Makron, yoxsa Le Pen...

Bakı:

26 °C

63 %

2 m/s

Əlaqə

AZ RU EN

Ana səhifə / Xarici siyasət / Makron, yoxsa Le Pen...

Makron, yoxsa Le Pen...

23.04.2022 [11:22]

Fransızlar kimə səs verəcəklər?

Nardar BAYRAMLI

Aprelin 24-də Fransada prezident seçkilərinin ikinci turu keçiriləcək. İkinci turda hazırk? Prezident Emmanuel Makron və ultra sağçı Milli Cəbhə Partiyasının lideri Marin Le Pen mübarizə aparacaq. Xat?rladaq ki, birinci turda səsvermənin nəticələrinə görə, Makron 28,5 faiz, Le Pen isə 24,2 faiz səs toplayıb. İkinci turda seçicilər yekun seçim edəcəklər. Bu turda hansı namizədin qalib gəlmək şansı yüksəkdir?

Məsələ ilə bağlı qəzetimizə açıqlama verən politoloq Ramiz Alıyev bildirib ki, E.Makron özünün prezidentliyi müddətində Fransanı Avropanın lider dövlətinə çevirməyə çalışıb: “Makrona dövlət başçısı kimi münasibətdə əhalinin rəyi müəyyən qədər fərqli olub. Yəni müxtəlif vaxtlarda onun reytinqi artıb və ya azalıb. Məsələn, Fransa hökumətinin bir sıra qərarları əhali tərəfindən ciddi narazılıqla qarşılanmışdı və bu iğtişaşlara səbəb olmuşdu. Həmin hadisələr Makronun nüfuzuna mənfi təsir göstərmişdi. Amma Rusiya-Ukrayna müharibəsi başlayanda Makronun ortaya qoyduğu mövqe xalq arasında reytinqini bir qədər yüksəltdi. Hələ Rusiya Ukraynaya hücum etməmişdən əvvəl də Makron tərəflər arasında vasitəçilik edirdi, Rusiyaya səfər edərək Prezident Putinlə görüşmüşdü. Doğrudur, onun təşəbbüsləri müharibənin qarşısını ala bilməsə də, Fransada əhalinin rəğbətini qazanmışdı. E.Makron hazırda da Ukrayna böhranı ilə bağlı müxtəlif təşəbbüslərlə çıxış edir. Onun Fransanı Avropanın lider dövlətinə çevirmək cəhdləri də prezident seçkilərinin ikinci turunda öz təsirini göstərəcək. Birinci turda liderliyi qazanmış Makronun ikinci turda da şansı böyükdür”.

Politoloq qeyd edib ki, seçkilərdə digər namizəd Marin Le Penin isə siyasi kimliyi, fəaliyyəti Qərb üçün uğurlu seçim hesab olunmur: “Çünki Le Pen daha çox qatı sağçı və rusiyapərəst mövqeyi ilə tanınır. O, Rusiya ilə Fransa arasında beynəlxalq əlaqələrin möhkəmləndirilməsinin ən məşhur tərəfdarlarından biridir. Avropa Parlamentində Le Penə qarşı irəli sürülən ittihamlar və digər məsələlər onu Avropa üçün arzuedilməz siyasətçiyə çevirib. Bu şəxsin indiyə qədərki fəaliyyəti də bir sıra suallar doğurur. Belə ki, Le Pen, hətta Rusiya ilə strateji tərəfdaşlığın zəruriliyini də bəyan edib. 2014-cü ilin martında isə Marin Le Pen Krımın statusu ilə bağlı referendumun nəticələrinin legitimliyini tanıyıb. Həmin il rusiyalı rəsmi Sergey Narışkinlə görüşündə isə Le Pen Qərb ölkələrinin Rusiyaya qarşı sərt mövqeyini və xüsusilə Avropa Şurası Parlament Assambleyasının Rusiyaya qarşı tətbiq etdiyi sanksiyalar siyasətini pisləmişdi. Hətta Le Pen dəfələrlə fransızların Ukraynanı Aİ-nin bir hissəsi kimi görmək istəmədiklərini də açıq şəkildə bildirib. Onun qənaətinə görə, Ukraynada baş verənlərə görə günah Avropa İttifaqındadır. Digər tərəfdən, öz fikirlərində rasizmə, irqi ayrı-seçkiliyə yönəlik məqamlara böyük yer verən bu siyasətçinin Fransanın dövlət başçısı seçilmək şansı real görünmür. Bunu seçkilərə bir neçə gün qalmış namizədlər arasında keçirilən tele-debatdan da görmək mümkündür. Belə ki, namizədlər arasında Rusiya və hicab müzakirəsi üçsaatlıq müzakirə ilə rekord qırıb. Fransada hicabın ləğv olunmasının tərəfdarı kimi çıxış edən Le Pendən fərqli olaraq Prezident Makron hicabın din məsələsi olduğunu və hər hansı dini simvolun qadağan edilməsinin əleyhinə olduğunu deyib. Le Penin Rusiya Prezidenti Putinlə yaxınlığı da debatda gərgin müzakirələrə səbəb olub. Le Penin Rusiya administrasiyasına yaxın bir bankdan külli miqdarda kredit aldığını xatırladan Makron, “Rusiyadan danışanda başqa ölkələrin idarəçilərindən deyil, bankirinizdən danışırsınız” deyib. Le Pen isə heç bir Fransa bankının ona kredit vermədiyi üçün xaricdən borc götürməli olduğunu iddia edib. Həmin debatı təxminən 16 milyon insan izləyib və izləyicilərin 59 faizi Makrona etimad göstərib. Ölkədə keçirilən digər sorğularda Makronun daha şanslı olduğu görünür. Ona görə də, 24 aprel seçkilərində E.Makronun yenidən Fransanın dövlət başçısı seçiləcəyini demək mümkündür”.

Paylaş:

Baxılıb: 1206 dəfə