Mövqeyimiz aydın, yanaşmamız bəllidir...

Bakı:

30 °C

51 %

7 m/s

Əlaqə

AZ RU EN

Ana səhifə / Siyasət / Mövqeyimiz aydın, yanaşmamız bəllidir...

Mövqeyimiz aydın, yanaşmamız bəllidir...

20.02.2024 [10:20]

Almaniyanın təşəbbüsü ilə keçirilən görüş də onu göstərir ki, Ermənistanla müzakirələr üçün hər hansı vasitəçiyə ehtiyac yoxdur

2020-ci il Vətən müharibəsində əldə olunan qələbə ərazi bütövlüyümüzü təmin etmişdisə, ötən ilin sentyabrında baş tutan antiterror tədbirləri suverenliyimizin bərpasına yol açdı. Bu ilin 7 fevralında keçirilən prezident seçkiləri isə Azərbaycanın müstəqillik ərzində bütün ərazilərində keçirilən səsvermə kimi tarixə çevrildi. Prezident İlham Əliyevin Xankəndidə yerləşən seçki məntəqəsində səs verməsi bütün dünyaya bir mesaj oldu - Prezidentin bildirdiyi kimi “Orada verdiyim səs, o qutuya atdığım bülleten, sadəcə olaraq, bülleten deyildi. Bu, erməni separatçılarının tabutuna vurulan son mismar idi”.

Azərbaycanın mövqeyi aydın və şəffafdır. Artıq “Qarabağ problemi” adlı bir məsələ yoxdur. Qarşıdakı mərhələ ilə bağlı isə bizim yanaşmamız bəllidir. Prezident İlham Əliyev fevralın 14-də andiçmə mərasimindəki çıxışında bildirib: “Mən bunu demişəm, bu yüksək kürsüdən bir daha demək istəyirəm. Biz öz məsələmizi həll etmişik. Ermənistanla sülh müqaviləsinin imzalanmasının da təşəbbüskarı biz olmuşuq. Beş məlum prinsipin də müəllifi biz olmuşuq. Sülh müqaviləsinin mətnini də biz yazmışıq, Ermənistan tərəfinə göndərmişik. İndi Ermənistan beynəlxalq hüququn normalarına riayət etmək istəyirsə, bu müqavilə imzalanacaq. İstəmirsə, yenə də bizə qarşı əsassız iddialar irəli sürüləcəksə, bu müqavilə imzalanmayacaq, ancaq Azərbaycan üçün heç nə dəyişməyəcək. Mən artıq dedim, bizim qarşımızda duran çağırışlara, bizə qarşı aparılan çirkin siyasətə biz onsuz da hazır olmalıyıq. Ona görə hesab edirəm ki, Azərbaycan-Ermənistan münasibətlərinin normallaşması prosesi beynəlxalq gündəlikdən düşməlidir. Çünki yerindən duran bu məsələ ilə məşğul olmaq istəyir, gedin, öz işinizlə məşğul olun”.

Bəli, Azərbaycan dəfələrlə bəyan edib ki, Ermənistanla hər hansı bir müzakirədə kimlərinsə iştirakına ehtiyac yoxdur. Biz ikilikdə də danışıb bütün suallara aydınlıq gətirə bilərik.

Bəlli olduğu kimi, Münxen Təhlükəsizlik Konfransı çərçivəsində Almaniyada səfərdə olan Prezident İlham Əliyev ilə görüşmək üçün çoxsaylı təşəbbüslər, müraciətlər edilir. Müraciət edənlər arasında dövlət başçıları, ölkələrin rəsmi şəxsləri, tanınmış korporasiyaların və şirkətlərin rəhbərləri yer alır. Fevralın 17-də Almaniya Federativ Respublikasının Kansleri Olaf Şolts da Prezident İlham Əliyev ilə görüşmək üçün təşəbbüs göstərib və Azərbaycan Respublikasının Prezidenti İlham Əliyevin Kansler Olaf Şolts ilə görüşü olub.

AZƏRTAC-ın bununla bağlı yaydığı informasiyada bildirilir ki, görüşdə ikitərəfli əlaqələrlə bağlı fikir mübadiləsi aparılıb. Almaniya tərəfi Ermənistanla Azərbaycan arasında sülh gündəliyinə öz dəstəyini göstərməyə və xoşməramlı əsasda Almaniyada bu istiqamətdə müvafiq görüşlərin keçirilməsinə dəstək verməyə hazır olduğunu bildirib. Olaf Şolts qeyd edib ki, COP29 əsnasında Ermənistanla Azərbaycan arasında əldə olunan kompromislər, COP29-un Azərbaycanda keçirilməsi sülh gündəliyinin də irəli aparılması üçün əlverişli imkanlar və şərait yaradır. Sonra Almaniya Kanslerinin təşəbbüsü ilə Azərbaycan Respublikasının Prezidenti İlham Əliyevin Kansler Olaf Şolts və Ermənistan Respublikasının Baş naziri Nikol Paşinyan ilə birgə görüşü olub. Azərbaycan Respublikasının Prezidenti İlham Əliyevin Ermənistan Respublikasının Baş naziri Nikol Paşinyan ilə ikitərəfli görüşü olub.

Burada bir məqam xüsusilə diqqət çəkir - Almaniya Kansleri Şoltsun təşəbbüsü ilə keçirilən Azərbaycan-Ermənistan müzqkirələri qətiyyən 3 tərəfli görüş deyil. Vurğulandığı kimi, Azərbaycanın Ermənistan ilə müzakirələrə münasibəti aydın və tematikdir. Yəni, biz müzakirənin ikitərəfli əsasda keçirilməsini dəstəkləyirik. Münxendə keçirilən görüş də məhz 2 tərəfli görüşdür. Sadəcə olaraq, Almaniya tərəfi müraciət əsasında təşəbbüskar kimi çıxış edib.

Bəli, Azərbaycan bütün məsələlərdə olduğu kimi, bu məsələdə də konkret mövqeyini ortaya qoyur. Dövlətimizin yanaşması isə müzakirələrin nəticə verəcək axara düşməsinə ən real zəmindir...

SADİQ

Paylaş:

Baxılıb: 771 dəfə