Güclü dövlət – güclü idman strategiyasının parlaq ifadəsi

Bakı:

12 °C

76 %

5 m/s

Əlaqə

AZ RU EN

Ana səhifə / YAP xəbərləri / Güclü dövlət – güclü idman strategiyasının parlaq ifadəsi

Güclü dövlət – güclü idman strategiyasının parlaq ifadəsi

30.12.2025 [20:47]

Əli Paşayev

YAP Tərtər rayon təşkilatının məsləhətçisi

2025-ci ilin idman yekunlarına həsr olunmuş mərasim Azərbaycan Respublikasının ictimai-siyasi həyatında mühüm hadisə kimi yadda qaldı. Bu tədbir təkcə bir ilin idman nəticələrinin təqdimatı deyil, eyni zamanda ölkədə idmanın inkişafına yönəlmiş dövlət siyasətinin mahiyyətinin, prioritetlərinin və gələcək perspektivlərinin geniş ictimaiyyətə çatdırılması baxımından xüsusi əhəmiyyət daşıyırdı. Azərbaycan Respublikasının Prezidenti, Milli Olimpiya Komitəsinin Prezidenti İlham Əliyevin mərasimdəki çıxışı məhz bu baxımdan proqram xarakteri daşıyan, strateji düşüncəyə əsaslanan və milli maraqlara xidmət edən mühüm bir nitq oldu.

Prezident İlham Əliyev çıxışında 2025-ci ilin Azərbaycan idmanı üçün son dərəcə uğurlu və məhsuldar il olduğunu vurğuladı. Dövlət başçısı qeyd etdi ki, idmançılarımız il ərzində beynəlxalq yarışlarda, dünya və Avropa çempionatlarında, nüfuzlu turnirlərdə yüzlərlə dəfə fəxri kürsüyə qalxaraq Azərbaycan bayrağını ucaltdılar. Qazanılan çoxsaylı medallar ölkəmizin idman potensialını, idmançılarımızın peşəkarlığını və məşqçi heyətinin yüksək səviyyədə fəaliyyətini bir daha nümayiş etdirdi.

Prezident İlham Əliyev xüsusi olaraq bildirdi ki, bu nəticələr təsadüfi deyil. Onlar uzun illər ərzində həyata keçirilən ardıcıl və məqsədyönlü dövlət siyasətinin, idman sahəsinə ayrılan diqqət və qayğının, yaradılan şəraitin real nəticəsidir. Azərbaycan idmanının beynəlxalq nüfuzu məhz bu sistemli yanaşma sayəsində ildən-ilə daha da güclənir.

Prezident İlham Əliyevin çıxışında idmanın dövlət siyasətində tutduğu yer geniş şəkildə izah olundu. Dövlət başçısı vurğuladı ki, idman Azərbaycanda sadəcə fiziki fəaliyyət və ya yarış anlayışı ilə məhdudlaşmır. İdman cəmiyyətin sağlamlaşdırılması, gənclərin düzgün tərbiyəsi, sosial həmrəyliyin möhkəmləndirilməsi və milli ideologiyanın təbliği baxımından mühüm vasitədir.

Çıxışda xüsusi yer tutan mövzulardan biri gənclərin sağlam həyat tərzinə cəlb olunması oldu. Prezident İlham Əliyev bildirdi ki, idmanın əsas məqsədlərindən biri sağlam, vətənpərvər və intellektual gənc nəslin formalaşdırılmasıdır. Bu gün idmana cəlb olunan gənclər sabah cəmiyyətin aparıcı qüvvəsinə çevrilir, dövlətin sosial və iqtisadi inkişafında fəal iştirak edirlər.

Prezident İlham Əliyev çıxışında idmanın mənəvi və ideoloji əhəmiyyətinə də geniş toxundu. O bildirdi ki, idmançılarımız beynəlxalq arenalarda Azərbaycan bayrağını qaldırdıqda bu, bütün xalq üçün böyük qürur mənbəyinə çevrilir. Hər bir qələbə Azərbaycanın müstəqil, güclü və nüfuzlu dövlət olduğunu dünyaya nümayiş etdirir.

Mərasim çərçivəsində yüksək nəticələr əldə etmiş idmançılar, məşqçilər və idman xadimləri dövlət tərəfindən təltif olundu. Prezident İlham Əliyev vurğuladı ki, idmançıların zəhməti daim yüksək qiymətləndirilməlidir. Orden və medallar, fəxri adlar, mükafatlar və mənzil təminatı idmana göstərilən real və davamlı dövlət qayğısının bariz nümunəsidir.

Çıxışının sonunda Prezident İlham Əliyev gələcək dövr üçün əsas vəzifələri və hədəfləri də açıqladı. O bildirdi ki, Azərbaycan idmanı qarşıdakı illərdə də beynəlxalq arenalarda yüksək nəticələr göstərməli, yeni çempionlar yetişdirməlidir. Bunun üçün idarəetmədə müasir yanaşmalar tətbiq ediləcək, məşqçi hazırlığı gücləndiriləcək və idman elminin nailiyyətlərindən daha geniş istifadə olunacaq.

Prezidentin sözlərinə görə, əsas məqsəd yalnız medalların sayını artırmaq deyil, idmanı həyat tərzinə çevirmək, sağlam cəmiyyət formalaşdırmaq və Azərbaycanın idman gücünü uzunmüddətli perspektivdə qoruyub saxlamaqdır.

Prezident İlham Əliyevin 2025-ci ilin idman yekunlarına həsr olunmuş mərasimdəki çıxışı Azərbaycan idmanının inkişaf yolunu, dövlətin bu sahəyə verdiyi əhəmiyyəti və gələcəyə hesablanmış strateji baxışını aydın şəkildə ortaya qoydu. Bu çıxış bir daha sübut etdi ki, idman Azərbaycanda təsadüfi deyil, güclü siyasi iradəyə əsaslanan dövlət siyasətinin mühüm tərkib hissəsidir. Məhz bu siyasət sayəsində Azərbaycan idmanı bu gün regionda və dünyada nüfuzlu mövqeyə malikdir və qarşıdakı illərdə də yeni qələbələrə imza atacaq.

Paylaş:

Baxılıb: 243 dəfə