Azərbaycanın liderliyi ilə formalaşan sülh gündəliyi

Bakı:

27 °C

47 %

3 m/s

Əlaqə

AZ RU EN

Ana səhifə / YAP xəbərləri / Azərbaycanın liderliyi ilə formalaşan sülh gündəliyi

Azərbaycanın liderliyi ilə formalaşan sülh gündəliyi

03.09.2025 [14:04]

Prezident İlham Əliyev nüfuzlu ərəb mediasının aparıcı platformalarından biri olan “Əl-Ərəbiyyə” telekanalına geniş müsahibə verib. Dövlət başçısı müsahibəsində Azərbaycanın regional siyasəti, enerji təhlükəsizliyi, beynəlxalq əməkdaşlıq, eləcə də Cənubi Qafqazda formalaşan yeni geosiyasi reallıqlar barədə ətraflı fikir bildirib.

Dövlət başçısı qeyd edib ki, Azərbaycan hər zaman ədalətli və balanslı siyasət yürüdüb. Bu siyasətin mərkəzində isə regional əməkdaşlıq, sabitlik və qarşılıqlı etimad dayanır. Dövlət başçısı vurğulayıb ki, Cənubi Qafqazda yaranmış yeni geosiyasi reallıqlar region ölkələri üçün əməkdaşlıq imkanlarını daha da genişləndirir. Onun sözlərinə görə, Azərbaycanın təşəbbüsləri sülh, inkişaf və əməkdaşlığa xidmət edir, regionun gələcəyi isə məhz bu prinsiplər üzərində qurulmalıdır.

Müsahibədə enerji məsələlərinə xüsusi diqqət yetirilib. Prezident İlham Əliyev bildirib ki, Azərbaycan uzun illərdir beynəlxalq enerji bazarının etibarlı tərəfdaşı kimi çıxış edir və Avropanın enerji təhlükəsizliyinin təmin olunmasına mühüm töhfələr verir. Bununla yanaşı, ölkəmiz bərpaolunan enerji layihələrinə böyük önəm verir. Qarabağ və Şərqi Zəngəzur “yaşıl enerji zonası” elan olunub, Xəzər dənizində külək enerjisi layihələri həyata keçirilir. Prezidentin sözlərinə görə, bu sahədə aparılan işlər Azərbaycanın həm regional, həm də qlobal miqyasda strateji əhəmiyyətini daha da artırır.

Dövlət başçısı müsahibəsində Azərbaycanın mühüm nəqliyyat qovşağına çevrildiyini də vurğulayıb. Şərq-Qərb və Şimal-Cənub nəqliyyat dəhlizlərinin kəsişməsində yerləşən Azərbaycan beynəlxalq ticarət və tranzit üçün unikal imkanlar yaradır. Prezident İlham Əliyev qeyd edib ki, ölkəmizin həyata keçirdiyi infrastruktur layihələri təkcə region dövlətləri üçün deyil, həm də geniş coğrafiyaya malik beynəlxalq tərəfdaşlar üçün mühüm əhəmiyyət daşıyır.

Dövlətimizin başçısı həmçinin Azərbaycanın beynəlxalq təşkilatlarla əməkdaşlığını yüksək qiymətləndirib. Onun sözlərinə görə, Azərbaycanın BMT, Qoşulmama Hərəkatı, İslam Əməkdaşlıq Təşkilatı və digər qurumlarla münasibətləri qarşılıqlı hörmət və etimada əsaslanır. Dövlət başçısı vurğulayıb ki, Azərbaycan müsəlman dünyasında birliyi və həmrəyliyi dəstəkləyən, əməkdaşlığa yönəlmiş siyasət yürüdür.

Beləliklə, Prezident İlham Əliyevin “Əl-Ərəbiyyə” telekanalına müsahibəsi beynəlxalq ictimaiyyətə ünvanladığı mühüm mesajlarla yadda qaldı. Bu çıxış Azərbaycanın regional güc və qlobal aktor kimi mövqeyini daha da möhkəmləndirdi. Azərbaycanın ədalətli, praqmatik və gələcəyə hesablanmış siyasəti dünya mediasında böyük maraq doğurur.

Müsahibə həm də onu göstərir ki, Azərbaycan müstəqil və qətiyyətli mövqeyi ilə beynəlxalq münasibətlər sistemində etibarlı tərəfdaş, sabitliyin və inkişafın dəstəkləyicisi olaraq qəbul olunur.

Fidan Hüseynova,

YAP Quba rayon təşkilatının sədri

Paylaş:

Baxılıb: 575 dəfə