“Sputnik-Azərbaycan”ın istefa verən redaktoru “Yeni Azərbaycan”a danışdı: Təzyiqlərə məruz qalırdıq

Bakı:

10 °C

93 %

7 m/s

AZ RU EN

Ana səhifə / Xəbər lenti / “Sputnik-Azərbaycan”ın istefa verən redaktoru “Yeni Azərbaycan”a danışdı: Təzyiqlərə məruz qalırdıq

“Sputnik-Azərbaycan”ın istefa verən redaktoru “Yeni Azərbaycan”a danışdı: Təzyiqlərə məruz qalırdıq

06.08.2022 [10:48]

G.QABİLQIZI

“Sputnik-Azərbaycan”ın fəaliyyəti, rus dili versiyasında baş verən hadisələr bir müddətdir ictimaiyyətin gündəmindədir. Xüsusilə Agentliyin Vətən müharibəsi dövründə ortaya qoyduğu mövqe bu agentliyi hər kəs tərəfindən qınaq obyektinə çevirmişdi. Ötən gün baş verən hadisələr məsələni bir qədər də qabartdı. Belə ki, “Sputnik-Azərbaycan”ın rus dili versiyasının buraxılış redaktorları “Qisas” əməliyyatı zamanı Azərbaycanın atəşkəsi pozduğunu iddia edən Rusiya Müdafiə Nazirliyinin məlumatını verməkdən imtina edərək tam tərkibdə istefa veriblər. 4 redaktor bu barədə sosial şəbəkədə məlumat yayıb. Zülfiyyə Qurbanova, Cəmilə Əfəndiyeva, Yelena Starostina, Gülzar Mustafayeva sosial şəbəkə üzərindən paylaşımlarında Azərbaycan vətəndaşları olaraq bu informasiya agentliyində Azərbaycanın maraqlarını bacardıqca qoruduqlarını, buna gücləri çatmadıqda isə istefa vermək məcburiyyətində qaldıqlarını yazıblar.

“Sputnik-Azərbaycan”- nın istefa verən redaktorlarından biri, Gülzar Mustafayeva “Yeni Azərbaycan”a bildirib ki, bundan əvvəl də bir sıra təzyiqlər olub, xüsusilə İkinci Qarabağ müharibəsi zamanı oxşar təzyiqlərə, təhqirlərə məruz qalıb: “Bundan əvvəlki təzyiqlər bu dərəcə sərt formada olmurdu. Artıq bu dəfə başa düşdük ki, təzyiqlərin ardı daha ciddi, kobud formada gələcək. Vətən müharibəsi zamanı da, davam edən Rusiya-Ukrayna müharibəsində də dəfələrlə təhqirlərlə üzləşirdik. Vətən müharibəsi zamanı bizim üçün Azərbaycanın maraqları öndə olub. Bizə Azərbaycanın Ordusu və siyasəti maraqlıdır. Biz hamımız Azərbaycan vətəndaşıyıq. Başqa cür ola da bilməz. Ukrayna məsələsi barədə onu deyə bilərəm ki, Azərbaycanın neytral mövqeyi olduğu üçün biz də bu mövqedə olduq. Təhqirlərlə üzləşsək də, öz işimizi davam etdirdik”.

G.Mustafayevanın sözlərinə görə, təzyiqlər və təhqirlər media qurumunda bir müddət əvvəl yeni rusyönümlü rəhbərin təyin olunmasından sonra baş verib: “Həmin adam “Sputnik - Cənubi Osetiya”da rəhbər olub və keçmiş polkovnikdir. Bu adamın xarakteri vəzifələrindən bəllidir. Adam imperialist, şovinistdir. Bura gələndə bizim müstəqillikdən, suverenlikdən, azad siyasət və fikirlərdən danışmağımıza təəccüb edirdi. Bu vəziyyət onun xoşuna gəlmirdi. Ancaq biz yenə də öz mövqeyimizdən dönmürdük”.

Redaktor həmkarlarının və özünün istefasına səbəb olan hadisə barədə də ətraflı məlumat verib. Bildirib ki, o, növbətçi redaktordan tələb edib ki, Rusiya Müdafiə Nazirliyinin bəyanatını yaysınlar: “Halbuki həmin bəyanat Azərbaycan bəyanatına zidd olub, növbətçi redaktor bundan imtina edib, iş “çat”ımızda mübahisə apardıq və hamımız məsələyə qoşulduq. Sübut etməyə çalışdıq ki, bu, Azərbaycanın mövqeyinə ziddir, həm də “Sputnik”in özünə pis təsir edəcək. Rəhbər bizi eşitmədi və yenə dedi ki, materialı qoymalısınız. Bu zaman növbətçi redaktor dedi ki, mən işdən çıxıram. Biz dörd redaktor qərara gəldik ki, hamımız işdən çıxacağıq. Çünki belə şəraitdə heç birimiz işləməyə razı deyilik. Səhəri dedik ki, işdən çıxırıq və rəhbər heç nə demədən razılaşdı. Bizə deyildi ki, sabahdan işə gəlməyə bilərsiniz. Lakin sonra hamımızdan daha iki həftə də işləməli olduğumuzu tələb etdi. Amma biz fikrimizdən dönmədik və dedik ki, sabahdan işə çıxmayacağıq. Sonra rəhbər bizi yenə bir-bir çağırıb müqaviləyə görə iki həftə işləməyimizi xatırladıb bizdən işdə qalmağı tələb etdi. Biz dedik ki, istəyirsən maaşımızı kəs, istəyirsən hansısa maddə ilə işdən çıxar, biz sabahdan işə gəlmirik. “Azərbaycandan başqa bir ölkənin maraqlarını üstün tutan qurumda heç bir zaman işləməyəcəyik”, - deyib istefa verdik. Bildiyim qədəri ilə kollektivi yığıb, deyib ki, guya biz onu nə iləsə şantaj edirmişik deyə özü bizi işdən çıxarıb”.

Paylaş:

Baxılıb: 663 dəfə