Ermənistanda iqtisadi böhran siyasi xaosa yol açıb

Bakı:

11 °C

82 %

1 m/s

Əlaqə

AZ RU EN

Ana səhifə / Dünya / Ermənistanda iqtisadi böhran siyasi xaosa yol açıb

Ermənistanda iqtisadi böhran siyasi xaosa yol açıb

07.04.2015 [09:58]

Hakimiyyətdə olan hərbi xuntanın qəbul etdiyi qərarlar vətəndaşların dərin etirazına səbəb olmaqla yanaşı, xaos və qarşıdurmaya rəvac verir
Ermənistanın işğalçı, təcavüzkar siyasət nəticəsində regional və beynəlxalq miqyasda təcrid vəziyyətinə düşməsi bu ölkə daxilində mövcud olan böhranın daha da dərinləşməsini şərtləndirib. Sirr deyil ki, heç nisbi müstəqilliyə də malik olmayan, xaricdən gələn ianələrə bel bağlayan və total tənəzzülün müşahidə olunduğu Ermənistan ciddi siyasi, iqtisadi və demoqrafik böhranla qarşı-qarşıyadır. Dərin iqtisadi tənəzzül və xaos insanların həyat şəraitini olduqca çətinləşdirdiyi üçün ekspertlər işğalçı ölkənin gələcəyinin qeyri-müəyyən olduğunu bildirirlər.
Ermənistandan köçənlərin sayında fantastik dərəcədə artım müşahidə edilib
“Armenia today” yazır ki, son bir il ərzində Ermənistandan köçənlərin sayında fantastik dərəcədə artım müşahidə edilib. Əhalinin ölkəni tərk etməsinin səbəbləri əvvəlki illərdəki kimi dəyişməz olaraq qalıb. İnsanlar səfalətdən, hüquqsuzluqdan, işsizlikdən, hakimiyyət orqanlarının özbaşınalığından, rüşvət və korrupsiyadan can qurtarmaq üçün ölkəni tərk edirlər. Əsas məqam isə ondan ibarətdir ki, Ermənistanı tərk edənlər sırasında yenə də əmək qabiliyyətli və hazırda müəyyən qurumlarda çalışan insanlar üstünlük təşkil edir.
Ekspertlərin qənaəti budur ki, mövcud demoqrafik problemlər sosial kataklizmləri daha da sürətləndirir. Ölkənin sosial problemləri aradan qaldırmaq üçün kifayət qədər siyasi, iqtisadi resurslara malik olmaması isə demoqrafik problemlərin hakimiyyətlə xalq arasında ciddi qarşıdurmanı şərtləndirməsinə zəmin yaradır. Bütün bunları nəzərə alan siyasi şərhçilər qeyd edirlər ki, Ermənistan sosial inqilab astanasındadır.
Ermənistanda iqtisadi tənəzzül sürətlənib
Yeri gəlmişkən, mənbə onu da diqqətə çatdırır ki, Ermənistan Dövlət Statistika Xidməti idarəsinin məlumatına görə, yanvar ayından etibarən ərzaq məhsullarının qiyməti sürətlə qalxır. Son bir ayda qiymətlər ümumilikdə 5,6 faiz artıb. Ölkə mətbuatı qiymətlərin artmasının əhalinin yaşayış səviyyəsinin düşməsinə və narazılığa səbəb olduğunu yazır. Bu, ekspertlər tərəfindən ölkə iqtisadiyyatının iflası kimi dəyərləndirilir.
“Armenia today” Yerli mal istehsalçıları İttifaqının sədri Vazgen Safaryana istinadən onu da yazır ki, ölkənin ixracı 26 faiz azalıb, idxal isə 25 faiz aşağı düşüb. Səbəb isə beynəlxalq bazarda neftin qiymətinin azalması və Rusiya rublunun dəyərdən düşməsidir. Bildirilir ki, bu, Ermənistan üçün çox təhlükəli vəziyyətdir və hakimiyyət bunu İctimai Şurada müzakirəyə çıxarmalıdır.
İşğalçı ölkə xaos və qarşıdurma ərəfəsində...
Eyni zamanda, Ermənistanda dərin sosial-iqtisadi tənəzzül meyilləri Sarkisyan hakimiyyəti ilə xalq arasında uçurumu genişləndirməklə yanaşı, sosial gərginliyin artmasını şərtləndirib. Hakimiyyətdə olan hərbi xuntanın qəbul etdiyi qərarlar vətəndaşların dərin etirazına səbəb olmaqla yanaşı, xaos və qarşıdurmaya rəvac verir. “Armenia Today” yazır ki, hakimiyyətin yanlış siyasətinə etiraz əlaməti olaraq bu ölkədə aksiyalar davam edir, insanlar Sarkisyanın rəhbərlik etdiyi hərbi xuntaya kəskin etirazlarını bildirirlər. Mənbə onu da qeyd edir ki, Ermənistanda sosial-iqtisadi vəziyyətin mürəkkəbliyi və siyasi sabitliyin olmaması etiraz aksiyalarının davamlı olacağına dəlalət edir.
Ermənistan əməkdaşlıq yox, təzyiq obyektinə çevrilib
“News.am” saytı isə diqqətə çatdırır ki, Ermənistanda siyasi və iqtisadi tənəzzül ölkənin beynəlxalq aləmdə normal siyasi əlaqələrə malik olmamasından irəli gəlir. Ermənistan bu gün əməkdaşlıq yox, çox hallarda təzyiq obyektinə çevrilib. Bütün bunları nəzərə alan bir çox ekspertlərin qənaətinə görə, müstəqil siyasət yeritməyən Ermənistanın gələcəyi sual altındadır. Hakimiyyət manevrləri davam etdirməyə çalışsa da, Ermənistan faktiki olaraq iflasın astanasındadır.
Bununla yanaşı, Ermənistanın sosial problemləri aradan qaldırmaq üçün kifayət qədər güc və potensiala malik olmaması nəticəsində ortaya çıxan problemlər hakimiyyətlə xalq arasında ciddi qarşıdurmaya zəmin yaradır. Eyni zamanda, hakimiyyət repressiya siyasətini daha da kəskinləşdirərək müxalifətə və ictimai-siyasi fəallara qarşı davamlı təzyiqlər göstərir.
Nurlan QƏLƏNDƏRLİ