ABŞ-ın 5-ci nəsil qırıcılarına bərabər “Bayraktar Kızılelma”...

Bakı:

25 °C

41 %

6 m/s

Əlaqə

AZ RU EN

Ana səhifə / Xəbər lenti / ABŞ-ın 5-ci nəsil qırıcılarına bərabər “Bayraktar Kızılelma”...

ABŞ-ın 5-ci nəsil qırıcılarına bərabər “Bayraktar Kızılelma”...

13.12.2022 [10:38]

Azərbaycan Ordusu üçün də nəzərdə tutulur

Türkiyənin ilk pilotsuz qırıcısı olan “Bayraktar Kızılelma”nın ilk uçuşu bir ay ərzində həyata keçirilə bilər. Bu barədə Türkiyə Prezidenti Rəcəb Tayyib Ərdoğan Samsun şəhərində gənclərlə görüşü zamanı bildirib. O, qeyd edib ki, Türkiyə artıq öz raketlərini də istehsal edir.

Ərdoğan, həmçinin terrorla mübarizə mövzusuna toxunaraq, ABŞ-ın Suriyanın şimalına 4-5 min yük maşını ilə silah və sursat göndərdiyini bildirib. O, bu barədə Ankaranın rəsmi Vaşinqtona dəfələrlə xəbərdarlıq etməyinə baxmayaraq, ABŞ-ın terrorçulara dəstəyini dayandırmadığını vurğulayıb.

Qardaş ölkənin istehsal etdiyi “Bayraktar Kızılelma” pilotsuz qırıcısının funksiyaları və əhəmiyyətini “Yeni Azərbaycan”a şərh edən hərbi ekspert Ədalət Verdiyevin sözlərinə görə, Türkiyənin müdafiə sənayesi digər ölkələrdən asılılığını minimuma endirmək üçün müxtəlif döyüş texnikaları və aviasiya vasitələrinin istehsalını həyata keçirməkdədir. Bu sahədə görülən işlərin uğurla davam etdiyini vurğulayan ekspert bildirib ki, Türkiyə artıq dünyada silah-sursat və hərbi texnikaların idxalçısından daha çox müasir hərbi texnikaların istehsalçısına çevrilir: ““Bayraktar Kızılelma” pilotsuz qırıcısının texniki xüsusiyyətləri hələlik dəqiq məlum deyil. Çünki sınaqlar başa çatdıqdan və yalnız seriya istehsalından sonra dəqiq məlumat açıqlanacaq. Ancaq hər bir halda Türkiyənin hərbi texnologiya sahəsində xüsusi imkanlara malik olduğunu xüsusilə qeyd edə bilərik. “Bayraktar Kızılelma” Amerikanın 5-ci nəsil qırıcılarına bərabərdir, bəlkə də daha üstün xüsusiyyətlərə malikdir. Pilotsuz versiyada istehsal olunan bu qırıcı çox güman ki, daha böyük sürət xüsusiyyətlərinə malik olacaq. Bu da insan orqanizmini ciddi yüklənmələrdən qorumaq məqsədini daşıyır. Başqa sözlə desək, insan orqanizmi yüksək sürətlənməyə tab gətirə bilmir. Ona görə də “Bayraktar Kızılelma” qırıcıları yüksək göstəricilərə malik olduğu üçün onun pilotsuz versiyada istehsalı düşünülüb. Bu texnika barmaqla sayıla biləcək ölkələr tərəfindən istehsal edilir. Ancaq onların hər biri qardaş ölkənin istehsal etdiyi pilotsuz qırıcılardan geri qalır. Türkiyənin uğuru Azərbaycanın uğuru deməkdir. Eyni zamanda Türkiyədə istehsal edilən hərbi texnikalar yalnız türk ordusu üçün yox, həmçinin Azərbaycan üçün nəzərdə tutulur. “Bayraktar Kızılelma”nın istehsalı isə həm Azərbaycan, həm də Türkiyənin digər müttəfiqləri üçün uğurlu addımlardandır. Hesab edirəm ki, Azərbaycan zamanı gələndə həmin qırıcıları əldə etmək imkanına malik olacaq”.

Yeganə BAYRAMOVA

Paylaş:

Baxılıb: 434 dəfə