Akademik Zərifə Əliyeva haqqında kitabın və elektron məlumat bazasının təqdimatı olub

Bakı:

26 °C

65 %

5 m/s

Əlaqə

AZ RU EN

Ana səhifə / Sosial / Akademik Zərifə Əliyeva haqqında kitabın və elektron məlumat bazasının təqdimatı olub

Akademik Zərifə Əliyeva haqqında kitabın və elektron məlumat bazasının təqdimatı olub

03.05.2018 [09:45]

Mayın 2-də M.F.Axundzadə adına Azərbaycan Milli Kitabxanasında görkəmli oftalmoloq-alim, Əməkdar Elm Xadimi, akademik Zərifə Əliyevaya həsr edilmiş “Zərifə Əliyeva. Biblioqrafiya” kitabının və “Zərifə xanım Əliyeva - 95” adlı elektron məlumat bazasının təqdimatı olub.
AZƏRTAC xəbər verir ki, tədbirdə rəsmi şəxslər, elm və mədəniyyət xadimləri iştirak ediblər.
Milli Kitabxananın direktoru Kərim Tahirov çıxış edərək görkəmli alimin keçdiyi həyat yolu haqqında məlumat verib. Biblioqrafiyanın əhəmiyyətindən danışan direktor deyib ki, bu nəşr Mədəniyyət Nazirliyi və Milli Kitabxananın birgə layihəsi əsasında ərsəyə gəlib. “Azərbaycanın görkəmli şəxsiyyətləri” seriyasından oxuculara təqdim olunan bu yeni biblioqrafiyaya yeni bölmələr və yarımbölmələr əlavə edilib. Yeni nəşrdə son illərin materialları da öz əksini tapıb. Biblioqrafiya alimin 1958-2018-ci illərdə Azərbaycan, rus və ingilis dillərində nəşr edilmiş kitabları, elmi konqres, sessiya və konfrans materiallarında və dövri mətbuatda dərc edilmiş məqalələri haqqında materialları əhatə edir. Nəşrdə “Görkəmli şəxsiyyətlər Zərifə Əliyeva haqqında”, “Həyat və fəaliyyətinin əsas tarixləri”, “Zərifə Əliyevanın xatirəsinin əbədiləşdirilməsi” bölmələri yer almaqla yanaşı, ilk dəfə olaraq “Zərifə Əliyeva dünya kitabxanalarında” bölməsi əlavə edilib. Vəsaitə daxil edilmiş materiallar xronoloji ardıcıllıqla, daxildə isə əlifba sırası ilə qruplaşdırılıb. Qeyd edilib ki, vəsaitin sonunda oxuculara kömək göstərmək və biblioqrafiyadan istifadəni asanlaşdırmaq məqsədilə köməkçi bölmələr - “Zərifə Əliyevanın əsərlərinin əlifba göstəricisi”, “Zərifə Əliyeva haqqında yazan müəlliflərin əlifba göstəricisi və “Həmmüəlliflərin əlifba göstəricisi” də tərtib olunub.
Mədəniyyət nazirinin birinci müavini Vaqif Əliyev böyük alim, akademik Zərifə Əliyevanın elmi fəaliyyətindən, onun ömür-gün yoldaşı Ulu öndər Heydər Əliyevə olan böyük sevgisindən danışıb. Nazir müavini deyib ki, Azərbaycanın səhiyyəsinə böyük töhfələr vermiş bu insanı xatırlayanda hər bir azərbaycanlının gözü önündə mənəvi kamilliyin ən uca zirvəsində dayanan, əziz xatirəsi milyonlarla insanın qəlbində yaşayan, insanların gözlərinə nur verən görkəmli elm fədaisinin işıqlı çöhrəsi canlanır. Eyni zamanda, biz nəcib Azərbaycan qadını, böyük bir nəslin layiqli övladı, vəfalı ömür-gün yoldaşı, fədakar ana obrazı görürük. Yüksək intellekt, geniş erudisiya, zəngin mədəniyyət, dərin bilik, insanpərvərlik, Vətənə məhəbbət və xeyirxahlıq kimi keyfiyyətlər Zərifə xanımın portretini tamamlayır. Zərifə xanım kövrək çiyinlərində böyük məsuliyyət və fədakarlıqla Ümummilli liderlə çiyin-çiyinə getmək, Onun dayağı olmaq, qayğısına qalmaq və ağır günlərdə dərdinə şərik olmaq yükünü daşıdı. O övladlarını layiqli vətəndaşlar kimi, öz nəslinin yüksək mənəvi dəyərlərinin varisi kimi yetişdirdi.
Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova, Azərbaycan Dövlət İqtisad Universitetinin rektoru Ədalət Muradov, Azərbaycan Tibb Universitetinin prorektoru Rauf Əliyev görkəmli alimin yaradıcılığından, insani keyfiyyətlərindən söz açıblar. Bildirilib ki, onun mükəmməl biliyə və bacarığa malik oftalmoloqların və ümumiyyətlə, tibb işçilərinin hazırlanmasında böyük əmək sərf etməsi danılmazdır. Dünya oftalmologiya elminə böyük töhfələr vermiş akademik Zərifə xanım Əliyevanın zəngin irsi, tibbin müxtəlif sahələri üzrə apardığı tədqiqatlar, qazandığı nailiyyətlər, yaratdığı fundamental əsərlər Azərbaycan tibb elminin parlaq səhifələrini təşkil edir. Görkəmli alimin keçdiyi şərəfli ömür yolu hər bir Azərbaycan vətəndaşı, hər bir alim və həkim üçün həyat və mənəviyyat dərsi, kamillik və müdriklik məktəbidir.
Tədbirdə digər çıxış edənlər də alimin yaradıcılığı və gördüyü işlərlə bağlı fikirlərini bölüşüblər.
Sonra “Zərifə xanım Əliyeva - 95” elektron məlumat bazasının təqdimatı olub.
Tədbir çərçivəsində Milli Məclisin deputatı, yazıçı-dramaturq Hüseynbala Mirələmovun “Zərifə Əliyeva” adlı kitabının yenidən çap olunmuş variantı da təqdim edilib.

Paylaş:

Baxılıb: 781 dəfə