Bakı Beynəlxalq Multikulturalizm Mərkəzinin Himayəçilik Şurasının iclası keçirilib

Bakı:

15°C

88%

5m/s

Əlaqə

AZ RU EN

Ana səhifə / Sosial / Bakı Beynəlxalq Multikulturalizm Mərkəzinin Himayəçilik Şurasının iclası keçirilib

Bakı Beynəlxalq Multikulturalizm Mərkəzinin Himayəçilik Şurasının iclası keçirilib

19.05.2015 [09:55]

Mayın 18-də Bakı Beynəlxalq Multikulturalizm Mərkəzinin Himayəçilik Şurasının iclası keçirilib.
AZƏRTAC xəbər verir ki, iclasda Himayəçilik Şurasının üzvləri, Azərbaycandakı müxtəlif dini icmaların nümayəndələri, elmi dairələrin, ictimaiyyətin təmsilçiləri iştirak ediblər.
Azərbaycan Respublikasının millətlərarası, multikulturalizm və dini məsələlər üzrə Dövlət müşaviri, Mərkəzin Himayəçilik Şurasının sədri, akademik Kamal Abdullayev çıxış edərək ötən il mayın 15-də Azərbaycan Prezidenti İlham Əliyevin Fərmanı ilə yaradılan Multikulturalizm Mərkəzinin missiyası və həyata keçirdiyi layihələr barədə danışıb. Dövlət müşaviri qeyd edib ki, Azərbaycanda multikultural ənənələr əsrlərdən bəri xalqımızın qəlbində, beynində formalaşmış dəyərlərdir. Bu dəyərlər Azərbaycan ədəbiyyatının, mədəniyyətinin, incəsənətinin ən üzdə olan nümunələrinin içərisində bir inci kimi tarix boyu səpələnmiş şəkildədir.
Diqqətə çatdırılıb ki, Azərbaycan multikulturalizminin siyasi banisi, ölkəmizin multikultural ənənələrinin siyasi müstəviyə gətirilməsi bilavasitə Ümummilli lider Heydər Əliyevin adı ilə bağlıdır. Bu gün Prezident İlham Əliyev əsası Ulu öndər Heydər Əliyev tərəfindən qoyulan bu siyasəti uğurla davam etdirir. Bu gün Azərbaycan öz həyatını multikultural dəyərlər olmadan təsəvvür edə bilmir.
Bildirilib ki, qısa müddət ərzində Bakı Beynəlxalq Multikulturalizm Mərkəzi çox işlər görüb. Yeddi xarici ölkənin təhsil ocaqlarında və 8 yerli universitetdə tədris edilən “Azərbaycan multikulturalizmi” fənni Azərbaycan mədəniyyətini, tarixini, ədəbiyyatını və tolerantlıq ənənələrini dünyaya çatdırmaq baxımından mühüm əhəmiyyət kəsb edib. Eyni zamanda, ən ucqar yerlərdə yaşayan, təhsil alan Azərbaycan gəncləri multikultural dəyərlərə yiyələnirlər. Məqsəd həm Azərbaycan tolerantlığını, multikulturalizmini dünyada təbliğ etmək, eyni zamanda, dünyanın multikultural ənənələrini ölkəmizin gəncləri arasında təbliğ etməkdir. Bakı Beynəlxalq Multikulturalizm Mərkəzi dünyanın bir çox təşkilatlarında Azərbaycan multikulturalizmi mövzusu ilə bağlı “dəyirmi masa”lar keçirir. Mərkəzin fəaliyyəti nəticəsində Bakı Slavyan Universitetində Azərbaycan multikulturalizmi kafedrası yaranıb. Belə bir kafedranın yaradılması multikultural, tolerant dəyərlərin Azərbaycanda və onun sərhədlərindən kənarda öyrənilməsinin çox yaxşı bir nümunəsidir. Dünyanın müxtəlif universitetləri artıq Azərbaycan multikulturalizmini özündə tədris etmək üçün bizə müraciət edir və yaxın gələcəkdə universitetlərin sayını artıracağıq.
Dövlət müşaviri qurumun ölkəmizdə və xaricdə keçirdiyi elmi konfranslar, “dəyirmi masa”lar və digər silsilə tədbirlər barədə də danışıb.
Multikulturalizm Mərkəzinin müşaviri Aynur Bəşirli Mərkəzin illik fəaliyyəti ilə bağlı ətraflı məlumat verərək qurumun ölkəmizdə və xaricdə keçirdiyi elmi konfranslar, “dəyirmi masa”lar və digər tədbirlər barədə söhbət açıb.
Mərkəzin icraçı direktoru, professor Azad Məmmədov isə qurumun gələcək layihələri, perspektivləri barədə məlumat verib.
İclasda Himayəçilik Şurasının üzvləri - ISESCO-nun baş direktoru Əbdüləziz bin Osman əl-Tüveycri, UNESCO-nun sabiq baş direktoru Koişiro Matsuura, Azərbaycan Bəstəkarlar İttifaqının sədri, xalq artisti, professor Firəngiz Əlizadə, Səməd Vurğun adına Azərbaycan Dövlət Rus Dram Teatrının baş rejissoru, xalq artisti Aleksandr Şarovski, Azərbaycanın rus icmasının sədri, Milli Məclisin deputatı Mixail Zabelin çıxış edərək ölkəmizdəki multikultural mühitdən, milli və dini qruplar üçün yaradılan şəraitdən, onlara yüksək diqqət və qayğıdan söhbət açıblar. Azərbaycanın multikultural dəyərlərinin dünyaya nümunə olduğu bildirilib və tolerantlığın Azərbaycan modelindən başqa ölkələrin də istifadə etmələrinin önəmi vurğulanıb.

Paylaş:

Baxılıb: 777 dəfə