Azərbaycan-İƏT əlaqələrinin növbəti nümunəsi

Bakı:

25 °C

52 %

2 m/s

Əlaqə

AZ RU EN

Ana səhifə / Xəbər lenti / Azərbaycan-İƏT əlaqələrinin növbəti nümunəsi

Azərbaycan-İƏT əlaqələrinin növbəti nümunəsi

25.11.2023 [14:42]

N.BAYRAMLI

Azərbaycanın xarici siyasətində beynəlxalq təşkilatlarla əməkdaşlıq mühüm yer tutur. Bu baxımdan, ölkəmiz İslam Əməkdaşlıq Təşkilatı (İƏT) çərçivəsində fəal siyasət həyata keçirir. Bakıda İƏT-ə üzv dövlətlərin əmək nazirlərinin 5-ci konfransının keçirilməsi də bu siyasətin ifadəsidir.

Konfransda 40-dan çox nümayəndə heyəti iştirak edib. Belə ki, 20 ölkə nazir səviyyəsində, 7 beynəlxalq təşkilat sədr səviyyəsində, digər ölkələr də nazir müavinləri və digər səviyyələrdə təmsil olunublar. Konfransın sədri seçilmiş Azərbaycanın əmək və əhalinin sosial müdafiəsi naziri Sahil Babayev İƏT-in bu konfransının üzv ölkələrin əlaqələrinin genişlənməsinə, fəal təcrübə mübadilələrinə imkan yaratdığını vurğulayıb. O, hamı üçün məhsuldar məşğulluğun və layiqli əməyin, gənclərin məşğulluğunun təmin olunmasının İƏT ölkələri üçün aktuallığını, sosial sahədə şəffaflığın, xidmət keyfiyyətinin, əlçatanlıq və operativliyin artırılması kimi prioritet və çağırışların həllində rəqəmsallaşmanın vacibliyini, sosial məsələlərin həllində qarşılıqlı təcrübə mübadilələrinin önəmini vurğulayıb.

İƏT-in Baş katibi Hissein Brahim Taha isə bu konfransın üzv ölkələr üçün önəmindən bəhs edib, müzakirə olunan məsələlərin həllində əməkdaşlığın genişlənməsinin vacibliyini qeyd edib.

Tədbirdə Beynəlxalq Əmək Təşkilatının Baş direktoru Qilbert Hungbonun konfrans iştirakçılarına videomüraciəti də təqdim olunub. O, İƏT-in Bakıda Əmək Mərkəzinin açılması münasibətilə təbrikini ifadə edib.

Xatırladaq ki, 2013-cü ilin aprel ayında İƏT-ə üzv dövlətlərin əmək nazirlərinin Bakıda keçirilən 2-ci konfransında iştirak edən nümayəndə heyətlərinin rəhbərlərini qəbul edərkən Prezident İlham Əliyev Mərkəzi Qərargahı Bakı şəhərində olmaqla İƏT-in Əmək Mərkəzinin yaradılması təşəbbüsü ilə çıxış etmiş, bu təşəbbüs İƏT-ə üzv ölkələr tərəfindən yekdilliklə dəstəklənmişdi. Mərkəzin əsas fəaliyyət istiqamətləri əmək, məşğulluq, sosial müdafiə və insan kapitalının inkişafı sahəsində üzv ölkələrin əməkdaşlığının genişləndirilməsi, əmək sahəsində fəaliyyətin əlaqələndirilməsi, əmək şəraitinin yaxşılaşdırılması, sosial tərəfdaşlığın gücləndirilməsi, layiqli əməyin tətbiqi, məşğulluq imkanlarının genişləndirilməsi və dayanıqlı sosial müdafiə sisteminin formalaşdırılmasının təşviq edilməsi olacaq.

Bundan əlavə, İslam Əməkdaşlıq Təşkilatı (İƏT) əmək nazirlərinin Bakıda keçirilən 5-ci konfransında iştirak edən İslam ölkələrinin nazirlərinin 5 saylı Bakı DOST Mərkəzini ziyarət etmələri də əhəmiyyətlidir. Qonaqlara Prezident İlham Əliyevin Fərmanı ilə 2019-cu ilin may ayında DOST Agentliyi və bundan sonra 7 DOST Mərkəzinin açıldığı, hazırda bu mərkəzlərin şəbəkəsinin genişləndirilməsi işlərinin davam etdirildiyi barədə məlumat verilib. Bildirilib ki, Birinci vitse-prezident Mehriban xanım Əliyevanın təşəbbüsü olan DOST konsepsiyası 159 sosial xidmətin “bir pəncərə”dən, operativ, şəffaf, vətəndaş məmnunluğuna uyğun təqdim olunmasına imkan verir. DOST konsepsiyasının innovativ üstünlükləri və nailiyyətləri, bu konsepsiyanın dünyanın qabaqcıl təcrübələri sırasına daxil edildiyi və beynəlxalq uğurları diqqətə çatdırılıb. Ümumiyyətlə, bu ziyarət İƏT ölkələri tərəfindən Azərbaycanın bu istiqamətdə təcrübəsinin öyrənilməsi baxımından önəmlidir.

Paylaş:

Baxılıb: 534 dəfə