“Sovetski”də 3440 ünvanda dəqiq ölçü işləri aparılıb

Bakı:

20°C

60%

5m/s

Əlaqə

AZ RU EN

Ana səhifə / Sosial / “Sovetski”də 3440 ünvanda dəqiq ölçü işləri aparılıb

“Sovetski”də 3440 ünvanda dəqiq ölçü işləri aparılıb

09.07.2014 [10:38]

Ölkəmizdə həyata keçirilən geniş infrastruktur layihələri, respublikamızda şəhərsalma sahəsində görülən işlər Bakının inkişafına və müasirləşməsinə şərait yaradıb. Bu gün milli memarlıq ənənələrinə sadiq qalaraq müasir üslubda həyata keçirilən həmin layihələr çərçivəsində yeni parklar, xiyabanlar salınır, binalar inşa olunur.
Elə Bakının “Sovetski” adlanan ərazisində nəzərdə tutulan yenidənqurma və abadlıq işləri də məhz şəhərimizin müasir görkəminə əlavə gözəllik qatacaq.
Hazırda isə ərazidə inventarlaşdırma işləri uğurla davam etdirilir. Artıq həmin ərazidə evlərini müəyyən edilmiş şərtlərlə satmaq istəyən ailələrin sayı 1950-yə çatıb. Bu barədə qəzetimizə açıqlamasında Yasamal rayon İcra Hakimiyyəti başçısının birinci müavini, Yasamal rayon İcra Hakimiyyəti nəzdində yaradılmış Köçürmə Komissiyasının sədri Səməd İslamov bildirib. Onun sözlərinə görə, son 2 həftə ərzində müraciət edənlərin sayı əvvəlki aylarla müqayisədə xeyli artıb. Bu günə kimi 1274 mənzilin sahibi ilə razılaşma protokolu imzalanıb, artıq 1130 əmlak sahibinin bank hesabına vəsait köçürülüb.
“Köçmək üçün müraciət edənlərin sayı sürətlə artır. Komissiyanın son iclasında 78 mənzil sahibi ilə razılaşma protokolu imzalanıb. Müqayisə üçün deyim ki, Komissiyanın bundan əvvəlki iclasında 66 mənzil sahibi ilə razılaşma protokolu imzalanmışdı. Sənədlərində kiçik çatışmazlıqlarla bağlı müraciət edənlərin də sayını nəzərə alsaq, dünən Komissiya 150 nəfəri qəbul edib, gecə saat 23:00-a qədər işləyib. Çünki qarşımıza məqsəd qoymuşuq ki, müraciət edənlərin hamısını qəbul edək”.
Komissiya sədri söküntü ərazisinə düşən 3440 ünvanda daşınmaz əmlak obyektlərində dəqiq ölçü işlərinin aparıldığını, söküntü işlərinin də intensivləşdiyini bildirib. Əgər iyunun 30-da sökülən mənzil və qeyri-yaşayış sahələrinin sayı 408 idisə, bu gün onların sayı 523-ə çatıb.
Söküntü zamanı təhlükəsizlik məsələlərinə xüsusi diqqət yetirildiyini deyən Səməd İslamov onu da bildirib ki, söküləcək mənzil və qeyri-yaşayış sahələrinin ətrafında təhlükəsizliklə bağlı çəpərləmə işləri həyata keçirilir.
Bəzi qüvvələrin bu məsələdən sui-istifadə edərək süni narazılıq və ajiotaj yaratmaq istədiklərini bildirən Səməd İslamov onların səylərinin əbəs olduğunu qeyd edib: “Dövlətimizin məqsədi həmin ərazidə gözəl və müasir istirahət mərkəzləri, yol qovşaqları yaratmaqdır. Heç bir vətəndaşın evindən məcburi şəkildə çıxarılmasından söhbət gedə bilməz. Kim dövlətin onlara təqdim etdiyi bu şərtlərlə razıdırsa, gəlir, öz mənzilini satmağa razılıq verdiyini bildirir. Hər dəfə həmin ərazidə yaşayan insanlarla görüşümüz zamanı bildiririk ki, onları kimsə zorla buradan köçürməyəcək. O insanlar ki, öz razılıqları ilə rəsmi ərizə yazıb müraciət edirlər, biz onların ərizələrinə baxırıq və dəyərləndiririk. Bizə müraciət edənlərin sayı həddindən artıq çoxdur. Təbii ki, bu ərazidə yaşayan insanlar da istəyirlər ki, geniş evlərdə, gözəl təmir olunmuş mənzillərdə yaşasınlar. Düşünürəm ki, bu ərazidə salınacaq yeni parklar uşaqların, yaşlı insanların daha çox sevincinə səbəb olacaq. Yaradılacaq müasir infrastruktur, salınacaq geniş və abad yollar, yeraltı keçidlər şəhərimizin gözəlləşməsinə töhfə verəcək”.
Oktay

Paylaş:

Baxılıb: 914 dəfə