Azərbaycan-Özbəkistan müttəfiqliyində yeni mərhələ

Bakı:

20 °C

68 %

2 m/s

Əlaqə

AZ RU EN

Ana səhifə / YAP xəbərləri / Azərbaycan-Özbəkistan müttəfiqliyində yeni mərhələ

Azərbaycan-Özbəkistan müttəfiqliyində yeni mərhələ

24.08.2026 [13:58]

Prezident İlham Əliyevin Özbəkistanın Milli İnformasiya Agentliyinə (UzA) rəsmi
müsahibəsi təkcə iki ölkə arasındakı əlaqələrin gələcək inkişaf tempini deyil, həm
də bütövlükdə Türk dünyasının inteqrasiya xəritəsini müəyyən edən strateji bir
sənəd xarakteri daşıyır. Müsahibədə iki ölkə arasında strateji tərəfdaşlığın və
müttəfiqliyin ən yüksək səviyyədə olduğu vurğulanıb. Regional təhlükəsizlik,
nəqliyyat-logistika, energetika və mədəni-humanitar sahələrdə əməkdaşlığın
perspektivləri, həmçinin işğaldan azad edilmiş ərazilərdə bərpa işlərinə
Özbəkistanın töhfəsi xüsusi qeyd edilib. Prezident İlham Əliyev müsahibəsində
Bakı ilə Daşkənd arasındakı qardaşlıq bağlarının tarixi köklərinə toxunub, iqtisadi,
siyasi, nəqliyyat və humanitar sahələrdə mövcud olan genişmiqyaslı tərəfdaşlığın
gələcək perspektivlərini diqqətə çatdırıb.
Müsahibədə xüsusi vurğulanan əsas məqamlardan biri Azərbaycan və Özbəkistan
münasibətlərinin hazırda özünün ən yüksək zirvəsinə - müttəfiqlik səviyyəsinə
çatmasıdır. Dövlət başçısı qeyd edib ki, iki qardaş xalq arasında əlaqələr ortaq dil,
mədəniyyət, tarix və mənəvi dəyərlərə əsaslanır. Son illərdə reallaşan qarşılıqlı
dövlət səfərlərinin əhəmiyyətini xatırladan Prezident İlham Əliyev imzalanmış
“Strateji tərəfdaşlığın dərinləşdirilməsi haqqında Bəyannamə” və “Müttəfiqlik
münasibətləri haqqında Müqavilə”nin əlaqələrin hüquqi və siyasi sütunlarını
sarsılmaz etdiyini bildirib. Həmçinin 2023-cü ildə təsis edilmiş Ali Dövlətlərarası
Şuranın ikitərəfli əməkdaşlığın idarə olunmasında və layihələrin
sürətləndirilməsində mühüm institusional mexanizmə çevrildiyi xüsusi qeyd edilib.
İqtisadi və geostrateji əməkdaşlıq barədə danışarkən, Prezident İlham Əliyev hər
iki ölkənin yerləşdiyi coğrafiyanın strateji üstünlüklərini önə çıxarıb. Azərbaycanın
Cənubi Qafqazda, Özbəkistanın isə Mərkəzi Asiyada aparıcı mövqeyi ölkələrimizi
Şərqlə Qərbi birləşdirən mühüm marşrutlarda təbii tərəfdaşlara çevirir. Hazırda
siyasi dialoqla bərabər, müştərək fondlar vasitəsilə yeni istehsal sahələrinin
qurulması, Orta Dəhlizin imkanlarının genişləndirilməsi, yükdaşımaların
optimallaşdırılması, bərpa olunan enerji resurslarının inteqrasiyası və aqrar
sektorda təcrübə mübadiləsi kimi böyük layihələr icra olunmaqdadır və gələcəkdə
bu dinamika daha da artacaqdır.
Prezident İlham Əliyev Azərbaycan və Özbəkistanın Türk Dövlətləri Təşkilatı
daxilindəki fəaliyyətinə də geniş yer ayırıb. Hər iki dövlətin TDT daxilindəki aktiv
rolu türk dünyasında siyasi dialoqun, iqtisadi və nəqliyyat imkanlarının bütövlükdə
inkişafına birbaşa töhfə verir. Xalqların bir-birinə daha da yaxınlaşmasında
humanitar bağların və qardaşlaşmış şəhərlər təşəbbüsünün xüsusi rol oynadığını
deyən dövlət başçısı, Özbəkistan Prezidenti Şavkat Mirziyoyevin müdrik rəhbərliyi
ilə həyata keçirilən genişmiqyaslı islahatları, xüsusən də modern şəhərsalmanın

nadir nümunəsi olan “Yeni Daşkənd” layihəsini yüksək qiymətləndirib, ölkənin
kompleks inkişaf tempinin dərin məmnunluq doğurduğunu ifadə edib.
Prezident İlham Əliyevin Özbəkistan mətbuatına verdiyi bu dolğun müsahibə,
rəsmi Bakının Mərkəzi Asiya regionuna, xüsusilə də qardaş Özbəkistana verdiyi
böyük strateji dəyərin növbəti nümayişidir.

Əlişah Rəcəbov
YAP Ağdaş rayon təşkilatının sədri

Paylaş:

Baxılıb: 259 dəfə