Dünyanın diqqəti Qarabağ çaylarında

Bakı:

24 °C

62 %

1 m/s

Əlaqə

AZ RU EN

Ana səhifə / İdman / Dünyanın diqqəti Qarabağ çaylarında

Dünyanın diqqəti Qarabağ çaylarında

23.12.2022 [10:55]

Suqovuşandan sonra Həkəri çayı və Köndələnçayda yarışlar keçiriləcək

MÜŞFİQƏ

Azərbaycan Kanoe və Avarçəkmə Federasiyasının (AKAF) illik hesabat konfransı keçirilib. 2022-ci ilin yekunlarına həsr olunan tədbirdə çıxış edən federasiyanın baş katibi Fərhad Əliyev bildirib ki, 2022-ci il qurum üçün yeni mərhələ ilə əlamətdar olub: “Bu il federasiyanın adı dəyişdirilərək Azərbaycan Kanoe və Avarçəkmə Federasiyası adlandırıldı. Eləcə də federasiya özünün rəsmi saytını qısa zamanda tamamilə yenilədi. Cari ildə yığma komandamızın üzvü akademik avarçəkən Diana Dimçenko Avropa çempionatının qızıl medalını qazanması sevincimizi birə-beş artırdı”.

Suqovuşanda idman bayramı keçirildi

AKAF-ın mətbuat xidmətinin rəhbəri Vüsal Qurbanov isə çıxışında vurğulayıb ki, ən önəmli məqam işğaldan azad olunan Qarabağda beynəlxalq yarışın təşkil edilməsi idi: “30 il qapısı üzümüzə bağlanan Suqovuşanda təlim-məşq toplanışı, həm də Qarabağda təşkil edilən ilk genişmiqyaslı idman tədbiri idi. Novruz bayramı ərəfəsində baş tutan bu toplanışı cənab Prezident İlham Əliyev və birinci xanım Mehriban Əliyeva şəxsən izləməklə bizə böyük qürur yaşatdı. Bu diqqət ölkə rəhbərliyinin Azərbaycan gəncliyinə, idmana və idmançılara qayğısının göstəricisi idi. Artıq qarşıda daha böyük hədəf - işğaldan azad edilən tarixi torpaqlarımızda ilk beynəlxalq yarışın təşkili dururdu”.

Heydər Əliyevin anadan olmasının 99-cu ildönümünə həsr edilən “Prezident Kuboku-2022” baş tutdu

Cari ildə federasiya ümummilli lider Heydər Əliyevin anadan olmasının 99-cu ildönümünə həsr edilən “Prezident Kuboku -2022” beynəlxalq reqatasının açılış mərasimi və yarışların ilk günü Suqovuşanda baş tutdu. Azərbaycanla yanaşı, Gürcüstan, Moldova, Özbəkistan və qardaş ölkə Türkiyə komandaları dağların ətəyində yerləşən Suqovuşana təşrif buyurdu. Ümummilli lider Heydər Əliyevin təşəbbüsü əsasında təməli qoyulan Suqovuşan su anbarında 5 ölkədən idmançılar avarçəkmənin kayak və kanoe növlərində mübarizə apardı. Bağlanış mərasimində ulu öndər Heydər Əliyevin həyat və fəaliyyətinə həsr edilən videoçarx su üzərində 3D effektli şou ilə təqdim edildi. Ardınca flaybordların möhtəşəm çıxışı şəhər sakinləri tərəfindən böyük maraqla qarşılandı.

AKAF 50 ildən artıq tarixi olan Mingəçevir Reqatasını yenidən bərpa etdi. Federasiyanın rəsmisinin sözlərinə görə, ilk dəfə Avropa Kanoe Assosiasiyasının təqvim planına daxil edilən Mingəçevir Reqatasında Azərbaycanla yanaşı, daha 12 ölkədən idmançılar iştirak edirdi: “Reqatanın açılış mərasimi oktyabrın 21-də Suqvuşanda start götürdü. Azərbaycan komandası yarışı 26 medalla başa vurdu. Bu nəticə ilə idmançılarımız yalnız Türkiyə komandasından geri qaldı”.

Avarçəkmə yenidən Bakı sularında

Qeyd olunub ki, AKAF-ın əsas prioritetlərindən biri avarçəkməni regionlarda populyarlaşdırmaqdır. Bununla yanaşı, federasiya Xəzər dənizində də avarçəkmə idman növünü yenidən bərpa etdi. Artıq Bakıda avarçəkmə idman növü daha da populyarlaşaraq gənclər və yeniyetmələr üçün əlçatan olacaq.

Xatırladaq ki, Azərbaycanda avarçəkmə idmanı ilə peşəkar olaraq 1930-cu illərin sonundan məhz Xəzər dənizində məşğul olunmağa başlanıb.

Füzuli və Qubadlıda yarış həyəcanı olacaq

“2023-cü ildə keçirilməsi nəzərdə tutulan bəzi yarışların proqramı da məlumdur. Hazırda AKAF ulu öndər Heydər Əliyevin anadan olmasının 100 illiyi münasibətilə “Prezident Kuboku-2023” turnirini keçirməyi planlaşdırır. Ənənəvi olaraq Gənclər Kuboku və Mingəçevir Reqatası təşkil olunacaq. İstəyimiz avarçəkmə üzrə Dünya və Avopa çempionatları kimi böyük yarışları ölkəmizdə təşkil etmək, habelə bayrağımızı Olimpiya oyunlarında dalğalandırmaqdır”,- deyə Vüsal Qurbanov söyləyib.

Tezliklə, Qarabağ suları beynəlxalq yarışlara ev sahibliyi edəcək. Belə ki, Füzulidəki Köndələnçay su anbarı və Həkəri çayının Qubadlıdan keçən hissəsi dağ çaylarında keçirilən yarışların növünə uyğun gəlir. Bundan başqa, peşəkarlar tərəfindən işğaldan azad edilmiş bir neçə bölgədə baxış keçirilicək.

Paylaş:

Baxılıb: 852 dəfə