Oqtay Gülalıyevin ölüm xəbərini kim yayıb?

Bakı:

25 °C

64 %

4 m/s

Əlaqə

AZ RU EN

Ana səhifə / Siyasət / Oqtay Gülalıyevin ölüm xəbərini kim yayıb?

Oqtay Gülalıyevin ölüm xəbərini kim yayıb?

03.12.2021 [10:57]

Və ya həssas məqamlarda ictimai narazılıq və xaos yaratmaq kimin planıdır?

Nurlan

Biz müxtəlif ölkələrin timsalında həssas məsələlərdən istifadə edilərək süni gündəm formalaşdırmaq, gərginlik yaratmaq və sabitliyi pozmaq cəhdlərinin şahidi olmuşuq. Bu ssenarilər adətən toplumda, daha dəqiq desək, ictimai-siyasi palitrada özünə yer tapa bilməyən, sosial dəstəkdən - ictimai etimaddan məhrum olmuş, ona görə də radikallaşmış “qüvvə”lər tərəfindən həyata keçirilir. Bu mənada, Azərbaycan da istisna deyil.

“Siyasi pusqu”da duranlar kimlərdir?

Ölkədə istər real, istərsə də virtual müstəvidə, sözün əsl mənasında, “siyasi pusqu”da duranlar var: onlar xarakter etibarilə ziddiyyətdən qidalanan xaossevərlərdir. Hansısa hadisə və məsələ fonunda dərhal aktivləşərək dezinformasiya yaymağa, həmçinin qanunsuz hərəkətlərlə ictimai asayişi pozmağa cəhd göstərirlər. Mövzu seçimləri isə, belə demək mümkündürsə, cəmiyyəti zəif - incə yerindən vurmaq hədəfinə xidmət edir. Məsələn, sifarişlə hərəkət etdiyi şübhə doğurmayan bir qrup “qanunpərəst vətənpərvər”in Dövlət Sərhəd Xidmətinin hərbi helikopterinin qəzaya düşməsi nəticəsində həlak olanların dəfn mərasimi günündə qanunsuz aksiya keçirmələri məqsədyönlü təxribatdır. Üstəlik, onların aksiya zamanı siyasi məzmunlu müxtəlif şüarlar səsləndirmələri, qanunazidd çağırışlar etmələri niyyətin nə olduğunu aşkar edir: əlavə şərhə ehtiyac yoxdur. Əli Kərimli, Sevinc Osmanqızı, Qənimət Zahid, Gültəkin Hacıbəyli kimi “virtual siyasət qəhrəmanları”nın bu məsələni dövlətə və hakimiyyətə qarşı qara piar kampaniyasına çevirmək cəhdi isə bu “siyasi aksiya”nın kampaniya xarakteri daşıdığını, həmçinin onların “siyasət” anlayışının “dövlətə, hakimiyyətə qarşı” prinsipindən ibarət olduğunu göstərir.

Yeri gəlmişkən, Əli Kərimli dərhal fürsətbazlıq edərək Tofiq Yaqublunun sosial şəbəkədə yayılmış fotosundan iqtidara qarşı istifadə etməyə cəhd göstərib. O, ittihamları hakimiyyətə qarşı yönləndirməyə çalışsa da, məqsədinə nail ola bilməyib. Məsələn, bir çox sosial şəbəkə istifadəçiləri rəylərində eyni məntiqdən çıxış edərək bu hadisənin elə Əli Kərimlinin özü tərəfindən törədildiyini söyləyirlər. Bildirilir ki, o, siyasi xal qazanmaq və məsələdən faydalanmaq üçün belə üsula əl atıb...

Növbəti dezinformasiya...

İkinci məqama diqqət yetirək: bir müddətdir ki, müalicə olunan Oqtay Gülalıyevin ölüm xəbəri barədə elə həmin gün sosial şəbəkələrdə xəbər yayıldı. Bu da təsadüfi deyildi. Daha dəqiq desək, vaxt, tarix və məqam təsadüfən seçilməmişdi. Fərdi və ictimai hissləri alovlandırmaq istəyənlər qanunsuz aksiyadan sonra ikinci həmlə etmək üçün səfərbər oldular, belə bir dezinformasiya tirajladılar. Bəli, dezinformasiya, çünki həmin məlumatın yalan - saxta olması O.Gülalıyevin ailə üzvünün təkzibi nəticəsində məlum oldu. Bir sözlə, “yalan ayaq tutdu, amma yerimədi”.

Süni gündəm yaratmaq cəhdi baş tutmadı

Xaossevərlərin əllərindəki üçüncü və sonuncu kart isə sosial şəbəkənin imkanlarından istifadə edərək əks-təbliğat aparmaq idi. Ona görə də qanunsuz aksiyadan müxtəlif fotolar paylaşaraq, onlara siyasi rəng - məzmun verərək və paralel olaraq cəmiyyət üçün həssas mövzuları müzakirəyə çıxararaq virtual səhnədə “narazı vətəndaş kütləsi” görüntüsü yaratmağa çalışırlar. Məqsəd, gündəmi zəbt etmək və ya süni gündəm yaratmaqla ictimai-siyasi xaos ssenarisini bacardıqları qədər reallaşdırmaqdır. Amma unudurlar ki, siyasət “çirkin oyun” deyil, mənəviyyat işidir, əxlaq tələb edir. Ona görə də əxlaq çatışmazlığından əziyyət çəkənlər siyasətlə məşğul ola bilməzlər. Cəmiyyət isə “siyasi pusqu”da duranların kimliyini, niyyətini, mahiyyətini, həmçinin toplum üçün həssas məqamlardan istifadə edərək ictimai narazılıq və xaos yaratmaq planının kimə məxsus olduğunu yaxşı bilir...

Paylaş:

Baxılıb: 838 dəfə