Yeni Azərbaycan Partiyası gəncliyin inkişafına xüsusi diqqət və qayğı göstərir

Bakı:

11 °C

87 %

8 m/s

Əlaqə

AZ RU EN

Ana səhifə / YAP xəbərləri / Yeni Azərbaycan Partiyası gəncliyin inkişafına xüsusi diqqət və qayğı göstərir

Yeni Azərbaycan Partiyası gəncliyin inkişafına xüsusi diqqət və qayğı göstərir

28.02.2015 [13:14]

YAP Siyəzən rayon təşkilatı Gənclər Birliyinin hesabat-seçki konfransı keçirilib
Dünən Yeni Azərbaycan Partiyası (YAP) Siyəzən rayon təşkilatı Gənclər Birliyinin hesabat-seçki konfransı keçirilib. Konfransda “Yeni Azərbaycan” qəzetinin baş redaktoru Hikmət Babaoğlu, YAP Mərkəzi Aparatının məsul işçisi Araz Xudadanov iştirak ediblər. Öncə konfrans iştirakçıları Azərbaycan xalqının Ümummilli lideri Heydər Əliyevin abidəsini ziyarət ediblər.
Tədbiri giriş sözü ilə YAP Siyəzən rayon təşkilatının sədri Etibar Heydərov açaraq Azərbaycanda nümunəvi gənclər siyasətinin həyata keçirildiyini qeyd edib. Yeni Azərbaycan Partiyasının gənclərə xüsusi diqqət və qayğı göstərdiyini deyən E.Heydərov YAP Gənclər Birliyinin yaranma tarixindən və onun gördüyü işlərdən, qazandığı nailiyyətlərdən danışıb.
Daha sonra YAP Siyəzən rayon təşkilatının Gənclər Birliyinin sədri Rəşad Rəhmanov hesabat məruzəsi ilə çıxış edib. R.Rəhmanov hesabat dövrü ərzində görülən işlər, keçirilən tədbirlər və qarşıda duran vəzifələr haqqında konfrans iştirakçılarına geniş məlumat verib. Qeyd edib ki, YAP Siyəzən rayon təşkilatının 3399 nəfər üzvünün 930 nəfərini gənclər təşkil edir.
Hesabat məruzəsi dinlənildikdən sonra məruzə ətrafında çıxış edən partiya fəallarından Ramilə Seyidova, Şəms Hüseynova və YAP Siyəzən rayon təşkilatının aparat rəhbəri İxtiyar İsayev ölkədə həyata keçirilən gənclər siyasətindən, gənclərin bütün təbəqələrinin hərtərəfli inkişafından söz açıblar. Bildirilib ki, gənclər bu gün dövlət idarəçiliyində, parlamentdə, bələdiyyələrdə, biznes strukturlarında, ümumiyyətlə, müxtəlif sahələrdə uğurla təmsil olunur və milli inkişafa öz töhfələrini verirlər.
“Yeni Azərbaycan” qəzetinin baş redaktoru Hikmət Babaoğlu isə vurğulayıb ki, müasir, müstəqil Azərbaycanın intensiv inkişafını təmin edən fundamental faktorlardan birini də cəmiyyətin ən dinamik təbəqəsi qismində çıxış edən gənclərin potensialından səmərəli istifadə olunması təşkil edir: “Dövlət başçısının gənclər siyasəti ilə bağlı imzaladığı proqramların əhatəliliyini, onların gənclərlə bağlı ən müxtəlif sahələrdə görüləcək işləri əks etdirməsini və yüksək səviyyədə icrasını nəzərə aldıqda, Azərbaycanda gəncliyə və gənclərə, həqiqətən də, böyük önəm verildiyi bir daha aydın olur. Xüsusi olaraq qeyd etmək lazımdır ki, bu gün Azərbaycanda yüksək intellektual səviyyəyə, vətənpərvərlik hissinə, milli düşüncəyə malik gənclər formalaşır. Azərbaycan gəncləri gündən-günə ölkənin ictimai-siyasi həyatında daha böyük rol oynayır. Hazırda respublikada mövcud olan yüzlərlə qeyri-hökumət və gənclər təşkilatlarının aktiv fəaliyyəti dövlətin yaratdığı şərait sayəsində mümkün olub. Məhz dövlətin gənclərə dəstək və diqqət göstərməsinin nəticəsində Azərbaycan gəncliyində özünə, öz gücünə, istedadına inam hissi artıb”.
H.Babaoğlu vurğulayıb ki, YAP, o cümlədən, partiyanın Gənclər Birliyi gənclərin fəallığına, onların potensialından səmərəli istifadə olunmasına xüsusi diqqət yetirir. Azərbaycan gəncliyinin inkişafının dövlətin diqqət mərkəzində olduğunu deyən baş redaktor əlavə edib ki, gənclərin intellektual, fiziki və mənəvi inkişafını, ölkənin sosial-iqtisadi, ictimai-siyasi və mədəni həyatında fəal iştirakını təmin etmək məqsədi ilə Azərbaycan Respublikasının Prezidenti İlham Əliyev tərəfindən “2015-2025-ci illərdə Azərbaycan gənclərinin İnkişaf Strategiyası”nın təsdiq edilməsi haqqında Sərəncamın imzalanması bu kontekstdə müstəsna əhəmiyyət kəsb edir. Bu istiqamətdə başlıca strateji hədəf gənclərin hərtərəfli inkişafını və onların cəmiyyətin həyatında fəal iştirakını təmin etməkdir.
Konfransın sonunda təşkilati məsələlərə baxılıb. YAP Siyəzən rayon təşkilatının Gənclər Birliyinin 21 nəfərdən ibarət Şurası, 9 nəfərdən ibarət idarə heyəti seçilib. Rəşad Rəhmanov YAP Siyəzən rayon təşkilatının Gənclər Birliyinin sədri, Şadil Heydərli və Şəms Hüseynova isə sədr müavinləri seçiblər.
Nurlan QƏLƏNDƏRLİ

Paylaş:

Baxılıb: 1003 dəfə