Cenevrədə Azərbaycan multikulturalizmindən bəhs edən seminar keçirilib

Bakı:

17 °C

82 %

4 m/s

Əlaqə

AZ RU EN

Ana səhifə / Xarici siyasət / Cenevrədə Azərbaycan multikulturalizmindən bəhs edən seminar keçirilib

Cenevrədə Azərbaycan multikulturalizmindən bəhs edən seminar keçirilib

30.03.2015 [09:31]

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının, Bakı Beynəlxalq Multikulturalizm Mərkəzinin və Silahlı Qüvvələr Üzərində Demokratik Nəzarət üzrə Cenevrə Mərkəzinin təşəbbüsü ilə İsveçrənin Frayburq Universiteti nəzdində fəaliyyət göstərən Federalizm İnstitutunda “Azərbaycanda və İsveçrədə multikulturalizmin və dünyəviliyin ortaq dəyərləri” mövzusunda seminar keçirilib.
Mərkəzdən AZƏRTAC-a bildirilib ki, seminarda Bakı Beynəlxalq Multikulturalizm Mərkəzinin (BBMM) icraçı direktoru, professor Azad Məmmədov, Federalizm İnstitutunun nümayəndəsi professor Eva-Maria Belser, Fransa Xarici İşlər Nazirliyinin nümayəndəsi Filip Lefort, Frayburq Universitetinin hüquqşunası, professor Daniel Vorner və başqaları məruzə ilə çıxış ediblər.
Azad Məmmədov Azərbaycan multikulturalizmi və tolerantlığı ənənələrindən, Bakı Beynəlxalq Multikulturalizm Mərkəzinin yaradılması və fəaliyyətindən, Azərbaycan multikulturalizmi modelindən və bu modelin dünyaya tanıdılmasından ətraflı söhbət açıb. O, “Azərbaycan multikulturalizmi” fənninin xarici ölkələrin universitetlərində tədris olunmasından bəhs edib və növbəti semestrdən etibarən İsveçrənin Frayburq Universitetində də tədris olunacağını vurğulayıb. İcraçı direktor bildirib ki, “Azərbaycan multikulturalizmi” fənnini öyrənən tələbələr tədris müddətində Azərbaycan ictimai-fəlsəfi fikir tarixində yer alan tolerantlıq, multikulturalizm ideyaları ilə, müasir dövrdə Azərbaycanda multikulturalizm sahəsində həyata keçirilən fəaliyyətlə tanış olacaq, multikulturalizmin Azərbaycan modelinin mahiyyətini, xüsusiyyətlərini və üstünlüklərini daha dərindən anlayacaqlar. A.Məmmədovun çıxışı seminar iştirakçıları tərəfindən maraqla qarşılanıb və bu səbəbdən icraçı direktor növbəti gün ayrıca olaraq Frayburq Universitetinin sosial elmlər kafedrasının professor-müəllim heyəti ilə görüşə dəvət olunub.
Görüşdə Azad Məmmədov Azərbaycan Respublikasının multikulturalizmi özünün dövlət siyasəti kimi bəyan etməsindən, Prezident İlham Əliyevin bu sahədə apardığı məqsədyönlü işdən, ölkə başçısının bu siyasəti uğurla həyata keçirməsi nəticəsində Azərbaycanda əldə olunan əlverişli multikultural və tolerant mühitdən danışıb.
Görüşün sonunda Azərbaycan multikulturalizmindən bəhs edən kitabın İsveçrədə nəşr olunması qərara alınıb və bu kitabın giriş hissəsinin yazılması A.Məmmədova təklif edilib.

Paylaş:

Baxılıb: 1905 dəfə