Azərbaycan Milli Elmlər Akademiyasının illik ümumi yığıncağına hazırlıq məsələləri müzakirə edilib

Bakı:

33 °C

37 %

4 m/s

AZ RU EN

Ana səhifə / Sosial / Azərbaycan Milli Elmlər Akademiyasının illik ümumi yığıncağına hazırlıq məsələləri müzakirə edilib

Azərbaycan Milli Elmlər Akademiyasının illik ümumi yığıncağına hazırlıq məsələləri müzakirə edilib

08.04.2015 [09:42]

Aprelin 7-də Azərbaycan Milli Elmlər Akademiyasının (AMEA) əsas binasında Respublika Elmi Tədqiqatların Əlaqələndirilməsi Şurası və akademiyanın elmi müəssisələrinin Direktorları Şurasının birgə iclası keçirilib.
AZƏRTAC xəbər verir ki, tədbirdə AMEA-nın prezidenti, akademik Akif Əlizadə bu il ilk dəfə AMEA-da təhsilin magistratura pilləsinə qəbul keçiriləcəyi barədə məlumat verib. Akademik bildirib ki, AMEA-da təhsilin magistratura pilləsinə qəbul yeddi ixtisas - dilçilik, antropologiya, geologiya, molekulyar biologiya, bitkilərin seleksiyası, nəzəri və riyazi fizika, kimyəvi genetika və kataliz ixtisasları üzrə aparılacaq. Magistraturaya qəbul yeni pilot layihəsi kimi həyata keçiriləcək və burada təhsil alanlar müəyyən elmi istiqamətdə hazırlanacaqlar.
Tələbə Qəbulu üzrə Dövlət Komissiyasının (TQDK) sədri Məleykə Abbaszadə ölkəmizdə təhsilin magistratura pilləsinə qəbul qaydalar barədə ətraflı məlumat verib. Bildirilib ki, Azərbaycanda magistratura pilləsinə qəbul 1998-ci ildən tətbiq olunur. 2005-ci ildə magistraturaya qəbul dövlətimizin başçısının müvafiq Fərmanına əsasən rəsmi olaraq TQDK-ya verilib. Elə həmin il ilk dəfə TQDK tərəfindən mərkəzləşmiş imtahanlar keçirilib.
TQDK-nın sədri AMEA-da magistratura səviyyəsinə 20 yerin ayrıldığını söyləyib və bunun uğurlu alınacağına əminliyini bildirib. Qeyd edilib ki, ixtisas seçimi mayın 7-dən 12-dək aparılacaq. Proqram seçimi isə artıq aprelin 10-da başa çatır.
M.Abbaszadə akademiyanın müxtəlif institut və müəssisələrində çalışan alimlərinin TQDK ilə birgə əməkdaşlığını yüksək qiymətləndirib.
Sonra akademik A.Əlizadə AMEA-nın illik ümumi yığıncağına hazırlıq işləri ilə bağlı bəzi məsələləri diqqətə çatdırıb. Bildirilib ki, aprelin 29-da keçiriləcək illik ümumi yığıncaqda AMEA-nın vitse-prezidenti vəzifəsinə və bir sıra bölmələrinin akademik-katibi vəzifəsinə seçkilər keçiriləcək. Azərbaycan Respublikasının Nizami Gəncəvi adına Qızıl medalı və AMEA-nın adlı mükafatlarının təqdimatı da tədbirin gündəliyinə daxil olan məsələlərdəndir.
Daha sonra akademik Vaqif Fərzəliyev AMEA-nın 70 illik yubileyi ilə əlaqədar çap olunacaq nəşrlər barədə məlumat verib.
İclasda, həmçinin elmi-tədqiqat proqramlarının maliyyələşdirilməsi, tədqiqat işlərinin əlaqələndirilməsi, doktorluq imtahanlarına dair yeni tələblər və digər məsələlər müzakirə edilib.

Paylaş:

Baxılıb: 966 dəfə