İstilik təchizatı ilə bağlı hazırlıqlar...

Bakı:

25 °C

54 %

3 m/s

Əlaqə

AZ RU EN

Ana səhifə / Sosial / İstilik təchizatı ilə bağlı hazırlıqlar...

İstilik təchizatı ilə bağlı hazırlıqlar...

23.10.2024 [07:28]

Qazanxanalar noyabrın 15-dən tez işə salına bilər?

Artıq bir neçə gündür ki, havalar soyuyub. Xüsusilə yağışlı və küləkli günlər davam etməkdədir. Belə olan halda mənzillərdə istiliyə olan tələbat da artmağa başlayıb. Bakıda istilik təchizatı ilə bağlı hazırlıqlar necə gedir? Ümumiyyətlə bu il üçün hansı yeniliklər nəzərdə tutulur və istilik sistemlərinin tez verilməsi mümkündürmü?

Mövzu ilə bağlı “Azəristiliktəchizat” ASC-nin Mətbuat katibi Elvin Basqallı “Yeni Azərbaycan”a açıqlamasında bildirib ki, “Azəristiliktəchizat” ASC-nin balansında 564 qazanxana var. O, qeyd edib ki, 3871 yaşayış binası və 184 mindən çox mənzil, 449 təhsil müəssisəsi, 152 səhiyyə müəssisəsi, 2200-dən çox təsərrüfat və sosial obyektlər “Azəristiliktəchizat” ASC tərəfindən mərkəzləşdirilmiş qaydada istiliklə təmin edilir: “Hər il payız-qış mövsünə hazırlıq, mövsüm yekunlaşdıqda isə növbəti mövsümə qədər olan dövrü əhatə edir. Bu dövr ərzində isə qazanxanalara baxış keçirilir, avadanlıqlar yoxlanılır. Magistral və məhəllədaxili xətlər hidrovlik təzyiqlə yoxlanılır. Lazımi yerlərdə əsaslı təmir işləri aparılır və yenilənmələr həyata keçirilir”.

İstilik təchizatında yeniliklər olacaq...

E.Basqallı həmçinin onu da vurğulayıb ki, bu il üçün əsas fərq və yenilik paytaxtın 4 rayonunda ümumilikdə 5 qazanxana yenidən qurulur: “Paytaxtın Səbail, Nərimanov və Nizami rayonlarında 4 qazanxana yerində isə müasir tipli qazanxanalar inşa olunmaqdadır. Eyni zamanda Səbail rayonunda bir qazanxana da zirzəmidən çıxarılaraq yeni layihə əsasında hazırlanır. Həmin qazanxanaların ətrafındakı məhəllədaxili xətlər də dəyişdirilir. İstiliklə təmin olunan binaların aşağı altpaylayıcı xətləri də dəyişdirilir. Bu da daha keyfiyyətli istilik xidmətinə imkan verəcək”.

İstilik bu halda tez verilə bilər

“Azəristiliktəchizat” sözçüsü istilik sistemlərinin noyabrın 15-dən öncə işə salınması ilə bağlı məsələyə də aydınlıq gətirib: “2023-cu il 5 sentyabr tarixində Nazirlər Kabineti (NK) istilik enerjisindən istifadə qaydalarını təsdiqləyib. Bu qaydalara əsasən, istilik sistemlərinin verilməsi hər il noyabrın 15-dən başlayır və növbəti il aprelin 15-də yekunlaşır. Lakin 14 dağlıq və dağətəyi rayonlarımızda istilik sistemlərinin verilməsi noyabrın 1-i başlayır və növbəti il mayın 1-də yekunlaşır. Əgər vaxtından əvvəl havanın temperaturu 5 gün ardıcıl şəkildə 8 dərəcədən aşağı olarsa, Ekologiya və Təbii Sərvətlər Nazirliyinin də proqnozuna görə, temperatur növbəti günlərdə də aşağı düşərsə, bu halda qazanxanaların vaxtından əvvəl işə salınmasına baxıla bilər”.

Yeganə BAYRAMOVA

Paylaş:

Baxılıb: 560 dəfə