Ermənistanın son şansı...

Bakı:

25 °C

78 %

10 m/s

Əlaqə

AZ RU EN

Ana səhifə / Siyasət / Ermənistanın son şansı...

Ermənistanın son şansı...

04.05.2021 [09:11]

Yaxud məğlub ölkə üçün yeganə çıxış yolu təxribatçı hərəkətlərdən çəkinmək və əməkdaşlıq imkanlarından faydalanmaqdır
44 günlük müharibənin Azərbaycanın parlaq qələbəsi ilə nəticələnməsi, torpaqlarımızın işğaldan azad edilməsi təkcə ölkəmizin ərazi bütövlüyünün və tarixi ədalətin bərpası deyil. Bu, eyni zamanda, həm respublikamız, həm də region üçün yeni siyasi-iqtisadi reallıqlar formalaşdıran, mühüm strateji perspektivlər təmin edən əhəmiyyətli geosiyasi amildir.
Təbii ki, yeni geostrateji reallıqlar Azərbaycanın üstün mövqeyini təsbit edir. Ona görə də Ermənistan məhz bu faktları nəzərə alaraq reallıqdan çıxış etməlidir. Daha dəqiq desək, məğlub ölkə üçün yeganə çıxış yolu əməkdaşlıq imkanlarından istifadə və perspektiv layihələrdə təmsil olunmaqdır.
Ümumiyyətlə, bu gün Ermənistanda istər hakimiyyətdə təmsil olunan bəzi siyasi dairələrin, istərsə də özünü müxalifət adlandıran fiqurların revanş haqqında fikirlər səsləndirmələri manipulyasiya cəhdindən başqa bir şey deyil. Çünki özləri də yaxşı bilirlər ki, Azərbaycanın qarşısında əzici məğlubiyyətə uğrayan Ermənistanın revanş üçün hər hansı potensialı və gücü yoxdur. Zatən sosial-iqtisadi tənəzzülə uğrayan Ermənistan çox ciddi demoqrafik və iqtisadi itkilərə məruz qaldı.
Beləliklə, bu gün məğlub ölkənin həm iqtisadi gücü, həm demoqrafik potensialı yeni bir savaşa başlamaq imkanını istisna edir. Digər tərəfdən, Ermənistan regional və beynəlxalq proseslərə təsir etmək, yeni geostrateji reallıqları dəyişdirmək iqtidarında olan dövlət deyil. Sirr deyil ki, bu ölkə 30 ilə yaxın davam edən işğalçılıq siyasəti səbəbindən regionda təcrid vəziyyətinə düşüb, bütün layihələrdən kənarda qalıb, hər hansı bir geosiyasi və geoiqtisadi üstünlüyə malik deyil. Həmçinin Ermənistan beynəlxalq münasibətlər sistemində müstəqil aktor kimi təmsil olunmur. O, forpost adlandırılır və bəzi güc mərkəzlərinin diktəsi ilə hərəkət edən zəif geosiyasi fiqurdur. Ona görə də Ermənistandakı bəzi siyasi dairələrin revanş haqqında absurd iddialarla çıxış etməsi reallıqlara uyğun deyil, cəfəngiyyatdır və sadəcə olaraq həm daxili, həm də beynəlxalq müstəvidə ictimai rəyi yanıltmağa hesablanmış uğursuz addımlardır.
Bütövlükdə qeyd etdiyimiz kimi, Ermənistan tarixi reallıqlardan və siyasi gerçəkliklərdən dərs almalı, müvafiq nəticələr çıxarmalıdır. Daha dəqiq desək, məğlub ölkə təxribatçı hərəkətlərdən çəkinməklə üçtərəfli Bəyanatın icrası istiqamətində öz üzərinə düşən öhdəlikləri tam və qeyd-şərtsiz yerinə yetirməlidir.
Nurlan QƏLƏNDƏRLİ

Paylaş:

Baxılıb: 753 dəfə