Cavid Osmanov: İnanırıq ki, tezliklə bütün torpaqlarımızdan işğalçılar qovulacaq və həmin torpaqlarda üçrəngli bayrağımız əzəmətlə dalğalanacaq

Bakı:

28 °C

58 %

17 m/s

AZ RU EN

Ana səhifə / Siyasət / Cavid Osmanov: İnanırıq ki, tezliklə bütün torpaqlarımızdan işğalçılar qovulacaq və həmin torpaqlarda üçrəngli bayrağımız əzəmətlə dalğalanacaq

Cavid Osmanov: İnanırıq ki, tezliklə bütün torpaqlarımızdan işğalçılar qovulacaq və həmin torpaqlarda üçrəngli bayrağımız əzəmətlə dalğalanacaq

31.10.2020 [08:20]

“Rəşadətli Azərbaycan Ordusu sentyabrın 27-dən etibarən təcavüzkar Ermənistanın hərbi təxribatlarına cavab olaraq əks-hücum əməliyyatları ilə işğal altında olan ərazilərimizin azad edilməsi istiqamətində yeni-yeni qələbələr qazanır. Ölkə Prezidenti, Ali Baş Komandan İlham Əliyevin rəhbərliyi ilə ordumuz demək olar ki, hər gün irəliləyir, uğurlar əldə edir. Ordumuzun gücü qarşısında düşmənin hərbi birləşmələri döyüş mövqelərindən qaçır”. Bu fikirləri Yeni Azərbaycan Partiyası (YAP) Ağdaş rayon təşkilatının sədri, Milli Məclisin deputatı Cavid Osmanov deyib.

Cavid Osmanov bildirib ki, döyüşlərin başladığı bir ay ərzində şanlı ordumuz böyük qələbələr qazanıb.

Millət vəkilinin sözlərinə görə, Azərbaycan Prezidenti, Ali Baş Komandan cənab İlham Əliyev həm xalqa müraciətlərində, həm də xarici kütləvi informasiya vasitələrinə müsahibələrində münaqişənin həlli ilə bağlı qətiyyətli mövqeyini dəfələrlə bəyan edib: “Bu mövqe ondan ibarətdir ki, Ermənistan işğal etdiyi Azərbaycan torpaqlarından çıxmalıdır. Bundan sonra məsələ siyasi müstəvidə həll oluna bilər. Amma biz hələ ki, erməni tərəfindən hər hansı konstruktiv mövqe görmürük. Əksinə, Ermənistanın baş naziri indiyədək mövcud olan münaqişənin həlli ilə bağlı baza prinsiplərini inkar edir. Bilirsiniz ki, oktyabrın 10-da Moskvada Rusiyanın vasitəçiliyi ilə tərəflər arasında humanitar atəşkəslə bağlı razılaşma əldə olundu. Amma erməni tərəfi dərhal bu razılaşmanı pozdu. Onlar ikinci dəfə də, yəni oktyabrın 18-də atəşkəslə bağlı razılaşmaya əməl etmədilər, döyüş mövqelərimizi və yaşayış məntəqələrini intensiv atəşə tutdular. Oktyabrın 26-da da elan edilmiş atəşkəs Ermənistan tərəfindən cəmi bir neçə dəqiqə sonra pozuldu. Bütün bunlar o deməkdir ki, işğalçı Ermənistan bu razılaşmalardan sui-istifadə edib itirdiyi mövqeləri geri qaytarmağa çalışır. Bu faktlar erməni xislətinin göstəricisidir. Paşinyan hakimiyyəti indi də atəşkəs razılaşmasından öz məqsədləri üçün istifadə etməyə cəhdlər göstərir. Amma unutmamalıdırlar ki, Azərbaycan 1990-cı illərin əvvəlindəki Azərbaycan deyil”.

“Şübhəsiz ki, indiki şəraitdə ölkəmizdə güclü milli həmrəylik və vətəndaş birliyi mövcuddur. Xalqımızda yüksək vətənpərvərlik ruhu var, hər bir vətəndaş qələbəyə köklənib. Cənab Prezidentin xalqa müraciətində verdiyi növbəti qələbə xəbərləri hər kəsi daha da ruhlandırır. Bütün vətəndaşlarımız yüksək vətənpərvərlik mövqeyi nümayiş etdirirlər. İnanırıq ki, tezliklə bütün torpaqlarımızdan işğalçılar qovulacaq və həmin torpaqlarda üçrəngli bayrağımız əzəmətlə dalğalanacaq!”, - deyə C.Osmanov söyləyib.

Nardar BAYRAMLI

Paylaş:

Baxılıb: 425 dəfə