Türkiyə və Rusiya sülhməramlılarının birgə nəzarəti atəşkəsin, sabitliyin qorunmasında önəmli rol oynayacaq

Bakı:

21 °C

56 %

2 m/s

AZ RU EN

Ana səhifə / Siyasət / Türkiyə və Rusiya sülhməramlılarının birgə nəzarəti atəşkəsin, sabitliyin qorunmasında önəmli rol oynayacaq

Türkiyə və Rusiya sülhməramlılarının birgə nəzarəti atəşkəsin, sabitliyin qorunmasında önəmli rol oynayacaq

13.11.2020 [09:11]

Ekspertlərin fikrincə, Dağlıq Qarabağda atəşkəsə nəzarət üzrə ortaq mərkəzin yaradılması barədə Türkiyə və Rusiya arasında memorandum imzalanması mühüm əhəmiyyətə malikdir
Məlum olduğu kimi, Azərbaycan Respublikasının Prezidenti, Ermənistan Respublikasının baş naziri və Rusiya Federasiyasının Prezidentinin Bəyanatında münaqişə tərəflərinin razılaşmalara əməl etməsinə nəzarətin səmərəliliyinin artırılması məqsədilə atəşkəsə nəzarət üzrə sülhməramlı mərkəz yaradılması ilə bağlı müddəa yer alıb. Noyabrın 11-də isə Türkiyə və Rusiya arasında Dağlıq Qarabağda atəşkəsə nəzarət üzrə ortaq mərkəzin yaradılmasına dair memorandum imzalanıb. Bu memorandumu videokonfrans formatında Türkiyə Respublikasının Milli Müdafiə naziri Hulusi Akar və Rusiya Federasiyasının Müdafiə naziri Sergey Şoyqu imzalayıblar. Xatırladaq ki, sözügedən memorandumda mərkəzin vəzifə və prinsipləri müəyyənləşdirilib.
Onu da qeyd edək ki, birgə mərkəz Azərbaycan ərazisində, atəşkəs rejiminə əməl olunması barədə məlumat toplayacaq, ümumiləşdirəcək və yoxlayacaq. Mərkəz müqavilələrin pozulması ilə bağlı hər hansı şikayət, sual və ya narahatlığın araşdırılması ilə məşğul olacaq.
Məsələyə münasibət bildirən millət vəkili Anar Məmmədov deyib ki, ümumiyyətlə, Azərbaycan Prezidenti, Ermənistan baş naziri və Rusiya Prezidentinin Bəyanatı bütün maddələri üzrə Azərbaycanın milli maraqlarını ehtiva və təmin edir: “Bəyanatın imzalanması ilə münaqişənin nizamlanması hərbi fazadan siyasi müstəviyə daşındı. Sözsüz ki, bununla Azərbaycan işğalçı Ermənistan üzərində tam siyasi-diplomatik və hərbi qələbəsini təmin etmiş oldu. Razılaşmalara əməl edilməsinə nəzarətin səmərəliliyinin artırılması məqsədilə atəşkəsə nəzarət üzrə sülhməramlı mərkəz yaradıldı. Bu mərkəzdə Rusiya və Türkiyə hərbçiləri fəaliyyət göstərəcək. Türkiyə bu münaqişənin gələcək həlli və atəşkəsə nəzarət etmək işində rol oynayacaq. Hər iki ölkə bizim üçün dost, qonşu ölkədir”.
Milli Məclisin deputatı Ramin Məmmədov isə deyib ki, Rusiya və Türkiyə Müdafiə nazirlərinin imzaladıqları memorandum mühüm əhəmiyyətə malikdir: “Birgə monitorinq mərkəzinin yaradılması qərarı tərəflərin hərbi əməliyyatların dayandırılması rejiminə uyğunluğuna etibarlı nəzarət etməyə imkan verəcək. Ona görə də mərkəzin yaradılması barədə türkiyəli və rusiyalı nazirlər arasında imzalanan memorandumu Dağlıq Qarabağ bölgəsində atəşkəsin və sabitliyin qorunmasında önəmli bir addım hesab etmək olar. Bu istiqamətdə həyata keçiriləcək fəaliyyətin Azərbaycanın maraqları baxımından səmərəli və faydalı olacağına şübhə yoxdur”.
Qaşqay RAMAZANOV

Paylaş:

Baxılıb: 551 dəfə