Azərbaycan ictimaiyyətinin seçimi Yeni Azərbaycan Partiyasıdır

Bakı:

12 °C

76 %

9 m/s

Əlaqə

AZ RU EN

Ana səhifə / YAP xəbərləri / Azərbaycan ictimaiyyətinin seçimi Yeni Azərbaycan Partiyasıdır

Azərbaycan ictimaiyyətinin seçimi Yeni Azərbaycan Partiyasıdır

16.12.2014 [10:57]

YAP Balakən rayon təşkilatında təbliğat-təşviqat kampaniyası çərçivəsində partiya fəalları və bələdiyyə üzvlüyünə namizədlərlə görüş keçirilib
Yeni Azərbaycan Partiyası (YAP) Balakən rayon təşkilatında təbliğat-təşviqat kampaniyası çərçivəsində partiya fəalları və bələdiyyə üzvlüyünə namizədlərlə görüş keçirilib. Tədbirdə Milli Məclisin deputatı Kamilə Əliyeva, “Yeni Azərbaycan” qəzetinin baş redaktoru Hikmət Babaoğlu, YAP Mərkəzi Aparatının məsul işçisi Emil Abbasov iştirak ediblər.
Tədbiri giriş sözü ilə YAP Balakən rayon təşkilatının sədri Azad Balayev açaraq bələdiyyə seçkiləri ilə bağlı görülən işlər, həyata keçirilən təbliğat kampaniyası barədə məlumat verib.
Millət vəkili Kamilə Əliyeva çıxışında qeyd edib ki, Yeni Azərbaycan Partiyası Azərbaycanın milli maraqlarına xidmət edən çoxşaxəli fəaliyyətə malikdir: “Ümummilli lider Heydər Əliyevin qurucusu olduğu YAP cəmiyyətdə üstün nüfuza malikdir. Xüsusilə də ölkəmizdə həyata keçirilən gənclər siyasətinin fonunda Yeni Azərbaycan Partiyası da gənclərə xüsusi diqqət göstərir. Builki bələdiyyə seçkilərində də gənclər və qadınlar üstünlük təşkil edir. Partiyamızın əldə edəcəyi qələbədə qadınlar və gənclərin fəallığı özünəməxsus rol oynayacaq”.
“Yeni Azərbaycan” qəzetinin baş redaktoru Hikmət Babaoğlu çıxışında bələdiyyə üzvlüyünə namizədlərə bələdiyyələrin formalaşması, yerli özünü idarəetmə orqanlarının strukturu, bələdiyyə və dövlət arasında qarşılıqlı anlaşmanın mahiyyəti barədə məlumatları çatdırıb. Natiq daha sonra hər bir namizədin əhali arasında hansı formada təbliğat aparmalı olduğunu siyasi və hüquqi nöqteyi-nəzərdən izah edib.
Hikmət Babaoğlu əlavə edib ki, YAP sahib olduğu resurslarla Azərbaycan siyasi sisteminin alternativsiz siyasi güc mərkəzidir: “YAP-ın 22 illik tarixi var və cəmiyyətə təqdim etdiyi dəyərlər, məqsədlər artıq siyasi ənənə kimi səciyyələndirə biləcəyimiz ideoloji tezislər vasitəsilə Azərbaycan xalqı tərəfindən mənimsənilib. Ona görə də, dekabrın 23-də keçiriləcək bələdiyyə seçkilərində də YAP-ın namizədləri qələbə qazanacaqlar”.
Yeni Azərbaycan Partiyası Balakən rayon təşkilatının Seçki Qərargahının üzvü, Balakən rayon Heydər Əliyev Mərkəzinin direktoru Leyla Qarayeva deyib ki, builki bələdiyyə seçkilərində namizədlər arasında gənclərin və qadınların üstünlük təşkil etməsi təqdirəlayiq haldır.
YAP Balakən rayon təşkilatı Gənclər Birliyinin sədri Səbuhi Alqayev çıxış edərək deyib ki, partiya tərəfindən bələdiyyələrə namizədliyi irəli sürülmüş şəxslər öz intellektinə, aktiv ictimai fəaliyyətinə görə fərqlənirlər.
Talalalar kənd bələdiyyəsi üzvlüyünə namizəd Nurlan Əhmədov çıxış edərək dövlətimizin regionların inkişafı istiqamətində gördüyü işləri diqqətə çatdırıb, belə bir pozitiv şəraitdə bələdiyyə üzvü seçilərsə, öz bilik və bacarığından istifadə edərək səmərəli fəaliyyət göstərəcəyini vurğulayıb.
Yeni Azərbaycan Partiyasının üzvü Lalə Yolçuyeva yaşıdlarının şəhər bələdiyyəsi üzvlüyünə namizədliyi irəli sürüldüyü üçün Yeni Azərbaycan Partiyasının rəhbərliyinə öz minnətdarlığını bildirib. O deyib ki, partiyamızın gənclərə göstərdiyi bu etimad daim özünü doğruldacaq.
“Seçkilərdə iştirakdan qürur hissi keçirirəm”. Bunu isə bələdiyyə seçkilərində ilk dəfə səs verəcək gənc Pərvanə İsayeva vurğulayıb.
Tədbirin sonunda partiya sıralarına qoşulmuş bir qrup gəncə Yeni Azərbaycan Partiyasının üzvlük vəsiqəsi təqdim edilib.
Nurlan QƏLƏNDƏRLİ

Paylaş:

Baxılıb: 879 dəfə