Azərbaycan–Özbəkistan müttəfiqliyi: strateji tərəfdaşlıqdan yeni inkişaf mərhələsinə

Bakı:

20 °C

68 %

2 m/s

Əlaqə

AZ RU EN

Ana səhifə / YAP xəbərləri / Azərbaycan–Özbəkistan müttəfiqliyi: strateji tərəfdaşlıqdan yeni inkişaf mərhələsinə

Azərbaycan–Özbəkistan müttəfiqliyi: strateji tərəfdaşlıqdan yeni inkişaf mərhələsinə

24.08.2026 [13:57]

Azərbaycan Prezidenti İlham Əliyevin 21 avqust 2026-cı ildə Özbəkistanın Milli
İnformasiya Agentliyinə verdiyi müsahibə iki qardaş ölkə arasında münasibətlərin
bugünkü mənzərəsini və gələcək perspektivlərini əhatə edən mühüm siyasi mesajlarla
zəngindir. Müsahibə Azərbaycan–Özbəkistan əlaqələrinin sadəcə ikitərəfli əməkdaşlıq
çərçivəsində deyil, daha geniş regional və beynəlxalq müstəvidə strateji əhəmiyyət
daşıdığını bir daha nümayiş etdirdi.
Prezident İlham Əliyevin müsahibəsində xüsusi vurğuladığı əsas məqamlardan biri
Azərbaycan və Özbəkistan arasında münasibətlərin ən yüksək – müttəfiqlik səviyyəsinə
yüksəlməsidir. Bu münasibətlərin təməlində ortaq tarix, dil, mədəniyyət, mənəvi dəyərlər
və xalqlarımız arasında əsrlər boyu formalaşmış qarşılıqlı rəğbət dayanır. Dövlətlərarası
münasibətlərin belə möhkəm mənəvi-siyasi baza üzərində inkişaf etməsi onların davamlı
və uzunmüddətli xarakterini şərtləndirir.
Son illərdə Azərbaycan və Özbəkistan rəhbərləri arasında qarşılıqlı səfərlərin və
siyasi təmasların intensivləşməsi də bu münasibətlərin dinamikliyini göstərir. Prezident
İlham Əliyev Özbəkistan Prezidenti Şavkat Mirziyoyevlə dostluq, qarşılıqlı hörmət və
etimadın iki ölkə arasındakı əlaqələrin möhkəmlənməsində xüsusi rol oynadığını qeyd
edib. 2024-cü ildə Azərbaycanın Özbəkistana dövlət səfəri, 2025-ci ildə isə Özbəkistan
Prezidentinin Azərbaycana dövlət səfəri zamanı imzalanmış strateji sənədlər müttəfiqlik
münasibətlərinin hüquqi və siyasi əsaslarını daha da gücləndirib.
Münasibətlərin mühüm dayaqlarından biri iqtisadi əməkdaşlıqdır. Müsahibədə
səsləndirilən rəqəmlər Azərbaycan–Özbəkistan iqtisadi əlaqələrinin sürətlə genişləndiyini
göstərir. 2025-ci ildə iki ölkə arasında ticarət dövriyyəsi 795 milyon dollara çatıb. 2026-
cı ilin ilk beş ayında isə ticarət dövriyyəsi əvvəlki ilin müvafiq dövrü ilə müqayisədə 33
faiz artaraq 144 milyon dollar təşkil edib. 500 milyon dollarlıq Azərbaycan–Özbəkistan
İnvestisiya Şirkətinin fəaliyyəti də qarşılıqlı sərmayələrin artırılması üçün mühüm imkan
yaradır.
İqtisadi münasibətlər nəqliyyat və logistika sahəsində əməkdaşlıqla da tamamlanır.
İki ölkə arasında tranzit daşımalarının artması Azərbaycan və Özbəkistanın Şərqlə Qərb
arasında formalaşan yeni nəqliyyat xəritəsində mövqeyini gücləndirir.

Çin–Qırğızıstan–Özbəkistan dəmir yolu layihəsinin Orta Dəhliz və TRIPP ilə
inteqrasiyası isə gələcəkdə regionun tranzit potensialını daha da artırmaq imkanına
malikdir.
Yaşıl enerji sahəsində əməkdaşlıq da xüsusi əhəmiyyət daşıyır. Azərbaycan,
Qazaxıstan və Özbəkistan arasında yaradılmış “Yaşıl Dəhliz Birliyi” gələcəkdə
bərpaolunan enerjinin ixracı və Xəzər dənizinin dibi ilə nəqli kimi strateji layihələrin
həyata keçirilməsinə xidmət edə bilər. Bu istiqamət yalnız enerji təhlükəsizliyi deyil, həm
də regionun dayanıqlı inkişafı baxımından mühüm perspektivlər açır.
Azərbaycan–Özbəkistan münasibətlərinin daha bir mühüm istiqaməti mədəni-
humanitar əməkdaşlıqdır. Mədəniyyət günləri, təhsil proqramları, media və QHT
forumları, qardaşlaşmış şəhərlər və digər layihələr xalqlarımızın bir-birinə daha da
yaxınlaşmasına xidmət edir. Füzulidə Özbəkistanın təşəbbüsü ilə inşa edilən Mirzə
Uluqbəy adına məktəb isə iki ölkə arasındakı qardaşlığın konkret nümunələrindən biridir.
Müsahibədə Türk Dövlətləri Təşkilatının roluna da geniş yer ayrılıb. Azərbaycan
və Özbəkistanın TDT çərçivəsində əməkdaşlığı türk dünyasında siyasi, iqtisadi və
mədəni inteqrasiyanın dərinləşməsinə mühüm töhfə verir. Azərbaycanın Mərkəzi Asiya
Dövlət Başçılarının Məşvərət görüşlərində tamhüquqlu iştirak etməsi isə regional
əməkdaşlığın coğrafiyasını genişləndirən mühüm hadisədir. Beləliklə, əvvəllər “C5”
formatında olan əməkdaşlığın faktiki olaraq “C6” formatına keçməsi Azərbaycanın
Mərkəzi Asiya ilə münasibətlərinin strateji əhəmiyyətini bir daha təsdiqləyir.
Prezident İlham Əliyevin müsahibəsi göstərir ki, Azərbaycan–Özbəkistan
münasibətləri artıq ənənəvi dostluq əlaqələrindən daha yüksək mərhələyə yüksəlib. Bu
münasibətlər siyasi etimad, iqtisadi qarşılıqlı fayda, nəqliyyat bağlantıları, enerji
əməkdaşlığı və ortaq mədəni dəyərlərlə möhkəmlənir. Bu gün Azərbaycan və Özbəkistan
yalnız iki qardaş dövlət deyil, eyni zamanda Avrasiya məkanında yeni əməkdaşlıq
imkanlarının formalaşmasına töhfə verən strateji tərəfdaşlardır. Qarşıdakı dövrdə bu
münasibətlərin daha da dərinləşməsi həm iki xalqın rifahına, həm də regionda sülh,
sabitlik və davamlı inkişafın möhkəmlənməsinə mühüm töhfə verəcək.