YAP Prezident İlham Əliyevin rəhbərliyi altında daim inkişaf edir

Bakı:

14°C

77%

3m/s

Əlaqə

AZ RU EN

Ana səhifə / YAP xəbərləri / YAP Prezident İlham Əliyevin rəhbərliyi altında daim inkişaf edir

YAP Prezident İlham Əliyevin rəhbərliyi altında daim inkişaf edir

20.11.2015 [10:07]

Partiyanın yaranmasının 23-cü ildönümü münasibətilə Salyan rayonunda tədbir keçirilib
Dünən Yeni Azərbaycan Partiyasının (YAP) yaranmasının 23-cü ildönümü münasibətilə Salyan rayonunda geniş tədbir keçirilib. Rayon İcra Hakimiyyəti başçısı Tahir Kərimov, millət vəkilləri Əliağa Hüseynov, Fəzail Ağamalı, eləcə də rayon ictimaiyyətinin nümayəndələrinin iştirak etdikləri tədbirin iştirakçıları öncə Ümummilli lider Heydər Əliyevin abidəsini ziyarət ediblər, abidənin önünə gül dəstələri qoyulub.
Daha sonra tədbiri giriş sözü ilə açan YAP Salyan rayon təşkilatının sədri Rəşad Cəbrayılov tədbir iştirakçılarını partiyanın yaranmasının 23-cü ildönümü münasibətilə təbrik edib. Ötən 23 il ərzində YAP-ın şərəfli yol keçdiyini deyən R.Cəbrayılov 1990-cı illərin əvvəlində Azərbaycandakı siyasi vəziyyətdən danışıb. Bildirib ki, 1991-1993-cü illər ərzində hakimiyyətdə olan səriştəsiz qüvvələrin yanlış siyasəti ölkədə xaos və hərc-mərcliyin yaranmasına yol açdı, Azərbaycanın dövlət müstəqilliyi itirilmə təhlükəsi ilə qarşı-qarşıya qaldı. Natiq qeyd edib ki, məhz həmin dövrdə Azərbaycan xalqı ölkəmizin xilası üçün Ulu öndər Heydər Əliyevə üz tutdu. 91 ziyalının imzası ilə YAP-ın yaradılması və Ümummilli liderin bu siyasi təşkilata rəhbərlik etməsi ilə bağlı müraciəti Ulu öndər Heydər Əliyev müsbət cavabladı. Ulu öndər Heydər Əliyevin yaratdığı YAP müasir Azərbaycanın inkişafının əsas dəstəkçisinə çevrildi. R.Cəbrayılov bildirib ki, partiyamız hər zaman milli maraqların keşiyində dayanıb və Prezident İlham Əliyevin rəhbərliyi ilə daim inkişaf edir.
Daha sonra çıxış edən millət vəkili Əliağa Hüseynov qeyd edib ki, YAP-ın yaranması tarixi zərurətdən irəli gəlib. Bildirilib ki, bu gün YAP nəinki bölgənin, eyni zamanda, regionun ən mütəşəkkil siyasi təşkilatıdır: “İnanıram ki, gənc nəsil Ulu öndər Heydər Əliyev tərəfindən əsası qoyulan və Prezident Əliyev tərəfindən uğurla davam etdirilən, özündə milli maraqlarımızı ehtiva edən siyasi kursun ətrafında birmənalı şəkildə birləşəcək və dövlətimizin daha da inkişaf etməsi üçün var gücü ilə çalışacaq. Prezidentimizin rəhbərliyi ilə nail olduğumuz uğurlar davam edəcək və bizlər də dayanmamalıyıq, ildən-ilə daha böyük uğurlar üçün çalışmalı, Prezidentimizin ətrafında sıx birləşməliyik”.
Çıxış edən millət vəkili Fəzail Ağamalı bildirib ki, YAP yarandığı illərdə ölkəmiz dərin siyasi-iqtisadi böhran içində idi. Cəmi 23 il ərzində Azərbaycan dövlətinin bugünkü inkişafı ilə hər kəsi təəccübləndirdiyini söyləyən F.Ağamalı qeyd edib ki, bu nailiyyətlərə müharibə şəraitində olan bir dövlətin imza atması böyük uğurdur: “Bu gün yaranmasının 23-cü ildönümü qeyd edilən YAP-ın ölkəmizin inkişafında müstəsna xidmətləri var. Mən əminəm ki, Ulu öndər Heydər Əliyev siyasi kursunun uğurlu davamçısı Prezident İlham Əliyevin rəhbərliyi ilə Azərbaycan dövləti daha böyük uğurlara imza atacaq”.
Tədbirdə çıxış edən Salyan rayon İcra Hakimiyyətinin başçısı Tahir Kərimov tədbir iştirakçılarını təbrik edib. YAP-ın yarandığı dövrün siyasi keşməkeşlərə təsadüf etdiyini vurğulayan T.Kərimov bildirib ki, YAP qurulmasından cəmi bir neçə ay sonra iqtidar partiyasına çevrildi. 1993-cü ilin iyun ayında ölkədə yaranan vətəndaş qarşıdurmasının pik nöqtəyə çatdığını söyləyən rayon İcra Hakimiyyətinin başçısı deyib ki, xalqımız ölkəni düşdüyü bu dərin böhrandan yalnız Heydər Əliyevin xilas edəcəyini bilərək ayağa qalxdı və Ulu öndərin yenidən hakimiyyətə qayıtmasını tələb etdi: “Xalqımız bilirdi ki, Ulu öndər Heydər Əliyev Azərbaycanı düşdüyü bu çətin vəziyyətdən çıxaracaq yeganə şəxsiyyətdir. Məhz Ulu öndərimiz vətəndaş müharibəsinin qarşısını aldı. Sonrakı dövrdə Ulu öndər Heydər Əliyev ölkəmizdə siyasi sabitliyin bərqərar olmasına nail oldu. Milli Konstitusiyamızın qəbulu isə ölkədə hüquqi dövlət quruculuğu prosesinin daha da inkişaf etdirilməsinə zəmin yaratdı. İmzalanan “Əsrin müqaviləsi” Azərbaycanın iqtisadi inkişafının, qüdrətli gələcəyinin qarantına çevrildi. Ulu öndər Heydər Əliyev müstəqil Azərbaycanın tarixində 10 il ərzində 50 ildən artıq bir dövrün işini gördü, dövlətimizi gücləndirdi. Bu gün isə Ulu öndərimizin siyasətini uğurla davam və inkişaf etdirən, müasir dövlətçiliyimizin yeni mərhələsinin başlanğıcını qoymuş möhtərəm Prezidentimiz İlham Əliyevin yürütdüyü siyasət milli maraqlarımızın qorunmasına, ölkəmizin daha da güclənməsinə xidmət edir. Bütün Azərbaycan xalqı inanır ki, Prezident İlham Əliyevin rəhbərliyi ilə həyata keçirilən inkişaf siyasəti ölkəmizi daha böyük qələbələrə aparacaq, daha da firavan gələcəyə daşıyacaq”.
Daha sonra partiyaya qəbul olunan yeni üzvlərə partiya vəsiqələri təqdim olunub. Tədbir geniş konsert proqramı ilə davam etdirilib.
Pərviz SADAYOĞLU

Paylaş:

Baxılıb: 945 dəfə