Azərbaycan dövləti gənc nəslə daim qayğı ilə yanaşır

Bakı:

27 °C

58 %

2 m/s

Əlaqə

AZ RU EN

Ana səhifə / Siyasət / Azərbaycan dövləti gənc nəslə daim qayğı ilə yanaşır

Azərbaycan dövləti gənc nəslə daim qayğı ilə yanaşır

18.03.2011 [09:11]

YAP-ın nümayəndə heyəti Mərdəkan qəsəbəsində yerləşən 2 saylı Yetim və Valideyn Himayəsindən Məhrum Olmuş Uşaqlar üçün İnternat Məktəbini ziyarət edib
Dünən Yeni Azərbaycan Partiyasının (YAP) nümayəndə heyəti qarşıdan gələn Novruz bayramı ilə əlaqədar Mərdəkan qəsəbəsində yerləşən 2 saylı Yetim və Valideyn Himayəsindən Məhrum Olmuş Uşaqlar üçün İnternat Məktəbini ziyarət edib.
Məktəbin şagirdlərini Novruz bayramı münasibətilə təbrik edən YAP Sədrinin müavini-İcra katibi, millət vəkili Əli Əhmədov Azərbaycan dövlətinin hər zaman uşaqlara, gənc nəslə diqqət və qayğı göstərdiyini bildirib. YAP Sədrinin müavini qeyd edib ki, əsası ümummilli liderimiz Heydər Əliyev tərəfindən qoyulan bu siyasəti hazırda Prezident İlham Əliyev uğurla davam etdirir. “Bu siyasətin məqsədi odur ki, uşaqlar sağlam, qayğısız böyüsünlər, yüksək təhsil alaraq dövlətimizə layiqli vətəndaşlar kimi yetişsinlər. Son illər ölkəmizin bütün bölgələrində yeni məktəblər tikilib istifadəyə verilir. Həmin təhsil müəssisələri müasir tələblərə cavab verir, bütün lazımi maddi-texniki avadanlıqlarla təchiz olunurlar. Təbii ki, belə bir şəraitdə şagirdlər yaxşı təhsil alırlar, müəllimlər onların təlim-tərbiyəsi ilə ciddi məşğul olurlar. Azərbaycan hökuməti indiyə qədər olduğu kimi bundan sonra da, bu istiqamətdə tədbirlərini davam etdirəcək”, - deyən Əli Əhmədov YAP-ın da mütəmadi olaraq bu təbəqəyə aid insanlarla bağlı tədbirlər həyata keçirdiyini xatırladıb. Onun sözlərinə görə, ölkəmizdə həyata keçirilən siyasətin məqsədi, Azərbaycanı daha qüdrətli və zəngin dövlətə çevirməkdir. “Təbii ki, gələcək Azərbaycanın sahibləri yetişən nəsildir. Bütün bu işlər sizlərin daha yaxşı və firəvan yaşaması üçün edilir. Bu istiqamətdə hökumətimiz səylərini heç zaman əsirgəməyib və bundan sonra da əsirgəməyəcək”, - deyə Əli Əhmədov vurğulayıb.
İnternat məktəbinin direktoru Kamran Hacıyev isə bildirib ki, məktəbdə 238 şagird təhsil alır: “Burada təhsil 9 illikdir, şagirdlər 9-cu sinfi başa vurduqdan sonra təhsillərini davam etdirmək üçün 8 və 18 saylı liseylərə göndərilirlər”.
Məktəbin Heydər Əliyev Fondunun himayəsində olduğunu deyən direktor təhsil müəssisəsində yüksək şəraitin yaradıldığını qeyd edib. O göstərilən bu diqqətə görə, Yeni Azərbaycan Partiyasının rəhbərliyinə təşəkkür edib.
Milli Məclisin Sosial siyasət komitəsinin sədri Hadi Rəcəbli isə deyib ki, dövlətimiz hər zaman əhalinin sosial müdafiəsinin gücləndirilməsi istiqamətində addımlar atır. Onun sözlərinə görə, bu sırada kimsəsiz və valideyn himayəsindən məhrum olmuş uşaqlar da daim diqqət mərkəzindədir. Komitə sədri bu təbəqənin hüquqlarının müvafiq qanunlarla təmin edildiyini də bildirib.
Daha sonra məktəbin şagirdlərinə bayram sovqatı təqdim olunub. YAP nümayəndə heyəti eyni zamanda, şagirdlərin təhsilləri ilə maraqlanıb, internat məktəbinin şəraiti ilə yaxından tanış olublar. Məktəbin kollektivinin üzvləri, şagirdlər də öz növbəsində göstərilən qayğıya görə minnətdarlıq ediblər.
Qeyd edək ki, tədbirdə, həmçinin, YAP İcra katibinin müavini, millət vəkili Siyavuş Novruzov, YAP İdarə heyətinin üzvü Kərim Kərimov, parlamentin Aqrar siyasət komitəsinin sədri Eldar İbrahimov, millət vəkili Rauf Əliyev və YAP Xəzər rayon təşkilatının sədri Namiq Əhmədov iştirak ediblər.
Nardar BAYRAMLI

Paylaş:

Baxılıb: 1019 dəfə