Əməkhaqları artırıldı

Bakı:

17°C

63%

2m/s

Əlaqə

AZ RU EN

Ana səhifə / İqtisadiyyat / Əməkhaqları artırıldı

Əməkhaqları artırıldı

18.12.2021 [11:13]

Müşfiqə BAYRAMLI

Neçə nəfər sevinəcək?

Azərbaycan sosial dövlətdir. Həyata keçirilən siyasətin mərkəzində Azərbaycan vətəndaşlarının maraqları dayanır. Dövlət başçısının imzaladığı “Dövlət ümumi təhsil müəssisələrində çalışan, bilik və bacarıqlarının diaqnostik qiymətləndirilməsi aparılmış müəllimlərin, o cümlədən həmin müəssisələrin direktor və direktor müavinlərinin, habelə gənclərin çağırışaqədərki hazırlıq rəhbərlərinin əməkhaqlarının artırılması haqqında” Sərəncam bunu bir daha təsdiqləyir. Azərbaycanda təhsil sahəsində çalışanların daha səmərəli fəaliyyət göstərməsini təmin etmək üçün onların sosial müdafiəsinin yaxşılaşdırılması Prezidentin daim diqqət göstərdiyi məsələlərdən biridir.

Prezident təhsil işçilərinin əməkhaqlarını artırıb

Sözügedən Sərəncamla 2022-ci il yanvarın 1-dən Azərbaycan Respublikasının dövlət büdcəsindən maliyyələşən dövlət ümumi təhsil müəssisələrində çalışan, bilik və bacarıqlarının diaqnostik qiymətləndirilməsi aparılmış müəllimlərin, həmin müəssisələrin direktor və direktor müavinlərinin aylıq vəzifə maaşları orta hesabla 20 %, gənclərin çağırışaqədərki hazırlıq rəhbərlərinin aylıq vəzifə maaşları orta hesabla 40 % artırılıb.

Peşə məktəblərində çalışanların maaşları artıb

Eyni zamanda, ölkə başçısının “Dövlət peşə təhsili müəssisələrində çalışan, bilik və bacarıqlarının diaqnostik qiymətləndirilməsi aparılmış müəllimlərin, o cümlədən gənclərin çağırışaqədərki hazırlıq və fiziki tərbiyə rəhbərlərinin, idarəetmə və təlim fəaliyyəti ilə məşğul olan işçilərin əməkhaqlarının artırılması” haqqında Sərəncamı da gəlir imkanlarının artırılmasına hədəflənib.

Sərəncamla 2022-ci il yanvarın 1-dən Azərbaycan Respublikasının dövlət büdcəsindən maliyyələşən dövlət peşə təhsili müəssisələrində çalışan, bilik və bacarıqlarının diaqnostik qiymətləndirilməsi aparılmış müəllimlərin, idarəetmə və təlim fəaliyyəti ilə məşğul olan işçilərin aylıq vəzifə maaşları orta hesabla 20 faiz, fiziki tərbiyə rəhbərlərinin aylıq vəzifə maaşları orta hesabla 30 faiz, gənclərin çağırışaqədərki hazırlıq rəhbərlərinin aylıq vəzifə maaşları orta hesabla 40 faiz artırılıb.

Minimum əməkhaqqı 300 manat oldu

O cümlədən Prezident “Minimum aylıq əməkhaqqının məbləğinin artırılması və “Minimum aylıq əməkhaqqının artırılması haqqında” Azərbaycan Respublikası Prezidentinin 2019-cu il 18 iyun tarixli 1265 nömrəli Sərəncamında dəyişiklik edilməsi barədə” Sərəncam imzalayıb. Prezident İlham Əliyevin təşəbbüsü ilə minimum aylıq əməkhaqqının məbləği 2022-ci il yanvarın 1-dən 300 manat müəyyən edilib.

Nazirlər Kabinetinə tapşırılıb ki, Nazirlər Kabinetinin aktları ilə müəyyən olunmuş dövlət büdcəsindən maliyyələşdirilən sahələrdə çalışan işçilərin aylıq tarif (vəzifə) maaşlarının məbləğlərini bir ay müddətində bu Sərəncamın 1-ci hissəsinə uyğunlaşdırılmasını təmin etsin və bu barədə Azərbaycan Respublikasının Prezidentinə məlumat versin.

Qeyd edək ki, minimum əməkhaqqının 250 manatdan 300 manata çatdırılması, dövlətin sosial siyasətinin daha bir təzahürüdür.

“Yeni Azərbaycan” qəzetinə danışan iqtisadçı-ekspert Elbrus Cəfərli bildirib ki, minimum əməkhaqqının artırılması yüzminlərlə işçinin maaşlarına təsir edəcək. Onun sözlərinə görə, artım növbəti mərhələdə pensiyaların indeksasiyası zamanı pensiya məbləğlərinin də artmasını şərtləndirəcək: “Bu artımlar dolayısı ilə yoxsulluq səviyyəsinin aşağı düşməsinə xidmət edəcək, eyni zamanda əhalinin gəlirlərini və pensiya kapitalının artımını nisbətən inflyasiyaya uyğunlaşdıracaq. Bu siyasət, həmçinin fərdi sahibkarlıq subyektlərinə müəyyən müsbət təsirlər göstərəcək, minimum əməkhaqqının artırılması bir sıra sahələrdə əməkhaqqından vergi tutulmalarına da səbəb olacaq”.

Bir sözlə, dövlət başçısı İlham Əliyevin əhalinin sosial rifahının yüksəldilməsini nəzərdə tutan son sərəncamları ölkəmizdə aparılan sosial-iqtisadi siyasətin qayəsində Azərbaycan vətəndaşının, onun sosial təminatının və rifahının dayandığını özündə növbəti dəfə bariz şəkildə ehtiva edir.

Paylaş:

Baxılıb: 828 dəfə