqın, Almaniyada akkreditə olunmuş diplomatik korpusun və vətəndaş cəmiyyəti institutları təmsilçilərinin də konfransa qatıldıqları qeyd olunub.
Reportajda bildirilib ki, Azərbaycanın Almaniyadakı səfiri Ramin Həsənov mədəniyyətlər və sivilizasiyalar arasındakı dialoqun XXI əsrdəki qlobal dünyada sülh və əmin-amanlıq şəraitində birgəyaşayışı şərtləndirən amil olduğunu və multikulturalizmin Azərbaycan modelinin bir çox ölkələrin aparıcı universitet və tədqiqat institutları tərəfindən araşdırıldığını deyib. Səfir əhalisinin böyük əksəriyyətini müsəlmanlar təşkil edən Azərbaycanda katolik kilsələrinin və sinaqoqların bərpa olunmasına dövlət tərəfindən vəsait ayrıldığını diqqətə çatdırıb. XIX əsrin birinci yarısında Azərbaycana köç etmiş almanların, eləcə də Cənubi Qafqaz regionunda məskunlaşmış yəhudilərin bu ərazilərdə uzun müddət yaşamasının bugünkü tolerant və multikultural Azərbaycanın inkişafına töhfə verən mühüm amillərdən olduğu vurğulanıb.
Reportajda Almaniya Bundestaqının üzvü, dini azadlıqlar üzrə federal hökumətin xüsusi müvəkkili Markus Qrübelin çıxışında ilk dünyəvi müsəlman ölkəsi olan Azərbaycanın bu istiqamətdə xüsusi rolundan bəhs etdiyi, Xalq Cümhuriyyətinin qadınlara səsvermə hüququ verən ilk müsəlman ölkəsi olduğunu bildirməsi xüsusi vurğulanıb. M.Qrübelin Azərbaycanda yaşayan yəhudilərin heç vaxt ayrı-seçkiliyə məruz qalmadıqlarını, sıxışdırılmadıqlarını bildirdiyi nəzərə çatdırılıb.
Bildirilib ki, konfransda əsasən dinlər və sivilizasiyalararası dialoq və əməkdaşlıq, beynəlxalq dialoq və həmrəyliyə təhdid yaradan terrorizm, separatizm və ksenofobiya kimi amillər, irqi və dini dözümsüzlük, işğalçılıq, etnik təmizləmə siyasətinə məruz qalmış insanların, miqrantların, qaçqın və məcburi köçkünlərin problemləri, gənclərin maarifləndirilməsində, tarixi, mədəni və mənəvi irsin qorunmasında sivilizasiyalar və dinlərarası əməkdaşlığın rolu, dövlət, elm və din xadimlərinin dinlər və sivilizasiyalararası dialoqun və əməkdaşlığın təşviqində səylərinin birləşdirilməsinin əhəmiyyəti kimi məsələlər müzakirə edilib. Konfransın Berlin Bəyannaməsinin qəbul edilməsi ilə başa çatdığı vurğulanıb.

Paylaş:

Baxılıb: 672 dəfə