İtaliya-Azərbaycan əlaqələri çox uğurla inkişaf edir və biz əsl strateji tərəfdaşlarıq

Bakı:

17°C

77%

6m/s

Əlaqə

AZ RU EN

Ana səhifə / YAP xəbərləri / İtaliya-Azərbaycan əlaqələri çox uğurla inkişaf edir və biz əsl strateji tərəfdaşlarıq

İtaliya-Azərbaycan əlaqələri çox uğurla inkişaf edir və biz əsl strateji tərəfdaşlarıq

08.10.2025 [11:52]

İtaliya ilə Azərbaycan arasında münasibətlər son illərdə yüksələn xətt üzrə inkişaf edərək əsl strateji tərəfdaşlıq səviyyəsinə yüksəlmişdir. İki ölkə arasında diplomatik əlaqələrin qurulmasından ötən müddət ərzində siyasi, iqtisadi, enerji, mədəniyyət və təhsil sahələrində əməkdaşlıq genişlənmiş, qarşılıqlı etimada və hörmətə əsaslanan münasibətlər formalaşmışdır. Bu gün İtaliya və Azərbaycan bir-birini vacib tərəfdaş hesab edir və bir çox sahələrdə ortaq maraqlara əsaslanan uğurlu əməkdaşlıq həyata keçirir. Siyasi əlaqələr yüksək səviyyədə inkişaf edir. İtaliya Azərbaycanın müstəqilliyini tanıyan ilk ölkələrdən biri olmuşdur və bu günə qədər iki ölkə arasında müxtəlif səviyyələrdə çoxsaylı qarşılıqlı səfərlər baş tutmuşdur. Prezidentlər, baş nazirlər, nazirlər və digər yüksək rütbəli rəsmilər arasında davamlı təmaslar münasibətlərin möhkəmlənməsinə xidmət edir. Bu səfərlər zamanı imzalanan sənədlər, razılaşmalar və əməkdaşlıq memorandumu ikitərəfli münasibətlərin hüquqi bazasını daha da gücləndirir. İtaliya Azərbaycanın ərazi bütövlüyünü daim dəstəkləmişdir və beynəlxalq təşkilatlar çərçivəsində də iki ölkə arasında əməkdaşlıq uğurla davam etdirilir. İqtisadi-ticari sahədə əməkdaşlıq münasibətlərin əsas sütunlarından biridir. İtaliya Azərbaycanın əsas ticarət tərəfdaşlarından biridir və ölkəmizin ixracında mühüm paya malikdir. Xüsusilə enerji sahəsində əməkdaşlıq xüsusi əhəmiyyət daşıyır. İtaliya Cənub Qaz Dəhlizi layihəsinin mühüm iştirakçısıdır və TAP (Trans-Adriatik Boru Kəməri) vasitəsilə Azərbaycan qazı İtaliya bazarına nəql olunur. Bu layihə təkcə enerji təhlükəsizliyinin təmin edilməsi baxımından deyil, həm də Avropa ilə Azərbaycan arasında strateji əməkdaşlığın dərinləşdirilməsi baxımından böyük əhəmiyyət kəsb edir. Bununla yanaşı, İtaliya şirkətləri Azərbaycanın qeyri-neft sektoruna, xüsusilə infrastruktur, kənd təsərrüfatı və sənaye sahələrinə sərmayələr qoyur, birgə layihələr reallaşdırılır. Mədəni əlaqələr də iki ölkə arasında dostluğun və qarşılıqlı anlaşmanın möhkəmlənməsinə mühüm töhfə verir. İtaliya incəsənəti və mədəniyyəti Azərbaycanda böyük maraqla qarşılanır və müxtəlif mədəni tədbirlər, sərgilər, konsertlər təşkil olunur. Eyni zamanda Azərbaycan mədəniyyəti İtaliyada təbliğ edilir və müxtəlif şəhərlərdə Azərbaycanın zəngin irsi təqdim olunur. Mədəniyyət sahəsində bu cür mübadilələr xalqlar arasında yaxınlığın artmasına səbəb olur. Təhsil sahəsində də əməkdaşlıq genişlənməkdədir. İtaliya universitetləri azərbaycanlı tələbələr üçün cəlbedici təhsil mərkəzlərindən biridir. Son illərdə İtaliya-Azərbaycan Universitetinin yaradılması bu sahədə əməkdaşlığın strateji səviyyəyə çatdığını göstərir. Bu universitet iki ölkənin akademik təcrübəsinin birləşdirilməsi ilə müasir və yüksək ixtisaslı kadrların hazırlanmasına xidmət edir. Tələbə və müəllim mübadiləsi, birgə layihələr və elmi-tədqiqat proqramları sayəsində təhsil sahəsində yeni imkanlar açılır. Bütün bu amillər bir daha sübut edir ki, İtaliya ilə Azərbaycan arasındakı münasibətlər sadəcə dostluq və əməkdaşlıq xarakteri daşımır, eyni zamanda hər iki ölkə üçün strateji əhəmiyyət kəsb edən tərəfdaşlığa çevrilmişdir. Hər iki tərəf bu əməkdaşlığın daha da inkişaf etdirilməsi üçün siyasi iradə nümayiş etdirir və qarşılıqlı maraqları nəzərə alaraq münasibətləri yeni səviyyəyə yüksəltmək üçün səylər göstərir. Gələcəkdə İtaliya-Azərbaycan əlaqələrinin daha da möhkəmlənəcəyi, yeni sahələri əhatə edəcəyi və hər iki xalqın rifahına xidmət edəcəyi şübhəsizdir.

Nicat Quliyev

Yeni Azərbaycan Partiyası Laçın rayon təşkilatının məsləhətçisi

Paylaş:

Baxılıb: 169 dəfə