Daha bir beynəlxalq etimad...

Bakı:

13 °C

76 %

3 m/s

Əlaqə

AZ RU EN

Ana səhifə / İqtisadiyyat / Daha bir beynəlxalq etimad...

Daha bir beynəlxalq etimad...

25.06.2024 [10:35]

Azərbaycana 2024-2025-ci illərdə IOTA-nın prezidenti səlahiyyətləri həvalə olunub

Azərbaycanın Dövlət Vergi Xidməti 2024-2025-ci illərdə Avropadaxili Vergi Administrasiyaları Təşkilatına (IOTA) prezidenti səlahiyyətlərini icra edəcək. Bu məsuliyyətli öhdəlik Macarıstanın paytaxtı Budapeşt şəhərində IOTA-nın 28-ci Baş Assambleyası çərçivəsində ölkəmizə həvalə olunub. İOTA prezidenti, Macarıstan Milli Vergi və Gömrük Administrasiyasının sədri Ferens Vaquhelyi Azərbaycanın vergi administrasiyasını təşkilatın 2 illik rəhbərliyini təsdiqləyib. Sessiyada IOTA İcraiyyə Şurasının üzvləri seçilib. İcraiyyə Şurasında Belçika, Estoniya, Finlandiya, Macarıstan, Rumıniya, İsveçrə və İsveç təmsil olunacaq. Qurumun prezidentliyini həyata keçirən Azərbaycan DVX isə İcraiyyə Şurasına sədrlik edəcək.

Qeyd edək ki, 1996-cı ildə əsası qoyulmuş İOTA-nın 44 üzvü var. Mənzil - qərargahı Macarıstanın paytaxtı Budapeştə yerləşən təşkilatın əsas missiyası Avropa regionunda vergi administrasiyaları arasında əlaqələri koordinasiya üzv ölkələrlə digər beynəlxalq və regional təşkilatlar arasında əməkdaşlığı təşviq etməkdir. Eyni zamanda, vergi inzibatçılığının təkmilləşdirilməsində ölkələrə köməklik göstərən qeyri-kommersiya xarakterli platforma rolunu oynayır. Təşkilat qabaqcıl fikir və təcrübə mübadiləsini həyata keçirən, müxtəlif mövzularda təlim və seminarlar təşkil edən qurum kimi də səmərəli fəaliyyəti ilə seçilir. Eləcə də, İqtisadi Əməkdaşlıq və İnkişaf Təşkilatı (İƏİT) ilə sıx əməkdaşlıq edən İOTA Vergitutma Bazasının Aşınması və Mənfəətin Köçürülməsi (BEPS), beynəlxalq vergitutma sahəsində yeni tendensiyaların, o cümlədən “ikipilləli həll” qaydaları üzrə vergitutma, “qlobal minimum vergi”nin tətbiqi, rəqəmsal iqtisadiyyatın vergiyə cəlb edilməsi, transfer qiymətlərinin tətbiqi ilə bağlı yanaşma və digər məsələlərin təşviqində fəal rol oynayır.

Azərbaycanın vergi administrasiyası ilə İOTA arasında səmərəli əməkdaşlıq neçə illərdir ki, davamlı xarakter daşımaqdadır. Ölkəmiz 2002-ci ildə Avropadaxili Vergi Administrasiyaları Təşkilatına (IOTA) tamhüquqlu üzv kimi qoşulandan bəri bir sıra peşəkar seminarlar və forumlar keçirməklə qarşıya qoyduğu məqsədlərə nail olmaqda fəallıq nümayiş etdirib. Azərbaycan son illərdə rəqəmsallaşmadan irəli gələn müasir vergi islahatları, elektron ticarət, e-audit, vergi risklərinin müəyyən edilməsi, insan resurslarının idarə olunması, digər yeni çağırışlar və potensial vergi imkanları qarşılıqlı şəkildə müzakirə edilib, qabaqcıl ölkələrin yeni vergi innovasiyaları sahəsində təcrübənin mənimsənilməsində bu təşkilatın köməyindən faydalanıb. Həmçinin, İOTA ilə əməkdaşlıq çərçivəsində müasir vergi siyasəti islahatları, vergi əxlaqı, qeyri-rezident e-ticarət iştirakçılarının ƏDV qeydiyyatı, vergi cinayətləri, vergi administrasiyalarının rəqəmsal transformasiyası ilə bağlı gələcək birgə layihələrin həyata keçirilməsi imkanları öyrənilməkdədir.

IOTA-nın prezidenti F.Vaquhelyi Azərbaycanın bu təşkilatın işində fəal iştirakını dəfələrlə yüksək dəyərləndirib və öhdəliyə layiqli riayət edən ölkə adlandırıb.

Bir neçə gün əvvəl IOTA-nın Budapeştdə keçirilən 28-ci Baş Assambleyasında da yuxarıda qeyd edilən mövzular ətrafında geniş fikir mübadiləsi aparılıb, Azərbaycanın bu istiqamətlər üzrə əldə etdiyi nailiyyətlərə toxunulub. Beynəlxalq vergi sistemində müasir trendlər və çağırışlar, vergi inzibatçılığının ortamüddətli dövr üçün prioritet inkişaf istiqamətləri barədə məlumat verən DVX-nin rəisi Orxan Nəzərli vergi sistemlərində qloballaşma və rəqəmsallaşmanın imkanlarından bəhs edib. Bildirib ki, beynəlxalq miqyasda bu transformasiya mükəmməl və müasir vergi sisteminin təşkilini, çağırışlara cavab vermək üçün vergi administrasiyalarının əməkdaşlığının gücləndirilməsini tələb edir. O, IOTA-ya rəhbərliyi dövründə Azərbaycanın üzv ölkələrlə əməkdaşlığın səmərəliliyinin artırılması üçün bütün səylərin səfərbər ediləcəyini vurğulayıb, bütün iştirakçıları ölkəmizdə təşkil olunacaq tədbirlər və planlaşdırılan təşəbbüslərdə fəal iştiraka dəvət edib.

ELBRUS

Paylaş:

Baxılıb: 564 dəfə