Daşkəsən rayonunun ucqar dağ kəndi Qabaqtəpədə səyyar görüş keçirilib

Bakı:

24 °C

68 %

3 m/s

Əlaqə

AZ RU EN

Ana səhifə / Sosial / Daşkəsən rayonunun ucqar dağ kəndi Qabaqtəpədə səyyar görüş keçirilib

Daşkəsən rayonunun ucqar dağ kəndi Qabaqtəpədə səyyar görüş keçirilib

11.01.2014 [09:54]

Daşkəsən rayon İcra Hakimiyyəti başçısının mütəmadi olaraq şəhər, qəsəbə və kənd inzibati ərazi dairələri üzrə nümayəndəliklərində sakinlərlə səyyar görüşlərin keçirilməsinə başlanılıb. Səyyar görüşlər Daşkəsən rayon İcra Hakimiyyətinin başçısı Əhəd Abıyevin, RİHB aparatının məsul işçilərinin, rayonda fəaliyyət göstərən idarə, müəssisə və təşkilat, hüquq-mühafizə orqanlarının rəhbərlərinin və kənd sakinlərinin iştirakı ilə davam etdirilir. Dünən isə Qabaqtəpə kəndində belə görüşlərdən biri baş tutub.
Daşkəsən rayon İcra Hakimiyyətinin başçısı Əhəd Abıyev 4000-ə yaxın əhalisi olan Qabaqtəpə kəndində keçirdiyi səyyar görüşdə ölkəmizdə gedən böyük və sürətli inkişaf, quruculuq, abadlıq işlərindən, eləcə də Daşkəsəndə həllini gözləyən problemlərdən danışıb. Ə.Abıyev qeyd edib ki, Prezident İlham Əliyevin apardığı iqtisadi-sosial siyasət nəticəsində ölkəmizdə bütün sahələr üzrə əlverişli mühit yaradılıb: “Artıq Azərbaycan kosmos ailəsinin üzvüdür. Dünyanın ən nüfuzlu təşkilatı olan BMT-nin Təhlükəsizlik Şurasına sədrlik edib. Həm ölkə daxilində, həm də ölkəmizdən kənarda əldə olunan uğurlar beynəlxalq aləmdə razılıqla qarşılanır. Hər birinizə yaxşı məlum olan yol problemi, təbii qaz problemi bizi həmişə narahat edirdi. Amma bu gün Xoşbulaq-Qabaqtəpə-Astaf avtomobil yolunun əsaslı təmiri uğurla davam etdirilir. Azərbaycanda əlverişli sahibkarlıq mühiti yaradılmışdır”.
Ə.Abıyev deyib ki, “AKKORD” Şirkətlər qrupunun rəhbərliyi ilə danışıqlardan sonra Xoşbulaq-Qabaqtəpə-Astaf avtomobil yolunun əsaslı təmiri öz müsbət həllini tapıb.
Daha sonra Əhəd Abıyev bildirib ki, Prezident İlham Əliyev bütün regionlara olduğu kimi, Daşkəsənə və daşkəsənlilərə də böyük diqqət və qayğı göstərir: “Hamımız bu qayğını görür, dünya şöhrətli Prezidentimizə dərin minnətdarlığımızı bildiririk. Onun şəxsində biz hər zaman düzgün yol göstərən, xeyirxahlığı təbliğ edən, dinclik, gələcək nəslin xoşbəxtliyi, firavanlığı naminə, bir sözlə, Şərqə günəş kimi doğan Azərbaycanımızın şöhrətinin günbəgün artırılması naminə düşünən, fəaliyyət göstərən əvəzsiz siyasi lideri görürük.
Bu il Daşkəsəndə daha 14 məktəbin tikintisi, ucqar dağ kəndlərinə gedən yolların əsaslı təmiri və tikintisi nəzərdə tutulmuşdur. Əmin ola bilərsiniz ki, möhtərəm Prezidentimizin diqqət və qayğısı nəticəsində bu il də qeyd etdiyim böyük tikinti, quruculuq, abadlıq, yenidənqurma işləri davam etdiriləcəkdir. Daşkəsənin xoş gələcəyi vardır”.
Səyyar görüşdə çıxış edən kənd sakinləri görülən bütün işlərə görə Prezident İlham Əliyevə öz dərin minnətdarlıqlarını bildirərək qeyd ediblər ki, “bu diqqət və qayğı bizi dövlət başçısının ətrafında daha sıx birləşməyə ruhlandırır”.
Kənd sakinləri, həmçinin, onları narahat edən digər problemlərlə bağlı təkliflərini, istək və arzularını Daşkəsən rayon İcra Hakimiyyəti başçısının diqqətinə çatdırıblar. Edilmiş təklif və müraciətlər isə yerindəcə öz həllini tapıb.
Səyyar görüşdə 10 nəfər gəncə Yeni Azərbaycan Partiyasının vəsiqələri təqdim edilib.

Paylaş:

Baxılıb: 1647 dəfə