"Səndən, məndən, filankəsdən bu millətə rəhbər olmaz"

Bakı:

13 °C

76 %

4 m/s

Əlaqə

AZ RU EN

Ana səhifə / Xəbər lenti / "Səndən, məndən, filankəsdən bu millətə rəhbər olmaz"

"Səndən, məndən, filankəsdən bu millətə rəhbər olmaz"

10.06.2024 [11:35]

Elçibəyin etirafları

1993-cü ilin iyun hadisələrinin üstündən 31 il keçir. 31 il öncə Azərbaycan dövlətçiliyi, suverenliyi və müstəqilliyi parçalanma, dağılma təhlükəsilə üz-üzə dayanan zaman xalqının çağırışına cavab verən Heydər Əliyev xilaskarlıq missiyasını üzərinə götürdü. O zamanın iqtidarı olan AXC-Müsavatın hakimiyyət nümayəndələri isə başda prezident Elçibəy olmaqla qaçmağı çıxış yolu kimi seçdilər.

Ötən 31 ildə həmin günlərdə baş verənlərə bütün rakurslardan aydınlıq gətirilməsinə çalışılıb. Bu gün də bəzi o dövrün “iqtidar" tör-töküntüləri "küçə siyasətçisi" səviyyəsində olduqlarını, naşılıq, səriştəsizlik və məsuliyyətsizlik sindromu yaşadıqlarını etiraf etmək istəmirlər. Amma ortada real faktlar var…

"REAL" televiziyasında yayımlanan Mir Şahir Ağayevin müəllifliyi ilə hazırlanmış "Məsuliyyət çatışmazlığı sindromu" adlı reportajda yeni faktlar üzə çıxarılıb. Vaxtilə "215 KL" studiyası üçün çəkilən bu kadrlarda Əbülfəz Elçibəyin bəzi "etirafları" yer alır. Məsələn, 1992-ci ilin aprelində "215 KL" studiyasına müsahibəsində o zamanın AXC sədri Əbülfəz Elçibəy müxbirin "prezident olsaydınız"la başlanan sualına cavab verir: "Mənim birincisi, Allah eləməsin başıma elə bir iş gəlsin, prezident olum. Doğurdan da prezident olmaq mənim xəyalımdan keçməyib, fikrimdə də yoxdur elə bir şey".

Ardından isə bəlkə də Elçibəyin həyatının ən böyük etirafı səslənir: "BİZ SİYASƏTDƏ ORTA MƏKTƏB MÜƏLLİMİ SƏVİYYƏSİNDƏYİK".

O dövrün AXC sədri Elçibəy tanınmış qazax yazıçısı Oljas Süleymenovla "fikir mübadiləsini" də xatırlayır: "Almatı hadisələrindən sonra Oljas Süleymenov gəlmişdi bura. Mən gördüm çox ağır sarsıntı içindədir. Soruşdum ki, sən özünü rəhbər düşünürsənmi? Dedi hə. Dedim sən nahaq yerə özünü rəhbər düşünürsən. Dedim səndən, məndən, filankəsdən bu millətə rəhbər olmaz".

Elçibəy həmin müsahibədə bildirir ki, başçı kimi düşünmək çox ağırdır: "Başçılıq məsuliyyətini üstünə götürməməlisən".

Reportajda Əbülfəz Elçibəyin prezident seçildikdən sonra verdiyi müsahibədən də kadrlar nümayiş olunur. Ə.Elçibəy deyir: "Mən hələ özümü əsl prezident kimi hiss etmirəm. Prezident olmaq üçün gərək bir vərdiş olsun, oturasan. Mən meydanlarda yumruğumu qaldırıb azadlıq qışqıran, demokratiya çığıran adamam. Mən xalq hərəkatının iştirakçısı kimiyəm, xalq cəbhəsinin sədri kimi".

Bəli, ölkənin başına təsadüfi və ya kimlərinsə qurğusu ilə gətirildiyini etiraf edən Əbülfəz Elçibəy 1992-ci ildə verdiyi müsahibədə Azərbaycan ordusunun yaradılması ilə bağlı bildirirdi ki, 1 aya bu işi həll edə bilər. Sitat: "Məndə müəyyən qədər səlahiyyət olsaydı, müdafiə nazirliyi müəyyən ixtiyarı mənə versəydi, bir ayın içərisində Azərbaycanın Milli Ordusunu yaradardım".

Bir aya deyil, Ali Baş Komandan kimi məsuliyyət daşıdığı bir il ərzində qurub ortaya çıxardıqları ordu isə qiyamçı, xalqı, şəhəri güllə-baran edən 709-cu briqada idi. Elçibəyin ona və Müdafiə Nazirliyinə tabe olmayan bu hərbi hissənin zərərsizləşdirilməsi barədə açıqlaması isə tam bir faciə idi: "Soruşdum, dedi ki, o qoşun ki, Müdafiə Nazirliyinə, sənə tabe olmur, onun yerini dəyişdirin. Ya Gəncədən çıxsın qırağa, ya getsin başqa yerdə olsun. Getsin Murov dağda yerləşsin, vuruşsun. Könüllü kimi vuruşsun. EYBİ YOXDUR, BİZƏ TABE OLMURSA, KÖNÜLLÜ KİMİ VURUŞSUN"…

Bir ölkəyə rəhbərlik etmək kimi bir məsuliyyəti "üstlənən" şəxsin tabesizliyə münasibəti bu imişsə, Azərbaycanı nələrin gözləyə biləcəyini düşünmək belə qorxuludur. Artıq şərhə ehtiyac qalmır…

P.İSMAYILOV