IDEA İctimai Birliyinin Sahibsiz Heyvanlar üçün Xilasetmə və Sığınacaq Mərkəzinin təqdimatı keçirilib

Bakı:

15°C

82%

6m/s

AZ RU EN

Ana səhifə / Sosial / IDEA İctimai Birliyinin Sahibsiz Heyvanlar üçün Xilasetmə və Sığınacaq Mərkəzinin təqdimatı keçirilib

IDEA İctimai Birliyinin Sahibsiz Heyvanlar üçün Xilasetmə və Sığınacaq Mərkəzinin təqdimatı keçirilib

09.05.2015 [12:15]

Mayın 8-də heyvanları müdafiə təşkilatları və heyvansevər vətəndaşların iştirakı ilə IDEA İctimai Birliyinin Bakı şəhərinin Qaradağ rayonunda inşa etdirdiyi Sahibsiz Heyvanlar üçün Xilasetmə və Sığınacaq Mərkəzinin təqdimatı keçirilib. Bu barədə IDEA İctimai Birliyindən AZƏRTAC-a məlumat verilib.
Mərkəzin təməlqoyma mərasimi Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın iştirakı ilə 2014-cü il oktyabrın 9-da keçirilib. Sığınacağın tikintisində aparıcı dövlətlərin təcrübəsindən istifadə edilib və layihə-tikinti işlərinə tanınmış xarici mütəxəssislər cəlb olunub. Mərkəzin bu ilin sonuna kimi istismara verilməsi nəzərdə tutulur.
Müasir texniki avadanlıqla təchiz edilmiş və beynəlxalq standartlara cavab verən sığınacaq kompleksində sahibsiz heyvanlara peyvənd, sterilizə və zəruri hallarda əməliyyat xidmətlərinin göstərilməsi, həmçinin onların daimi və müvəqqəti məskunlaşması üçün hər cür şəraitin yaradılması nəzərdə tutulub.
Sığınacaqda heyvanlar üçün mobil təcili tibbi yardım xidmətinin fəaliyyət göstərməsi və sahibsiz heyvanların humanist şəkildə Mərkəzə gətirilməsinə məsul xüsusi qrupun yaradılması planlaşdırılır.
Təqdimat zamanı qeyd edilib ki, Mərkəzdə heyvanların müayinə və müalicəsi üçün yüksək səviyyəli avadanlıqla təchiz olunmuş müasir klinika, heyvan mehmanxanası, müxtəlif təlimlərin və tədbirlərin keçirilməsi məqsədilə mərkəz, himayəyə götürülməyə hazır heyvanların nümayiş olunduğu kompleks, heyvanların daimi və müvəqqəti məskunlaşması üçün böyük sığınacaqlar yaradılacaq. Burada yerləşən itlərin gəzinti və oynama parkları ictimaiyyətə açıq olacaq və istənilən şəxs öz ev heyvanını bu parka gəzintiyə gətirə biləcək.
Təqdimat zamanı IDEA İctimai Birliyi inşa edilən sığınacaqların sahibsiz heyvanların müdafiəsi ilə məşğul olan yerli təşkilatlarla birlikdə istifadə etmək niyyətini elan edib və görüşdə iştirak edən təşkilatları birgə əməkdaşlığa dəvət edib.
IDEA-nın Sahibsiz heyvanlar üçün Xilasetmə və Sığınacaq Mərkəzi heyvanlara qayğı göstərmək istəyən könüllülər və heyvansevərlər üçün daim açıq olacaq.
IDEA İctimai Birliyinin bu təşəbbüsü təqdimatda iştirak edən heyvansevərlər tərəfindən yüksək qiymətləndirilib.

Paylaş:

Baxılıb: 804 dəfə