İstanbul Boğazının incisi- Ortaköy Məscidi

Bakı:

19 °C

77 %

3 m/s

Əlaqə

AZ RU EN

Ana səhifə / Turizm / İstanbul Boğazının incisi- Ortaköy Məscidi

İstanbul Boğazının incisi- Ortaköy Məscidi

14.09.2024 [07:52]

Rəngarəng bazarı, canlı atmosferi, gözoxşayan işıqları ilə İstanbulun, Beşiktaşın ən gözəl səmtlərindən biridir Ortaköy. İstanbul boğazının suları ilə qucaqlaşan küçələri, İskələ meydanı, kumpir dükanları, imisti insanları ilə unudulmazdır.

Ortaköyda gəziləcək, görüləcək məkanlar sırasında maraqla izlədiyimiz Türkiyə istehsalı filmlərdə, seriallarda, eləcə də İstanbul mövzulu bütün fotolarda qarşımıza çıxan və möhtəşəm memarlığı ilə diqqət çəkən, daha çox Ortaköy Məscidi kimi bilinsə də, əsl adı Böyük Məcidiyyə Məscidi olan tarixi abidə görənləri özünə heyran qoyur.

Sahilin düz kənarında, suların qoynunda, sanki suyun üstündə yerləşibmiş kimi görünən məscid həm Ortaköyün, həm də İstanbulun önəmli simvollarından birinə çevrilib.

Məscid Sultan Əbdülməcidin sifarişi ilə 1853-cü ildə memar Niqoqos Balyan tərəfindən inşa edilib. Bina 1721-ci ildə vəzir İbrahim paşanın kürəkəni Mahmud ağanın tikdirdiyi məscidin üstündə tikilib.

Bütün sultan məscidlərində olduğu kimi bu məscid də iki hissədən ibarətdir: harim və hünkar bölmələri. Boğazın dəyişən işıqlarını məscidə gətirmək üçün geniş və hündür pəncərələr düzəldilib ki, bu da məscidə ayrı gözəllik və özünəməxsusluq verir.

Pilləkənlərlə çıxmaq mümkün olan binanın tək eyvanlı iki minarəsi var. Divarları ağ yonma daşdan hörülüb. Tək günbəzin divarları çəhrayı mozaikadandır. Mehrab mozaika və mərmərdən, minbər isə porfir örtüklü mərmərdən hazırlanıb.

Olduqca zərif memarlıq nümunəsi olan məscid 1862 və 1866-cı illərdə təmir edilib. Ancaq 1894-cü il zəlzələsi tarixi abidəyə çox böyük zərər verib. Buna görə də 1909-cu ildə yenidən təmir etdirilib. 1960-cı illərdə binada yaranan çatlar səbəbindən yenidən bərpa işləri başladılıb və zəmin möhkəmləndirilərək günbəz yenilənib. Bu təmir səbəbindən ibadətə bağlanan məscid 1969-cu ildə yenidən müsəlman sakinlərin ixtiyarına verilib. Təəssüf ki, möhtəşəm memarlıq nümunəsi yenə də qəzavü-qədərdən yan ötüşə bilməyib. Bu dəfə yanğın tarixi məscidin varlığına qəsd etməyə çalışıb. Amma 1984-cü ildə baş verən bu böyük fəlakət binanı qismən dağıtsa da, yenidən bərpa edilərək tariximizə qazandırılıb.

Vəqflər Ümumi Müdirliyi tərəfindən 2011-2014-cü illər arasında təxminən üç il davam edən bərpa işləri 6 iyun 2014-cü ildə tamamlanan məscid yenidən ibadət və ziyarətlərə açılıb.

Ortaköy Məscidinin düz yanında daha bir möhtəşəm abidə öz əzəməti ilə insanın gözünü qamaşdırır. Əsma Sultan İmarəti də buranın görülməyə dəyər memarlıq nümunələrindən biridir. İmarət Sultan Əbdüləzizin qızı Əsma Sultan üçün Çərkəz Mehmet Paşa ilə evləndikdən sonra toy hədiyyəsi kimi inşa edilib.

1848-ci ildə Əsma Sultanın ölümündən sonra müxtəlif dövrlərdə Sultan II Əbdüləzizin qızlarına verilib, 1915-1922-ci illər arasında yunan məktəbi və anbar kimi istifadə edilib. 1950-ci illərdə çox əl dəyişdirən bina 1975-ci ildə güclü yanğına məruz qalıb.

1990-ci illərdə “The Marmara Collection” tərəfindən satin alınan bina günümüzdə toy, tədbir kimi mərasimlərin keçirildiyi məkan olaraq istifadə edilir.

İstanbulun qaranlıq gecəsində insanın ruhuna həzin bir türkü pıçıldayan Boğazın sularının qoynunda uzaqdan Ortaköy Məscidini və onun “qulaq dostu” olan Əsma Sultan İmarətini seyr etmək ayrı bir həzdir. Keçmişlə müasirliyin, təbiətlə insan əlinin zəhmətinin ortaq möcüzəsi olan bu möhtəşəm abidə bir daha türkün qədim və şanlı tarixi ilə ürəkdən, bütün səmimiyyəti ilə öyünmək səbəbi olduğunu sübut edir.

Şahanə MÜŞFİQ

Paylaş:

Baxılıb: 1137 dəfə