İvari Padar: Azərbaycan bazarı estoniyalı sahibkarlar üçün maraqlıdır

Bakı:

19 °C

72 %

2 m/s

Əlaqə

AZ RU EN

Ana səhifə / Xarici siyasət / İvari Padar: Azərbaycan bazarı estoniyalı sahibkarlar üçün maraqlıdır

İvari Padar: Azərbaycan bazarı estoniyalı sahibkarlar üçün maraqlıdır

05.09.2014 [09:44]

Estoniya ilə Azərbaycan arasında kənd təsərrüfatı sahəsində ikitərəfli əlaqələr yaxşı səviyyədədir.
Bunu AzərTAc-ın müxbirinə müsahibəsində Estoniyanın kənd təsərrüfatı naziri İvari Padar bildirib.
Estoniyalı nazir qeyd edib ki, iki ölkənin kənd təsərrüfatı nazirlikləri rəhbərlərinin qarşılıqlı səfərləri sayəsində Estoniya ilə Azərbaycanın əməkdaşlığı xeyli fəallaşıb. 2012-ci ildə Estoniyanın ovaxtkı kənd təsərrüfatı naziri Xelir-Valdor Seyederin Azərbaycana səfəri çərçivəsində aqrar sahədə əlaqələr müzakirə edilib. 2013-cü ilin yazında isə Azərbaycanın kənd təsərrüfatı nazirinin müavini Bəhram Əliyev Tartuda keçirilən “Aqroforum Baltikum” beynəlxalq konfransında iştirak edib. Bu ilin mayında Estoniya Kənd Təsərrüfatı Nazirliyinin balıqçılıq təsərrüfatı siyasəti və beynəlxalq əməkdaşlıq üzrə vitse-kansleri Olavi Petron Bakıda səfərdə olub. O, 20-ci Azərbaycan Beynəlxalq qida sənayesi sərgisində və 8-ci Azərbaycan Beynəlxalq kənd təsərrüfatı sərgisində iştirak edib.
İvari Padarın sözlərinə görə, daha sıx əməkdaşlıq həmişə arzu edilən haldır, “lakin ölkələrimizin coğrafi uzaqlığını nəzərə alaraq demək olar ki, hazırda müntəzəm əlaqə var”. Nazir yaxın gələcəkdə Estoniya ilə Azərbaycan arasında daha sıx əməkdaşlıq yaranacağına ümid etdiyini söyləyib.
Estoniyanın aqrar nazirliyinin başçısı qeyd edib ki, kənd təsərrüfatı sahəsində əlaqələrin inkişafı üçün çox böyük perspektivlər var.
Estoniyalı nazir vurğulayıb: “İki ölkənin nazirlikləri arasında əməkdaşlıq haqqında müqavilənin layihəsi hazırdır. Layihə son razılaşdırma mərhələsindədir. Ümid edirəm ki, bu müqavilənin imzalanması Estoniya ilə Azərbaycan arasında daha səmərəli əməkdaşlığa təkan verəcəkdir”.
İvari Padar bildirib ki, Azərbaycan bazarı eston sahibkarlar üçün, eston mallarının əksəriyyəti üçün müstəqil yeni bazar kimi maraqlıdır. Üstəlik, iki ölkənin məhsullarının spesifikası nəzərə alınmaqla onların bazarları bir-biri üçün maraqlı olacaqdır. Məsələn, Estoniyanın süd, ət və balıq məhsulları, Azərbaycanın meyvələri, şirə və konyak məhsulları qarşılıqlı maraq doğuracaqdır.
İvari Padar deyib ki, Azərbaycanın kənd təsərrüfatı naziri Heydər Əsədovu Estoniyada qəbul etməyə şad olar. Nazir deyib: “2015-ci ilin aprel ayında Tartu şəhərində yuxarıda adını çəkdiyimiz “Aqroforum baltikum” illik konfransı keçiriləcəkdir. Həmin forum belə bir səfər üçün münasib olardı”.

Paylaş:

Baxılıb: 1733 dəfə