Sabitliyin və inkişafın açarı...

Bakı:

12°C

100%

2m/s

Əlaqə

AZ RU EN

Ana səhifə / MEDİA / Sabitliyin və inkişafın açarı...

Sabitliyin və inkişafın açarı...

31.10.2025 [10:30]

İctimai və dövlət maraqları uğrunda birliyimiz vacibdir

Dünyada informasiya müharibələri, dezinformasiyalar, sosial şəbəkələrdə saxta xəbərlər və fərdi maraqların ictimai rifahdan üstün tutulması cəmiyyətlər üçün ciddi təhdidə çevrilib. Bu şəraitdə dövlət maraqlarını müdafiə etmək sadəcə siyasi məsələ deyil, həm də milli məsələ hesab olunur. Hər bir yanlış paylaşım, hər bir məsuliyyətsiz fikir ictimai və dövlət maraqlarına zərər vura bilər. Unutmamalıyıq ki, dövlət maraqlarını qorumaq ilk növbədə dövlətçiliyi yaşatmaq deməkdir.

Ortaq məsələ: Cəmiyyətin və dövlətin maraqları

Qeyd edək ki, dövlət maraqları olmadan ictimai maraqlar reallaşa bilməz. Ona görə də bu iki anlayış bir-birini tamamlayır və aralarındakı balansın qorunması həm dövlətin, həm də cəmiyyətin sabitliyini müəyyən edir. İctimai və dövlət maraqlarının müdafiəsi təkcə dövlət orqanlarının işi deyil. Hər bir vətəndaş bu prosesin iştirakçısıdır. Məsələn, qanuna hörmətlə yanaşmaq, ictimai mülkiyyəti qorumaq, informasiya məkanında yalan və təxribat xarakterli xəbərlərə qarşı ayıq olmaq - bunların hər biri dövlət maraqlarının müdafiəsi üçün real töhfədir.

İnformasiya təhlükəsizliyi və milli maraqlar

Mövzuya aid fikirlərini “Yeni Azərbaycan”la bölüşən Milli Məclisin İctimai birliklər və dini qurumlar komitəsinin üzvü Ceyhun Məmmədov bildirib ki, bu gün ictimai və dövlət maraqlarının müdafiəsində informasiya təhlükəsizliyi xüsusi önəm kəsb edir: “Sosial media platformalarında yayılan hər yanlış məlumat, hər manipulyativ xəbər ictimai fikri çaşdıra, dövlətin imicinə xələl gətirə bilər. Ona görə də hər bir vətəndaş informasiya paylaşarkən məsuliyyətli olmalı, məlumatın mənbəyini yoxlamalı və dövlətin informasiya siyasətinə hörmətlə yanaşmalıdır.

Azərbaycan dövləti bu istiqamətdə mühüm addımlar atır. Qanunvericilikdə media etikası, kiber təhlükəsizlik, milli informasiya məkanı kimi məsələlərə ciddi yer ayrılıb. Lakin bu tədbirlərin səmərəsi yalnız vətəndaşların aktiv mövqeyi ilə mümkün olur”.

Dövlət maraqlarının qorunması sabitliyin təminatıdır

C.Məmmədov qeyd edib ki, dövlət maraqlarının müdafiəsi əslində, dövlət müstəqilliyinin müdafiəsidir: “Bu, iqtisadi sabitlikdən tutmuş milli təhlükəsizliyə, xarici siyasətdən daxili ictimai asayişə qədər geniş bir sahəni əhatə edir. Azərbaycan kimi strateji mövqedə yerləşən bir ölkə üçün bu məsələ xüsusilə önəmlidir. Qlobal miqyasda baş verən siyasi və iqtisadi proseslər, regional qarşıdurmalar və informasiya təhdidləri fonunda dövlətin maraqlarını qorumaq həm diplomatik səviyyədə, həm də ictimai şüurda prioritet olmalıdır. Ümumiyyətlə, ictimai və dövlət maraqlarının müdafiəsi yalnız hüquqi məsələ deyil, həm də mənəvi borcdur. Hər bir vətəndaş bu müdafiənin bir parçasıdır. Dövlətin uğuru, cəmiyyətin rifahı və sabitliyi məhz bu birliyə, qarşılıqlı inama və məsuliyyət hissinə bağlıdır”.

İctimai maraq və rəy özünü doğrultmasa...

Deputatın sözlərinə görə, dövlətin mənafeyindən çıxış etmək, şəxsi münasibətləri kənara qoyub, ictimai maraqlara üz tutmaq, hər bir Azərbaycan vətəndaşının borcudur: “Torpağı, vətəni, xalqı sevən hər bir kəs dövlət və ictimai maraqları üstün tutur və öz fəaliyyətini bu istiqamətdə qurur. Sözsüz ki, dövlət və ictimai maraqlar bir-biri ilə üst-üstə düşməlidir. Çünki dövlət maraqlarına məhz ictimaiyyət riayət etməlidir. İctimai maraq və rəy özünü doğrultmasa, bu zaman dövlət maraqlarını təmin etmək mümkün olmayacaq.

44 günlük müharibə və lokal antiterror tədbirləri bir daha göstərdi ki, Azərbaycan dövlətinin maraqları xalqın ictimaiyyətin maraqlarıdır. Çünki bu, eyni mənafedir və dövlət də, ictimaiyyət də eyni məqsəd uğrunda mübarizəyə qoşuldu. Hər ikisi özünün tarixi qələbəsini çaldı. Bu gün ölkədə baş verən inkişaf iqtisadiyyatın yüksəlişi, beynəlxalq aləmdə əldə olunan naliyyətlər, Azərbaycanın ən mötəbər tədbirlərə ev sahibi olması, digər tərəfdən iqtisadi ticarət əlaqələrinin gündən-günə genişlənməsi, məhz dövlət maraqlarının xalq tərəfindən ictimaiyyət tərəfindən müdafiə olunmasının bir nəticəsidir. Çünki Azərbaycan dövləti, demokratik sivil bir dövlətdir. Bu, dövlətin möhkəmləndirilməsi və inkişafı xalqın birliyindən, eyni zamanda dövlətin öz xalqına inamından, etimadından qaynaqlanır”.

Sahib

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “İctimai və dövlət maraqlarının müdafiəsi” istiqaməti üzrə hazırlanmışdır.

Paylaş:

Baxılıb: 125 dəfə