Pasxa bayramında da uşaqlar öldürüldü

Bakı:

10 °C

81 %

8 m/s

Əlaqə

AZ RU EN

Ana səhifə / Xəbər lenti / Pasxa bayramında da uşaqlar öldürüldü

Pasxa bayramında da uşaqlar öldürüldü

26.04.2022 [10:51]

Azyaşlı ölümlərində artan rəqəmlər son deyil

Günel ABBAS

2 aydır ki, Rusiya və Ukrayna arasında davam edən müharibə dünya mediasının gündəminə çevrilib. Xüsusilə dinc əhalinin, uşaqların qətlə yetirilməsi Rusiyanı qınaq obyektinə çevirib. Dünyanın böyük təşkilatları, güc strukturları Rusiya tərəfinə müəyyən sanksiyalar tətbiq edir, xəbərdarlıqlar göndərir. Mütəmadi olaraq törədilən qırğın pislənir, uşaq ölümlərinin sayının artmaması üçün müraciətlər, çağırışlar edilir. Buna baxmayaraq, müharibənin hər ötən günü Ukraynada uşaq ölümləri ilə nəticələnir.

Qeyd edək ki, şərq slavyanları sayılan, bir-biri ilə sıx genetik, tarixi, mədəni və iqtisadi bağları olan rusların və ukraynalıların dinləri də eynidir. Hətta onların bugünkü müharibə həddinə gəlib çıxması da heyrət doğurur. Elə hər iki dövlətin eyni dini mənsubiyyəti daşıdığından ötən həftə qeyd edilən Pasxa bayramında müharibəyə ara verilməsi gözlənilirdi. Bu barədə aprelin 19-da BMT-nin Baş katibi Antonio Quterreş dördgünlük humanitar fasilə verilməsinə dair çağırış da etmişdi. Lakin Rusiya atəşkəs təşəbbüsünü dəstəkləməmişdi. Səbəb isə atəşkəsin Ukrayna hərbçilərinin yenidən toparlana bilməsi məqsədi daşıdığı ilə əlaqələndirilmişdi. Nəticədə xristianların diriliş bayramı adlandırdıqları günlərdə də rus qoşunları tərəfindən məsum uşaqların qanı tökülüb.

Ukraynada Pasxa bayramında nə qədər uşaq qətlə yetirilib?

Ukraynanın rəsmi qurumlarından verilən məlumata görə, 23-24 aprel tarixlərində Donetsk vilayətində Krasnoqorovkada 5 və 14 yaşlı iki qız rus qoşunları tərəfindən qətlə yetirilib. Həmin tarixdə qoşunlar Xarkov vilayətini növbəti dəfə top atəşinə tutub, nəticədə Çuqev şəhərində 11 yaşlı uşaq yaralanıb. Aprelin 23-də Xarkov vilayətinin Boqoduxovski rayonunun Turovo kəndinin atəşə tutulması nəticəsində 12 yaşlı uşaq xəsarət alıb.

Ukraynada müharibənin azyaşlı qurbanları

Ümumilikdə müharibənin başladığı tarixdən bu günə qədər Ukraynada 606-dan çox uşaq zərər çəkib. Rəsmi məlumatlara görə, onlardan 215-i həlak olub, 391-dən çox uşaq isə yaralanıb. Təəssüf ki, bu rəqəmlər son deyil, çünki qoşunların aktiv döyüş əməliyyatları apardığı və müvəqqəti işğal edilən bölgələrdə dəqiq statistika aparmaq mümkün deyil.

Hazırkı məlumatlara əsasən, müharibədən zərər çəkən uşaqların vilayətlər üzrə statistikası belədir: Donetskdə -124, Kiyevdə - 114, Xarkovda - 93, Çerniqovda - 66, Xersonda - 44, Nikolaevdə - 43, Luqanskda - 37, Zaporojyedə - 27, Sumidə - 17, Jitomirdə - 15.

Ukraynada uşaq qətlləri Böyük Vətən müharibəsinin davamı kimi...

Ukraynada müharibə nəticəsində uşaq ölümləri ilə bağlı statistikanın daim artması Böyük Vətən müharibəsindəki silsilə qətlləri xatırladır. O zamankı döyüşlərdə müxtəlif xalqların nümayəndələrindən olan 13 milyon azyaşlı və yeniyetmə qətlə yetirilib. Qeyd etmək lazımdır ki, dünyada ciddi proseslərin getdiyi həmin dövrlərdə Rusiya və Ukrayna faşizmə qarşı eyni cəbhədə vuruşurdu. Bu gün isə məsum insanların, xüsusilə də azyaşlıların ölümü ilə nəticələnən çaxnaşma içindədirlər.

Paylaş:

Baxılıb: 545 dəfə