Lerik sakinləri bu seçkilərdə də YAP-ın namizədlərinə etimad göstərəcəklər

Bakı:

18°C

72%

1m/s

Əlaqə

AZ RU EN

Ana səhifə / YAP xəbərləri / Lerik sakinləri bu seçkilərdə də YAP-ın namizədlərinə etimad göstərəcəklər

Lerik sakinləri bu seçkilərdə də YAP-ın namizədlərinə etimad göstərəcəklər

06.12.2014 [12:51]

Respublikanın bütün şəhər və rayonlarında olduğu kimi, Yeni Azərbaycan Partiyası (YAP) Lerik rayon təşkilatında da bələdiyyə üzvlüyünə YAP tərəfindən irəli sürülmüş namizədlərlə görüş keçirilib. Dünən baş tutan tədbirdə YAP Siyasi Şurasının üzvü, Milli Məclisin Sosial siyasət komitəsinin sədri Hadi Rəcəbli, YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə, Milli Məclisin deputatı İqbal Məmmədov və YAP Mərkəzi Aparatının məsul əməkdaşı Məcid Əhmədov iştitak edib.
Tədbiri YAP Lerik rayon təşkilatının sədri Elxan Qəmbərov açaraq rayon təşkilatı tərəfindən görülən işlər barədə məlumat verib: “78 saylı Lerik Dairə Seçki Komissiyası üzrə rayonda fəaliyyət göstərən 29 bələdiyyəyə tərəfimizdən 368 nəfər YAP üzvünün namizədliyi irəli sürülərək qeydiyyatdan keçib. Bunların da 35,1 faizi qadınlar, 40,2 faizi isə gənclərdir. Hesab edirik ki, Yeni Azərbaycan Partiyası hər seçkilərdə olduğu kimi bu seçkidə də xalqına arxalanaraq böyük qələbə qazanacaq”.
Daha sonra çıxış edən YAP Siyasi Şurasının üzvü, Milli Məclisin Sosial siyasət komitəsinin sədri Hadi Rəcəbli bildirib ki, son 11 ildə Azərbaycan iqtisadi cəhətdən böyük inkişaf yolu keçərək bu gün dünyanın inkişaf etmiş dövlətləri ilə bir sırada addımlayır: “Əlbəttə ki, bu inkişafın memarı Azərbaycan xalqının Ümummilli lideri Heydər Əliyev və Onun layiqli davamçısı Prezident İlham Əliyevdir. Bu gün Prezidentimizin Sədri olduğu Yeni Azərbaycan Partiyasının fəaliyyəti də məhz dövlətimizin daha da inkişafına, xalqımızın daha yaxşı yaşamasına yönəlib. Ona görə də partiyamızın fəaliyyəti Azərbaycan xalqı tərəfindən yüksək qiymətləndirilir, dəstəklənir. Biz inanırıq ki, bu bələdiyyə seçkilərində də seçicilər YAP-ın namizədlərinə səs verməklə, ölkəmizin inkişafına növbəti töhfəsini verəcəklər”.
YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə çıxışında tədbir iştirakçılarına bələdiyyələrin keçdiyi inkişaf yolundan, hüquqi bazanın yaranmasından geniş söhbət açıb: “1995-ci ildə müstəqil respublikamızın ilk Konstitusiyası referendum yolu ilə qəbul olunduqdan sonra həmin sənəddə mülkiyyətin bölünməsi, hakimiyyətin formalarının müəyyənləşdirilməsi və yerli özünüidarəetmənin təşkili məsələləri əksini tapdı. Həmin dövrdən başlayaraq cəmiyyətimizdə yeni bir idarəetmə institutunun yaradılması ideyası ortaya çıxdı. O dövrdə Milli Məclisdə yaradılan daimi komissiyalardan biri yerli özünüidarəetmə məsələləri daimi komissiyası idi. Həmin komissiyada ilk olaraq gələcəkdə bələdiyyələrin təşkil olunması, onun fəaliyyətinin hüquqi tənzimlənməsi üçün müvafiq bazanın formalaşdırılması istiqamətində qanunlar, normativ hüquqi sənədlər hazırlanmağa başlandı. 1999-cu ilə qədər bu proses davam etdi və 1999-cu ildə respublikamızda ilk dəfə olaraq bələdiyyə seçkiləri keçirildi”.
Ötən dövr ərzində bələdiyyələrin böyük təcrübə əldə etdiyini diqqətə çatdıran Vüqar Rəhimzadə əminliklə vurğulayıb ki, bu seçkilərdən sonra formalaşacaq bələdiyyələr daha effektiv və səmərəli fəaliyyəti ilə dövlətimizin inkişafı prosesində layiqli yer alacaq.
Milli Məclisin deputatı İqbal Məmmədov çıxış edərək Azərbaycanın demokratik inkişaf yolunda dinamik addımlarla irəlilədiyini bildirib.
Son olaraq tədbir iştirakçıları çıxış edərək yalnız Yeni Azərbaycan Partiyasına güvəndiklərini, bundan sonra da alternativi olmayan YAP-a səs verəcəklərini bildiriblər.

Paylaş:

Baxılıb: 865 dəfə