Prezidentin daha bir təşəbbüsünü 179 ölkə dəstəklədi...

Bakı:

25 °C

53 %

3 m/s

Əlaqə

AZ RU EN

Ana səhifə / Xəbər lenti / Prezidentin daha bir təşəbbüsünü 179 ölkə dəstəklədi...

Prezidentin daha bir təşəbbüsünü 179 ölkə dəstəklədi...

18.12.2021 [11:09]

Azərbaycanın Qoşulmama Hərəkatı adından təqdim etdiyi qətnamə BMT Baş Assambleyasında qəbul olundu

Nardar BAYRAMLI

Azərbaycan Qoşulmama Hərəkatının sədri kimi pandemiyaya qarşı mübarizədə beynəlxalq ictimaiyyətin səfərbər edilməsi istiqamətində qlobal təşəbbüslərini davam etdirir. 2021-ci il sentyabrın 24-də BMT Baş Assambleyasının 76-cı sessiyasında çıxış edən Azərbaycan Prezidenti İlham Əliyev “peyvənd millətçiliyi”ni, varlı və kasıb ölkələr arasında peyvəndlərə əlçatanlıqla bağlı qeyri-bərabərliyi bir daha tənqid etmiş və bütün ölkələr üçün peyvəndlərdən istifadə məqsədilə bərabər imkanların təmin olunması ilə bağlı Azərbaycan tərəfindən Qoşulmama Hərəkatı adından BMT Baş Assambleyasında qətnamənin irəli sürüləcəyini elan etmişdi.

Azərbaycan tərəfindən Qoşulmama Hərəkatı adından irəli sürülmüş COVID-19 əleyhinə peyvəndlərə bütün ölkələrin bərabər, münasib, vaxtında və universal əlçatanlığının təmin edilməsi ilə bağlı qətnamə dekabrın 16-da BMT Baş Assambleyasında 179 ölkənin dəstəyi ilə qəbul olunub. Bu qətnamənin qəbul edilməsi ilə beynəlxalq ictimaiyyət Prezident İlham Əliyevin COVID-19 pandemiyasına, “peyvənd millətçiliyi”nə qarşı təşəbbüslərini bir daha dəstəklədiyini nümayiş etdirdi.

Sənədin əhəmiyyəti ilə bağlı qəzetimizə açıqlama verən Səhiyyə Nazirliyinin Beynəlxalq Proqramlar üzrə Ölkə Əlaqələndirmə Komissiyasının nəzarət üzrə mütəxəssisi Pərvanə Vəliyeva bildirib ki, bəzi ölkələr tərəfindən davam edən “peyvənd millətçiliyi”, inkişaf etmiş və inkişaf etməkdə olan ölkələr arasında peyvəndlərə çıxışla bağlı getdikcə dərinləşən qeyri-bərabərlik narahatlıq doğurur: “Beynəlxalq hesabatlara əsasən, bu günə qədər dünyada mövcud olan peyvənd dozalarının 82 faizi zəngin ölkələr tərəfindən alınıb, peyvəndlərin yalnız 0.3 faizi azgəlirli ölkələr tərəfindən realizə edilib. Bu gün COVID-19 pandemiyasından əziyyət çəkən dünyada vaksinlərin ədalətli bölüşdürülməsi ilə bağlı problem qalmaqdadır. Azərbaycan Prezidentinin təşəbbüsü ilə BMT-də qəbul olunan sənəd məhz bu tipli problemlərin aradan qaldırılmasına xidmət edir”.

Ekspert qeyd edib ki, Azərbaycanın koronavirusla mübarizədə 30-dan çox ölkəyə humanitar və maliyyə yardımları etməsi, Ümumdünya Səhiyyə Təşkilatına 10 milyon ABŞ dolları məbləğində könüllü maliyyə ayırması, bu yaxınlarda dörd ölkəyə təmənnasız olaraq 150 min doza vaksin təqdim etməsi ölkəmizin dünya birliyinin məsuliyyətli və etibarlı üzvü olmasını, pandemiyaya qarşı mübarizədə nə qədər ardıcıl, humanist siyasət həyata keçirdiyini göstərir. Azərbaycan Türk Dövlətləri Təşkilatı çərçivəsində də Afrika ölkələrinə peyvənd göndərməsi təqdir olunur.

Onun sözlərinə görə, Azərbaycan hökuməti pandemiyanın ilk günlərindən əhalinin sağlamlığının qorunması və koronavirusun mənfi təsirinin minimuma endirilməsi məqsədilə mühüm və praktiki tədbirlər həyata keçirir: “Azərbaycan cari ilin yanvar ayının ortalarından peyvəndləmə kampaniyasına başlayıb. Hər 100 nəfərə istifadə edilmiş vaksin dozalarının həcmi 80 faizdən artıqdır. Vurulan ümumi vaksin sayı 10 milyonu keçib, 1-ci doza vaksin 5 milyondan çox şəxsə, ikinci doza isə 4.6 milyondan çox şəxsə tətbiq edilib. “Buster” doza vaksinlərin sayı isə 1 milyon 200 mindən çox insanı əhatə edir. Pandemiya ilə mübarizə çərçivəsində Səhiyyə Nazirliyi, İcbari Tibbi Sığorta Agentliyi və Tibbi Ərazi Bölmələrini İdarəetmə Birliyi birgə fəaliyyət göstərir. Vaksinasiya prosesinin optimallaşması məqsədilə Bakı şəhərində proses Səhiyyə Nazirliyi, Abşeron, Sumqayıt şəhərləri və ölkəmizin regionlarında Tibbi Ərazi Bölmələrini İdarəetmə Birliyi tərəfindən həyata keçirilir. Düzgün planlaşdırılmış tədbirlərin həyata keçirilməsi nəticəsində pandemiya ilə bağlı vəziyyət nəzarət altında saxlanılıb və ölkəmizdə tətbiq olunmuş karantin rejimi tədricən yumşaldılıb. Pandemiya ilə mübarizə sahəsində Azərbaycanın səyləri beynəlxalq səviyyədə də yüksək dəyərləndirilir. Bu Ümumdünya Səhiyyə Təşkilatının rəylərində də ifadə olunur”.

Paylaş:

Baxılıb: 1020 dəfə