Bizi birləşdirən dəyərlər...

Bakı:

23 °C

71 %

12 m/s

Əlaqə

AZ RU EN

Ana səhifə / MEDİA / Bizi birləşdirən dəyərlər...

Bizi birləşdirən dəyərlər...

21.06.2023 [11:12]

Diaspor quruculuğu dövlət siyasətimizin prioritet istiqamətlərindəndir

Milli birlik və həmrəylik ideyası müasir cəmiyyətlərin inkişaf prosesində ən mühüm məqamlardan biri kimi göstərilməkdədir. Mürəkkəb mərhələlərdən keçərək təkmilləşən və cəmiyyəti vahid məqsədlər uğrunda birləşdirən bu ali dəyər özündə keçmiş ənənələrlə gələcək inkişafın sintezini formalaşdırır. Milli həmrəylik hər bir xalqın prioritet məqsədlər uğrunda vahid gücə çevrilməsidir ki, burada da Vətənə, xalqa və dövlətə sevgi, inam mühüm rol oynayır.

Bütün bu nəzəri fikirlər 2020-ci ilin Vətən müharibəsi dövründə özünün əsl reallıqda ortaya qoymuş oldu. Əminliklə demək olar ki, həmin çətin günlərdə dünya azərbaycanlılarının həmrəyliyi, Qarabağ uğrunda birləşməsi və bir yumruğa çevrilməsi bütün dünya üçün nümunə idi. Bu amil Azərbaycan dövlətçiliyinin möhkəmləndirilməsi və inkişafı, xalqımızın siyasi-iqtisadi və mədəni tərəqqisi baxımından da son dərəcə vacibdir. Bunun nəticəsidir ki, milli həmrəylik, milli birlik post-müharibə dövründə də uğurla davam və inkişaf etdirildi. Bu gün əqidəsindən, dünyagörüşündən asılı olmayaraq hər bir azərbaycanlı yeni yaranan siyasi reallıqda dövlətimizin maraqlarının təmini, dayaqlarının möhkəmləndirilməsi üçün səfərbər olub. Milli həmrəyliyin nümayişi dövlətimizin gücü, qüdrəti və qətiyyəti üçün vacib amillərdəndir...

Mövzu barədə fikirlərini “Yeni Azərbaycan”la bölüşən Milli Məclisin deputatı Məşhur Məmmədov bildirib ki, 44 günlük vətən müharibəsi dövründə diasporumuzun apardığı uğurlu fəaliyyət milli birliyimizin növbəti təntənəsinə çevrildi. Belə ki, xaricdə yaşayan soydaşlarımız milli maraqlar ətrafında sıx birləşərək erməni lobbisinə qarşı mühüm bir mübarizə ortaya qoydu. Həmin dövrdə dünyanın aparıcı dövlətlərində sivil mübarizə metodlarından istifadı etməklə Azərbaycan haqq səsini ucaldan soydaşlarımız erməni yalanlarının qarşısının alınmasında böyük rol oynadı. Müharibədən sonrakı dövrdə də istər maddi, istərsə də mənəvi dəstəyini əsirgəməyən xaricdə yaşayan azərbaycanlılar bir daha milli birliyimizin simvolu kimi çıxış etdilər: “Müharibə dövründə nümayiş etdirilən milli birlik, həmrəylik diasporamızın yeni fəaliyyət dövrü üçün proqram xarakteri daşıdı. Belə ki, Azərbaycan diaspor təşkilatlarının fəaliyyətində artıq bir yeni mərhələ başlayıb. Azərbaycanın dünyaya tanıdılması, zəngin mədəniyyətimizin təbliği işləri daha yüksək vüsət qazanıb. Hesab edirəm ki, bu səylər daha da artırılmalıdır”.

Millət vəkili vurğulayıb ki, ölkəmizdə həyata keçirilən dövlət siyasəti diaspor hərəkatının daha da gücləndirilməsi, xaricdəki Azərbaycan icmaları arasında əlaqələrin möhkəmləndirilməsi istiqamətində addımların intensivləşdirilməsinə yol açıb. “Ölkə başçısı 2018-ci ildə Azərbaycan Respublikasının Diasporla İş üzrə Dövlət Komitəsinin tabeliyində Azərbaycan Diasporuna Dəstək Fondunun yaradılması haqqında Fərman imzalayıb. Fond bu illər ərzində 200-ə yaxın diaspor təşkilatının sənədlərinin həmin ölkələrin qanunvericiliyinə uyğun tərtib edilməsi və qeydiyyatdan keçməsinə dəstək göstərib, 100-dən çox layihəni maliyyələşdirib”, - deyən M.Məmmədov Birinci vitse-prezident Mehriban Əliyevanın təşəbbüsü ilə xaricdə azyaşlı uşaqlar üçün “Qarabağ” adlı Azərbaycan məktəblərinin təsis olunduğunu da diqqətə çatdırıb. Bu gün həmin məktəblərdə yüzlərlə azərbaycanlı uşaq ana dilində təhsil alır: “Həyata keçirilmiş məqsədyönlü tədbirlər xaricdə yaşayan azərbaycanlıların vahid milli amal ətrafında sıx birləşməsini təmin edib. Bu gün diaspor təşkilatlarımız yalnız müəyyən bir dövlətin ərazisində məskunlaşmış eyni milli mənsubiyyətli insanların yaratdıqları ictimai hərəkat və ya birlik kimi nəzərdən keçirilmir - onlar həm də təmsil etdikləri xalqın milli maraqlarının fəal müdafiəçisi kimi tanınırlar. Diaspor təşkilatları fəaliyyət göstərdikləri ölkələrin ictimai-siyasi həyatının vacib komponentinə çevrilir, xarici siyasətə təsir imkanları əldə edir, dövlətlər arasında münasibətlərin inkişafında mühüm rol oynayırlar. Diasporların dövlətlər arasındakı münasibətlərə təsiri onların daxili mahiyyəti, özünəməxsus xarakteri, konkret bir mədəniyyətin daşıyıcısı olması, təmsil etdiyi millətin, xalqın, yaxud etnosun tarixi mənafelərini ifadə etməsi ilə bilavasitə bağlıdır”.

Bəli, dünyamız hər nə qədər qloballaşsa da, dövlətlər, xalqlar arasındakı fərqlər ortadan götürülsə də, insanlar yenə də hansısa toplumun təmsilçiləri kimi dünyaya gəlir, özlərini hansısa tarixi məkanlara mənəvi cəhətdən bağlı sanırlar. İnsanın bu duyğusunu dünyanın xoşbəxtliyi,

xalqların milli-mənəvi dəyərlərinin, mədəni irsinin qorunması naminə nəcib məqsədlərə doğru yönəltmək bəşəriyyətin ali missiyasıdır. Azərbaycanın diaspor quruculuğu istiqamətində həyata keçirdiyi fəaliyyət də bu missiyaya xidmət edir...

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Diaspor quruculuğu, lobbiçilik və dünya azərbaycanlılarının həmrəyliyi” istiqaməti üzrə hazırlanmışdır

Paylaş:

Baxılıb: 840 dəfə