Gələcək inkişafımız naminə “HƏ” deyək

Bakı:

26 °C

48 %

2 m/s

Əlaqə

AZ RU EN

Ana səhifə / YAP xəbərləri / Gələcək inkişafımız naminə “HƏ” deyək

Gələcək inkişafımız naminə “HƏ” deyək

24.09.2016 [09:44]

Ölkəmiz növbəti dəfə mühüm siyasi-hüquqi proses ərəfəsindədir. Bir neçə gündən sonra - sentyabrın 26-da Azərbaycan Respublikası Konstitusiyasına əlavə və dəyişikliklərlə bağlı ümumxalq səsverməsi (referendum) keçiriləcək. Azərbaycanımızın daha da qüdrətlənməsi, inkişafımızın davamlı olmasını istəyən hər bir ölkə vətəndaşı kimi gənclər də bu referenduma ciddi şəkildə hazırlaşırlar.
Bu əlavə və dəyişiklikləri zəruri edən səbəblərə keçməzdən öncə müstəqil Azərbaycanın ilk Konstitusiyasının qəbulundan ötən müddət ərzində ölkəmizdə milli qanunvericiliyin təkmilləşdirilməsi, insan və vətəndaş hüquq və azadlıqlarının etibarlı təminat mexanizmlərinin formalaşdırılması, xüsusilə də siyasi-hüquqi sistemin liberallaşdırılması istiqamətində atılan addımlar barədə qısa məlumatın verilməsini zəruri hesab edirəm.
Məlum olduğu kimi, Ümummilli lider Heydər Əliyevin rəhbərliyi ilə hazırlanan və 1995-ci il noyabrin 12-də keçirilən ümumxalq səsverməsi (referendum) yolu ilə qəbul edilən Azərbaycan Respublikasının Konstitusiyası dünyanın ən mütərəqqi əsas qanunlarından sayılır. Bununla belə, zamanın tələbindən irəli gələrək, eyni zamanda bir sıra mühüm hüquqi normalara konstitusion status vermək üçün 2002-ci il avqustun 24-də və 2009-cu il martın 18-də keçirilən ümumxalq səsverməsi ilə Konstitusiyaya əlavə və dəyişikliklər edilib.
Lakin dünyada cərəyan edən proseslər, yeni inkişaf tendensiyaları və onların meydana çıxardığı tələblər, ən əsası isə 2009-cu ildə həyata keçirilmiş Konstitusiya islahatından sonra Azərbaycanın ictimai-siyasi həyatında baş vermiş köklü dəyişikliklər növbəti dəfə ölkəmizin Əsas Qanununa bəzi əlavə və dəyişikliklərin edilməsi zərurətini yaratmışdı. Və Prezident İlham Əliyevin 18 iyul tarixində imzaladığı Sərəncama əsasən Konstitusiyada dəyişikliklər edilməsi məqsədilə bu il sentyabrın 26-da ölkəmizdə keçiriləcək ümumxalq səsverməsi də məhz bu zərurətdən irəli gəlir.
Məlumat üçün bildirək ki, səsverməyə çıxarılan Referendum Aktına görə, Konstitusiyanın 23 maddəsinə əlavə və düzəlişlərin edilməsi, habelə yeni 6 maddənin əlavə edilməsi nəzərdə tutulub. Onu da qeyd etmək lazımdır ki, Konstitusiyaya təklif olunan dəyişikliklər bütün vətəndaşların, o cümlədən Azərbaycan gəncliyinin maraq və mənafelərinə uyğundur. Daha dəqiq desək, Konstitusiya islahatları ölkə gəncliyinin inkişafı üçün də geniş imkanlar açır.
Bu imkanlardan danışarkən təklif edilən dəyişikliklər sırasında 85-ci maddənin I hissəsi (“yaşı 25-dən aşağı olmayan” sözləri “seçkilərdə iştirak etmək hüququna malik olan” sözləri ilə əvəz edilsin) və 100-cü maddəsi ilə bağlı dəyişiklik (“yaşı 35-dən aşağı olmayan” sözləri çıxarılsın) üzərində xüsusi olaraq dayanmaq istəyirəm. Çünki hər iki halda söhbət müvafiq olaraq parlament və prezident seçkilərində tətbiq olunan yaş məhdudiyyətinin optimal tənzimlənməsindən gedir ki, bu da gənclərin gələcək inkişafı, qanunverici orqanda, həmçinin dövlət idarəçiliyində daha yaxından iştirakına geniş imkanlar açır.
Məhz bu gerçəkliyi dərk edən gənclər, xüsusilə Yeni Azərbaycan Partiyasının, o cümlədən partiyanın Səbail rayon təşkilatının gənc fəalları Konstitusiya dəyişikliklərinin əhəmiyyətinin cəmiyyətə çatdırılması işində aktivlik nümayiş etdirirlər. İstər müxtəlif görüş və tədbirlərdə, istərsə də sosial şəbəkələrdə Konstitusiyaya təklif olunan əlavə və dəyişikliklərin mahiyyəti və önəminə dair təbliğat işləri aparılır, bu islahat xarakterli dəyişikliklərin ölkəmizin inkişafına xidmət etdiyi diqqətə çatdırılır.
Bir sözlə, Konstitusiya dəyişiklikləri ölkəmizin milli maraqlarına, o cümlədən hər bir vətəndaşın və gənclərin mənafeyinə uyğundur. Ona görə də üzümü gənc seçicilərə tutaraq sentyabrın 26-da keçiriləcək referendumda Konstitusiyaya təklif olunan əlavə və dəyişiklikləri dəstəkləyərək, gələcək inkişafımız naminə bu dəyişikliklərə “HƏ” deməyə çağırıram.
Samirə Allahverdiyeva,
YAP Səbail rayon
təşkilatının məsləhətçisi

Paylaş:

Baxılıb: 989 dəfə