Roma Statutu, yoxsa Rusiya ilə əlaqələr...

Bakı:

14°C

77%

3m/s

Əlaqə

AZ RU EN

Ana səhifə / Xarici siyasət / Roma Statutu, yoxsa Rusiya ilə əlaqələr...

Roma Statutu, yoxsa Rusiya ilə əlaqələr...

03.10.2023 [11:53]

Seçim İrəvana qalıb

Ötən ayın əvvəlində Ermənistan hökumətinin Beynəlxalq Cinayət Məhkəməsinin (BCM) Roma Statutunun ratifikasiyası layihəsini parlamentə göndərməsi ilə başlanan proses maraqlı məcraya yönəlməkdədir. Sentyabrın ilk günlərində məsələ ilə bağlı “cəsarətli” açıqlamalar verən erməni siyasətçiləri artıq yavaş-yavaş öz sözlərini danmağa, Rusiyaya “yalvarmağa” başlayıb. Hətta Ermənistan Rusiyaya Beynəlxalq Cinayət Məhkəməsi haqqında Roma Statutu ilə bağlı ikitərəfli saziş imzalamağı belə təklif edib. Belə ki, Ermənistanın beynəlxalq hüquq məsələləri üzrə nümayəndəsi Yeqişe Kirakosyan parlament komissiyasının iclasında, müvafiq qanun layihəsinin müzakirəsi zamanı bildirib ki, Ermənistan Beynəlxalq Cinayət Məhkəməsinin Roma Statutunu ratifikasiya etmək niyyəti ilə bağlı uzun aylar ərzində Rusiya tərəfi ilə danışıqlar aparılıb. “Ermənistanın təkflifinə əsasən, ?tatutla bağlı tərəflər bir-birlərinə ən narahatedici məsələlər üzrə zəmanət verməyi öhdələrinə götürürlər”, - deyə Kirakosyan bildirib. Ermənistan rəsmisi aprel ayında geri göndərilən təkliflə bağlı heç bir cavab alınmadığını vurğulayıb.

Qeyd edək ki, Ermənistan Roma Statutuna qoşulduqda BCM-in çıxardığı qərarlar ölkə tərəfindən də icra olunmalı olacaq. İrəvan bu barədə niyyətini bəyan etdikdə Rusiya XİN açıqlama yayaraq Ermənistanın bu qərarının qəbuledilməz olduğunu bildirib. Belə ki, BCM mart ayında Rusiya Prezidenti Vladimir Putini Ukraynada törədilmiş hərbi cinayətlərə görə cavabdeh olmaqda ittiham edərək həbsinə order verib. Putin Ermənistana səfər edərsə, Roma Statutuna əsasən, bu ölkədə həbs olunmalıdır. Xatırladaq ki, bu il martın 24-də Ermənistan Konstitusiya Məhkəməsinin (KM) sədri Arman Dilanyan bəyan etmişdi ki, rəhbərlik etdiyi qurum BCM-in Roma Statutu ilə təsbit edilmiş öhdəliklərini ölkənin əsas qanunlarına uyğun olaraq tanıyıb.

Rusiyanın reaksiyası sərtdir - ən mənfi nəticələr...

Rusiyanın Ermənistanın “təklifinə” budəfəki reaksiyası da əvvəlkilərdən fərqlənməyib. Belə ki, Rusiya Xarici İşlər Nazirliyi yenidən Ermənistana xəbərdarlıq edib. Bildirilib ki, Ermənistanın Roma Statutunu ratifikasiya etməsi Rusiya-Ermənistan arasında ikitərəfli münasibətlər üçün ən mənfi nəticələrə səbəb olacaq. “Ermənistan tərəfindən Roma Statutunun ratifikasiyası ikitərəfli münasibətlər üçün ən mənfi nəticələrə səbəb olacaq. Moskva Ermənistan parlamentində statutla bağlı zərərli qərara möhür vurmayacaq qüvvələrin olacağına ümid edir”, deyə Rusiya XİN-dən verilən açıqlamada qeyd olunub.

O da vurğulanıb ki, İrəvan Rusiya tərəfinin sənədlə bağlı cavab təkliflərini nəzərə almayıb. “Ermənistanın Roma Statutunu ratifikasiya etməsindən sonra Rusiya rəhbərliyinin respublikaya səfərlərini təsəvvür etmək çətin olacaq”, - bildirilib.

Ermənistan sonuncu mərhələdə...

Göründüyü kimi, dünənə qədər özünü Rusiyanın “müttəfiqi” hesab edən Ermənistan Rusiya ilə “danışığa” sonuncu mərhələdə başlamaq niyyətini ortaya qoyub. Bu isə Rusiya üçün olduqca ciddi və həssas məsələdir. Xatırladaq ki, Beynəlxalq Cinayət Məhkəməsinin Roma Statutu 15 iyun 1998 - 17 iyul 1998 tarixləri arasında Birləşmiş Millətlər Təşkilatı Konfransının, İtaliyanın paytaxtı Romada qəbul etdiyi Beynəlxalq Cinayət Məhkəməsinin Qurulması haqqında statusdur. 2016-cı ilin mart ayından etibarən 139 dövlət müqaviləni imzalasa da, cəmisi 124 dövlət bu müqaviləni təsdiqləyib ki, Ermənistan da son mərhələni adlamaqla 125-ci tamhüquqlu təsdiqçi ola bilər - təbii ki, bu da Rusiya ilə ikitərəfli əlaqələrin konkret olaraq dayandırılmasına belə yol aça bilər. Baş verənlər, perspektivdə gözlənilənlər isə Rusiya ictimaiyyəti tərəfindən diqqətlə izlənilir. Rusiya KİV-in məsələyə münasibəti isə birmənalıdır - hətta vaxtilə Ermənistanın dəstəkçisi qismində çıxış edən, Azərbaycana qarşı antikampaniyalar aparan KİV-lər, ekspertlər, siyasi şərhçilər və Duma deputatları belə bu acı reallığı etiraf etmək məcburiyyətində qalıblar - Ermənistanın Roma Statutunu qəbul etməsi, imzalaması ikitərəfli əlaqələrin bitməsi anlamına gəlir...

SADİQ

Paylaş:

Baxılıb: 551 dəfə