AzərTAc-ın müxbirinin Azərbaycanda aqrar sektorun inkişafından bəhs edən məqaləsi İtaliyanın mətbuat resurslarında

Bakı:

20°C

60%

7m/s

AZ RU EN

Ana səhifə / Xarici siyasət / AzərTAc-ın müxbirinin Azərbaycanda aqrar sektorun inkişafından bəhs edən məqaləsi İtaliyanın mətbuat resurslarında

AzərTAc-ın müxbirinin Azərbaycanda aqrar sektorun inkişafından bəhs edən məqaləsi İtaliyanın mətbuat resurslarında

06.02.2015 [09:33]

Azərbaycan Dövlət Teleqraf Agentliyinin (AzərTAc) İtaliyadakı xüsusi müxbiri Maqsud Dadaşovun “Kənd təsərrüfatı Azərbaycanın iqtisadi inkişafının perspektivli sahəsi kimi” sərlövhəli məqaləsi bu ölkənin “Notizie Geopolitiche” xəbər portalında, Avrasiya və Afrika üzrə Tədqiqatlar, Araşdırmalar və Beynəlmiləlləşmə Assosiasiyasının və “Avrasiya-Aralıq dənizi” Tədqiqat Mərkəzinin saytlarında yerləşdirilib.
Məqalədə bildirir ki, dünya enerji bazarında oynadığı rol baxımından beynəlxalq nüfuzu getdikcə artan Azərbaycanda qeyri-neft sektorunun inkişafı və karbohidrogen ehtiyatlarından asılılığın azaldılması istiqamətində iqtisadiyyatın şaxələndirilməsi əsas hədəfdir. Ölkəmizdə müvafiq sektorun inkişafını, bu istiqamətdə Azərbaycan və İtaliya arasında əməkdaşlıq imkanlarını təhlil edən müəllif yazır: “Hazırda dünya iqtisadiyyatının neft və qazdan başqa digər sahələrin də ön plana çıxarılmasına ehtiyacı var. Uzun müddətli inkişaf üçün şaxələndirmə önəmli bir addımdır. Neft istehsal edən ölkələr, o cümlədən qlobal enerji bazarının əsas oyunçusuna çevrilən Azərbaycan enerji gəlirlərindən asılılığı azaltmaq istiqamətində önəmli tədbirlər dövrünə qədəm qoyub. Ölkəmiz zəngin iqlimə, əlverişli coğrafi mövqeyə və iqtisadiyyatın şaxələndirilməsi strategiyasının həyata keçirilməsi üçün zəruri olan bütün imkanlara malikdir. Bu sırada kənd təsərrüfatı önəmli yerlərdən birini tutur”.
Azərbaycanda aqrar sektorun inkişaf tarixindən bəhs edilən yazıda diqqətə çatdırılır ki, bu sahənin tərəqqisi müstəqilliyimizin bərpasından sonrakı dövrə təsadüf edir. İnkişaf prosesinin davamı olaraq son illər kənd təsərrüfatının ölkə iqtisadiyyatının prioritet sahələrindən birinə çevrilməsi istiqamətində mühüm işlər görülür. Bu baxımdan Prezident İlham Əliyevin 2015-ci ilin ölkədə “Kənd təsərrüfatı ili” elan edilməsi haqqında imzaladığı Sərəncam xüsusi əhəmiyyətə malikdir. Sənəd bu sahənin modernləşməsinə təkan vermək, mövcud problemlərin həllinə sistemli və kompleks yanaşmanı təmin etmək, ölkəmizin aqrar potensialını geniş təbliğ etmək məqsədi daşıyır.
Qeyd olunur ki, hazırda Azərbaycanda həyata keçirilən iqtisadi siyasətdə qida və ərzaq təhlükəsizliyi önəmli yer tutur. Təsadüfi deyil ki, aqrar sektorun və ərzaq təhlükəsizliyinin inkişafı “Azərbaycan 2020: gələcəyə baxış” İnkişaf Konsepsiyasına əsas elementlər kimi daxil edilib. Gələcəkdə istehsal etdiyi kənd təsərrüfatı məhsullarını xarici bazarlara çıxarmaq Azərbaycanın əsas hədəflərindəndir.
Məqalədə deyilir: “Azərbaycan kənd təsərrüfatı sahəsində önəmli təcrübəsi olan ölkələr, o cümlədən İtaliya ilə əməkdaşlığı genişləndirməkdə maraqlıdır. Xüsusi vurğulamaq lazımdır ki, Azərbaycanda italiyalı investorların marağına səbəb ola biləcək bir çox iqtisadi sektorlar mövcuddur. Son illər kənd təsərrüfatı sahəsində də ölkələrimiz arasında əməkdaşlığın genişləndirilməsi münasibətlərimizin dərinləşməsinə töhfə verməkdədir. “Milan Expo 2015” beynəlxalq sərgisi vasitəsilə bu əlaqələr yeni məcraya qədəm qoyacaq. Azərbaycan bu tədbirdə öz milli pavilyonu ilə tarixi, coğrafi və mədəni özəlliklərini nümayiş etdirəcək”.
Müəllif sonda diqqətə çatdırır ki, aqrar sektoru inkişaf etdirmək və yeni bazarlara çıxmaq üçün real potensialı olan Azərbaycanda “Kənd təsərrüfatı ili”ndən yüksək gözləntilər var. Şübhəsiz ki, bu il əldə olunacaq müsbət nəticələr kənd təsərrüfatını Azərbaycan iqtisadiyyatının prioritet sahələrindən birinə çevirəcək.

Paylaş:

Baxılıb: 1358 dəfə