Azərbaycan Beynəlxalq Bankı daha bir ilkə imza atdı

Bakı:

19°C

63%

5m/s

Əlaqə

AZ RU EN

Ana səhifə / İqtisadiyyat / Azərbaycan Beynəlxalq Bankı daha bir ilkə imza atdı

Azərbaycan Beynəlxalq Bankı daha bir ilkə imza atdı

07.12.2016 [09:41]

Azərbaycan Beynəlxalq Bankı dekabrın 6-dan etibarən ölkəmizdə ilk dəfə olaraq “Təhlükəsiz kart” proqramının tətbiqinə başlayıb. Sözügedən proqram müştəriləri kart hesablarındakı vəsaitlərin təhlükəsizliyi qayğısından tam azad edir. Bu fikri Azərbaycan Beynəlxalq Bankının Elektron ödənişlər şöbəsinin müdiri Eltəkin Rəhimov ötən gün keçirilən mətbuat konfransında səsləndirib. Onun sözlərinə görə, layihə “VİSA İnternational” şirkəti ilə müştərək şəkildə, şirkətin qlobal “Sıfır məsuliyyət” (Zero liabilitu) siyasəti çərçivəsində həyata keçirilir. Bu proqramdan faydalanan müştəri özünün təsdiqləmədiyi ödəməyə görə heç bir məsuliyyət daşımır. Belə ki, bu proqramdan istifadə etməklə müştəri Bankın təmin etdiyi SMS-xəbərdarlıq, VİSA Verified, eləcə də Mobil Bankçılıq xidmətinə qoşulur. Və hesabı üzrə əməliyyatları mütəmadi olaraq nəzarətdə saxlayır. Hər hansı şübhəli əməliyyat barədə Bankı dərhal məlumatlandırır. Məlumatlar Bank tərəfindən təhlil edilir. Əgər ödəniş əməliyyatını müştərinin özü aparmadığı təsdiqini taparsa, bu zaman Bank müştəriyə dəymiş ziyanı ödəyir. Beləliklə, bu yenilik müştərilərə öz kartları vasitəsilə dünyanın istənilən yerində rahat alış-veriş etmək imkanı yaradır.
Eltəkin Rəhimov daha sonra qeyd edib ki, bu proqram kart sahiblərini hər hansı fırıldaqçılıq əməllərindən də qoruyacaq. Eyni zamanda, onlarda kart hesablarındakı vəsaitlərin təhlükəsizliyi barədə böyük əminlik yaradacaq.
“Hesab edirəm ki, təqdim etdiyimiz bu yenilik müştərilərin böyük marağına səbəb olacaq və Bankın VİSA ödəniş kartlarından istifadə edənlərin sayı daha da artacaqdır. Bu müştərək proqram Azərbaycanda nağdsız ödəniş ənənələrinin daha da genişlənməsinə öz töhfəsini verəcəkdir”, - deyə E.Rəhimov vurğulayıb.
Tədbirdə çıxış edən VİSA-nın Azərbaycan, Moldova və Belarus üzrə regional meneceri İqor Kovalyov bildirib ki, yeni sistemin tətbiqi kart fırıldaqçılığı hallarının kəskin şəkildə azalmasına səbəb olacaq. “Hazırda təhlükəsizlik və kart fırıldaqçılığı hallarının qarşısının alınması bankların ən mühüm vəzifələrindən biridir. Bu isə öz növbəsində daha innovativ və daha təhlükəsiz texnologiyaların tətbiqini zəruri edir. Azərbaycan Beynəlxalq Bankı ilə həyata keçirdiyimiz bu proqramla indi Azərbaycandakı müştərilərimiz öz ödəniş əməliyyatlarını tam əminliklə həyata keçirə biləcəklər”, - deyə İqor Kovalyov vurğulayıb.
Qeyd edək ki, yeni sistemin tətbiqindən sonra müştəri kartla hər hansı ödəmə apardıqdan sonra Bank tərəfindən onun mobil telefonuna SMS göndəriləcək. Bu zaman müştərinin hesabından hər hansı komisyon tutulmayacaq. Müştəri əməliyyatın, həqiqətən də, onun tərəfindən aparılmasını 20 dəqiqə ərzində təsdiqləməlidir. Bunun üçün mobil nömrəsinə göndərilən kodu Banka bildirməlidir. Əks təqdirdə Bank aparılan əməliyyat üçün heç bir məsuliyyət daşımayacaq.
Tədbirdə çıxış edən VİSA qrupun Şərqi Avropa və MDB ölkələri üzrə baş meneceri Mandu Lamp, Mərkəzi Avropa, Yaxın Şərq və Afrika regionu üzrə risklərin idarə edilməsi departamentinin rəhbəri Hector Rodriguez yeni sistemin Azərbaycanda bank sektorunun inkişafına öz müsbət təsirini göstərəcəyinə, digər bankların da tezliklə bu sistemə qoşulacağına əminliyini vurğulayıblar.
Səlim LOĞMANOĞLU

Paylaş:

Baxılıb: 801 dəfə