Bir neçə il sonra qəza vəziyyətində olan məktəb qalmayacaq

Bakı:

1 °C

75 %

10 m/s

Əlaqə

AZ RU EN

Ana səhifə / Sosial / Bir neçə il sonra qəza vəziyyətində olan məktəb qalmayacaq

Bir neçə il sonra qəza vəziyyətində olan məktəb qalmayacaq

02.07.2009 [14:23]

Prezident İlham Əliyevin növbəti Sərəncamı ilə qəza vəziyyətində olan təhsil müəssisələrinin təmir və bərpasına 13 milyon manat ayrılıb
ümummilli liderimiz Heydər Əliyev “Təhsil millətin gələcəyidir”, - deyirdi. Məhz bu səbəbdən də təhsilin inkişafı, ölkəmizin parlaq gələcəyinin təmin olunması üçün istedadlı kadrların yetişdirilməsi Ulu öndərin fəaliyyətində prioritet sahələrdən biri olub. Prezident İlham Əliyev də böyük siyasətçi Heydər Əliyevin əsasını qoyduğu bu siyasəti uğurla davam etdirir. Belə ki, Prezident İlham Əliyev savadlı, dünyagörüşlü kadrlara üstünlük verir və təhsili ən vacib sahələrdən biri hesab edir. İndi təhsildə, hətta beynəlxalq ekspertlərin təəccübünə səbəb olan böyük nailiyyətlər müşahidə olunmaqdadır.
Millətin gələcəyini müəyyənləşdirən təhsil sahəsinin inkişafı təhsil ocaqlarının vəziyyətindən çox asılıdır. Müasir, dünyagörüşlü kadrlar yetişdirmək üçün beynəlxalq standartlara cavab verən təhsil ocaqları olmalıdır. Odur ki, Prezident təhsil müəssisələrinin fəaliyyəti ilə tanış olmaq üçün təhsil ocaqlarına gedir, aparılan işlə yaxından maraqlanır. Elə bu diqqətin nəticəsidir ki, hər il dövlət büdcəsindən və Prezidentin Ehtiyat Fondundan təhsil müəssisələrinin inkişafına milyonlarla vəsait ayrılır. Son illər ərzində yeni tikilmiş, əsaslı təmir olunmuş və yenidən qurulmuş məktəblərin sayı 1600-ə çatıb. Hazırda yüksək maddi-texniki bazaya malik olan həmin məktəblərdə 700 mindən artıq şagird təhsil alır. Bununla yanaşı, qəza vəziyyətinə düşmüş və tədris üçün zəruri şəraiti olmayan ümumtəhsil məktəbləri də hələ qalmaqdadır. Prezident İlham Əliyevin bir neçə gün öncə imzaladığı növbəti Sərəncam isə təsdiq edir ki, belə təhsil ocaqlarının mövcudluğu müvəqqəti xarakter daşıyır.
ölkə başçısının yeni Sərəncamı ilə qəza vəziyyətində olan ümumtəhsil ocaqlarının təmir və bərpası üçün daha 13 milyon manat ayrılıb. Bununla bağlı müvafiq qurumlara göstərişlər verilib. Maliyyə Nazirliyinə nəzərdə tutulan vəsaitin maliyyələşdirilməsini müəyyən olunmuş qaydada təmin etmək, Nazirlər Kabinetinə isə bu Sərəncamdan irəli gələn məsələləri həll etmək tapşırılıb.
Bəs, ölkəmizdə neçə qəzalı məktəb var? Prezident İlham Əliyevin imzaladığı Sərəncamla neçə məktəbi yeniləşdirmək mümkün olacaq? ümumiyyətlə, ölkəmizdəki qəzalı məktəbləri hansı müddətə tamamilə bərpa etmək mümkün olacaq?
Təhsil Nazirliyinin İqtisadiyyat şöbəsinin müdir müavini Orxan Kərimovun sözlərinə görə, Azərbaycanda elə məktəblər var ki, ondan Avropada da yoxdur. Lakin elə məktəblər də var ki, orada tədris mümkün deyil: “Uzun illər Sovet hakimiyyətinin təhsilə xüsusi diqqət ayırdığını düşünmüşük. Bəlkə, elə indi də çoxları hesab edir ki, təhsil Sovet hakimiyyəti üçün önəmli olub. Ancaq bu, belə deyil. 40-50-ci illərdə müxtəlif tikililəri məktəbə uyğunlaşdırıblar. Kolxoz binalarını, anbarları, yarımçıq qalmış tikililəri, hətta barakları məktəbə çeviriblər. Onlar istifadəyə verildiyi vaxtlarda da məktəbə oxşamayıb. İndi isə hətta təhlükəlidirlər. Hər an tavan uça bilər. Belə məktəblərin hər biri yenidən tikilməlidir”.
Nazirlik rəsmisinin sözlərinə görə, ölkəmizdə 4500 məktəb fəaliyyət göstərir. 700 mindən artıq şagirdi əhatə edən 1600 məktəb nəinki tam təmir olunub, həm də ən müasir avadanlıqlarla təchiz edilib. Buna baxmayaraq, məktəb şəbəkəsində qəzalı məktəblərin sayı da çoxdur: “Prezidentin Ehtiyat Fondundan ayrılan vəsaitlə 10-11 məktəbi müasir tələblər səviyyəsinə çatdırmaq mümkün olacaq. Bu məktəblər Bakıda və əsasən də, regionlardadır”.
Bütün regionlarda qəzalı məktəblərin mövcud olduğunu söyləyən O.Kərimov hesab edir ki, məktəb şəbəkəsinin tamamilə yeniləşdirilməsi hələ bir neçə il çəkəcək: “ötən il Prezidentin Ehtiyat Fondundan bu məqsədlə 25 milyon manat ayrılmışdı. Dövlət büdcəsindən və Prezidentin Ehtiyat Fondundan ayrılan vəsaitlərdən başqa digər proqramlar çərçivəsində də təhsil müəssisələrinin tikintisinə, bərpasına və ən müasir avadanlıqlarla təchizatına dəstək verilir. Məktəblərdə idman zallarının tikilməsini, fizika və kimya laboratoriyalarının qurulmasını nəzərdə tutan ayrıca proqramlar həyata keçirilir”.
Hər kəsə məlumdur ki, ölkəmizdə təhsilin müasir tələblər səviyyəsində inkişafını təmin edən və beynəlxalq təhsil sisteminə inteqrasiyaya geniş imkanlar verən mühüm dövlət proqramları qəbul edilib. Həmin proqramların reallaşdırılması nəticəsində təhsil infrastrukturu müasirləşib, təhsil alanlar üçün bərabər imkanlar yaradılıb, keyfiyyətin yaxşılaşdırılması və davamlı inkişaf istiqamətində əsaslı tədbirlər həyata keçirilib. Təbii ki, bu istiqamətdə işi bitmiş hesab etmək hələ tezdir. Bundan sonra da mərhələlərlə iş davam etdiriləcək və zamanın tələblərinə uyğun yeni qərarlar, dövlət proqramları qəbul ediləcək.
RUHİYYƏ

Paylaş:

Baxılıb: 1500 dəfə