Yeni Azərbaycan Partiyası – 33 illik yolun mənası və məsuliyyəti

Bakı:

13 °C

76 %

11 m/s

Əlaqə

AZ RU EN

Ana səhifə / YAP xəbərləri / Yeni Azərbaycan Partiyası – 33 illik yolun mənası və məsuliyyəti

Yeni Azərbaycan Partiyası – 33 illik yolun mənası və məsuliyyəti

20.11.2025 [17:39]

Bu gün Azərbaycan siyasi tarixinin yaddaşında xüsusi yeri olan bir gündür – Yeni Azərbaycan Partiyasının yaradılmasının 33-cü ildönümü. Bu tarix yalnız bir siyasi təşkilatın deyil, bütöv bir dövlətçilik fəlsəfəsinin, milli iradənin və gələcəyə inamın təcəssümüdür. YAP-ın əsası qoyularkən dəyərlər, ideyalar və məqsədlər heç də yalnız bir dövrün tələbi deyildi. Bu ideyalar gələcəyin Azərbaycanın konturlarını cızan bir missiyanın təməlinə çevrildi. 1992-ci ilin mürəkkəb tarixi fonunda xalqın etimadı, narahatlığı və gələcəyə dair gözləntisi bir ünvan tapmışdı. Ulu Öndər Heydər Əliyevin adı ilə bağlanan bu çağırış zamanın sınaqlarından keçərək böyük bir siyasi məktəbə çevrildi. O məktəb ki, bu gün hər bir üzvü ilə birlikdə daha mütəşəkkil, daha məqsədyönlü və daha gələcəyə fokuslanmış bir qüvvə kimi yaşayır. Yeni Azərbaycan Partiyasının 33 illik yolu sadəcə təşkilati inkişaf deyil, həm də müstəqilliyimizin möhkəmlənməsi, dövlətçiliyin bərqərar olması, sosial-siyasi sabitliyin qorunması və xalqın rifahına yönəlmiş çoxşaxəli fəaliyyətin tarixidir. YAP-ın yol xəritəsi daim zamanın nəbzini tutan çağırışlara uyğun yenilənib, yeniləndikcə də güclənib. Bu gün Prezident İlham Əliyevin rəhbərliyi ilə Azərbaycan tamamilə yeni bir mərhələyə qədəm qoyub. Ölkəmizin siyasi, iqtisadi, hərbi və sosial həyatında baş verən dəyişikliklər, Qarabağın və Şərqi Zəngəzurun dirçəlişi, regionda formalaşan yeni reallıqlar partiyanın tarixi missiyasını daha da genişləndirib. YAP artıq təkcə Azərbaycan daxilində deyil, beynəlxalq miqyasda da özünün güclü imzası olan siyasi platformadır.
33 il – insan ömrü üçün bəzən bir nəsil deməkdir. Amma dövlətçilik üçün bu, həm yetkinlik, həm də yenilənmə mərhələsidir. Bu illər ərzində partiyanın hər bir üzvü öz əməli ilə bu tarixin bir hissəsinə çevrilib; kimsə siyasi fəaliyyətlə, kimsə maarifçiliklə, kimsə sadəcə dövlətinə və millətinə sədaqəti ilə bu yolda addımlayıb. Elə buna görə də YAP-ın gücü rəhbərliklə birgə bütöv bir xalqın iradəsindədir. Bu günün ən böyük mənası da budur: partiya sadəcə keçmişini anmır, həm də gələcəyin konturlarını müəyyənləşdirir. Gələcək isə bu gün üçün verdiyimiz qərarlardan, göstərdiyimiz səylərdən, qoruduğumuz dəyərlərdən başlayır. Azərbaycan inkişaf etdikcə, YAP da inkişaf edir; dövlət gücləndikcə, partiya da güclənir; xalq irəli getdikcə, YAP-ın qarşısında yeni fəaliyyət sahələri açılır.
Bu gün 33 yaşını qeyd edən Yeni Azərbaycan Partiyası yalnız zəngin tarixi ilə deyil, həm də böyük perspektivləri ilə öyünür. Və bu yolun davamı bundan sonra da xalqın etimadı, birliyi və dövlətçilik məfkurəsinə sadiqlik üzərində qurulacaq. Bu gün münasibətilə bütün partiya üzvlərini təbrik edir, xalqımıza və dövlətimizə xidmət yolunda yeni uğurlar arzulayıram.

Sahibə İbadlı
YAP İmişli rayon təşkilatının məsləhətçisi

Paylaş:

Baxılıb: 404 dəfə