Abdullah bin Fəhd əl-Hüseyn: Nizami Gəncəvi adına Milli Azərbaycan Ədəbiyyatı Muzeyi həqiqətən qiymətli eksponatların qorunduğu nadir mədəniyyət ocağıdır

Bakı:

31 °C

45 %

7 m/s

AZ RU EN

Ana səhifə / Mədəniyyət / Abdullah bin Fəhd əl-Hüseyn: Nizami Gəncəvi adına Milli Azərbaycan Ədəbiyyatı Muzeyi həqiqətən qiymətli eksponatların qorunduğu nadir mədəniyyət ocağıdır

Abdullah bin Fəhd əl-Hüseyn: Nizami Gəncəvi adına Milli Azərbaycan Ədəbiyyatı Muzeyi həqiqətən qiymətli eksponatların qorunduğu nadir mədəniyyət ocağıdır

30.05.2014 [09:04]

Nizami Gəncəvi adına Milli Azərbaycan Ədəbiyyatı Muzeyi həqiqətən qiymətli eksponatların qorunduğu nadir mədəniyyət ocağıdır.
Bu sözləri mayın 29-da Azərbaycan Milli Elmlər Akademiyasının (AMEA) Nizami Gəncəvi adına Azərbaycan Ədəbiyyatı Muzeyi ilə tanış olan Dünya Xəbər Agentlikləri Konqresinin sədri, Səudiyyə Ərəbistanı Krallığı Səudiyyə Press Agentliyinin (SPA) prezidenti Abdullah bin Fəhd əl-Hüseyn deyib.
Qonağa məlumat verilib ki, Prezident İlham Əliyevin Sərəncamına əsasən yenidən qurulan muzeyin binası 1850-ci ildə tikilib. Karvansara kimi istifadə olunan binaya 1915-ci ildə ikinci mərtəbə artırılaraq ondan mehmanxana kimi istifadə olunub. 1918-1920-ci illərdə burada Azərbaycan Xalq Cümhuriyyətinin Nazirlər Kabineti, 1920-1930-cu illərdə Azərbaycan Həmkarlar İttifaqları Konfederasiyası yerləşib. 1939-cu ilin noyabrında Azərbaycanın dahi şairi Nizami Gəncəvinin 800 illik yubileyi münasibətilə respublika Nazirlər Kabinetinin qərarı ilə Nizami Muzeyi yaradılıb. Muzeyin bu binada yerləşdirilməsi məqsədi ilə memarlar Sadıq Dadaşov və Mikayıl Hüseynovun layihəsinə əsasən burada yenidənqurma işləri aparılıb, fasadda heykəllər qoyulub, daha iki mərtəbə əlavə edilib.
Bildirilib ki, yenidənqurmadan əvvəl muzeyin 120 mindən artıq eksponatından ekspozisiyada yalnız mini göstərilirdisə, yeni ekspozisiyada 25 mindən çox eksponat var. Bütün ekspozisiya salonları kompyuterləşdirilib, tamaşaçıların müstəqil işləmələri üçün monitorlar quraşdırılıb, Azərbaycan, ingilis və rus dillərində informasiya bazası yaradılıb, audio-videomaterialları seyr etmək üçün 14 monitor və dinləmə qurğuları olan xüsusi böyük salon təşkil edilib. Muzeyin fondları zəruri texnika və avadanlıqla təmin olunub.
Abdullah bin Fəhd əl-Hüseyn Yaxın və Orta Şərqdə, eləcə də Avropada yeganə ədəbiyyat muzeyi olan bu mədəniyyət ocağının böyük konfrans salonunu, “Qədim dövr”, “Dədə Qorqud”, “Nizami Gəncəvi”, “Məhsəti Gəncəvi”, “Xaqani Şirvani”, “İmadəddin Nəsimi”, “Məhəmməd Füzuli”, “Şah İsmayıl Xətai” salonlarını gəzib. Muzeyin ekspozisiyası qədim zamanlardan müasir dövrədək Azərbaycan ədəbiyyatının keçdiyi tarixi yol haqqında məlumat verir. Burada Azərbaycan ədəbiyyatının görkəmli xadimlərinin nadir əlyazmaları, məşhur xəttatların yazı nümunələri, klassiklərin əsərlərinə çəkilən miniatürlər, illüstrasiyalar, müxtəlif kitablar, qəzet və jurnallar, müasir Azərbaycan yazıçılarının əsərləri, təsviri sənət nümunələri və sənədli fotoşəkillər, xalq yaradıcılığı nümunələri, Azərbaycan ərazisindən tapılan və müxtəlif dövrlərə aid sikkələrin kolleksiyası, bədii xalçalar, saxsı və bürünc qablar, digər maddi mədəniyyət abidələri qorunur.
Qonaq üçüncü mərtəbədə nümayiş olunan maraqlı eksponatlar arasında Pənah xana məxsus, üzərində “Qurani-Kərim” ayələri yazılmış “gülləbatmaz” köynək, Mirzə Fətəli Axundzadənin, Həsən bəy Zərdabinin, Cəfər Cabbarlının, Məmməd Səid Ordubadinin, Abdulla Şaiqin, Mir Cəlal Paşayevin, Nigar Rəfibəylinin və başqalarının şəxsi əşyaları, şəkilləri, habelə ötən əsrin 30-cu illərində repressiya qurbanı olmuş şair və yazıçıların sənədlərinin surətləri ilə tanış olub.
Muzeydən xoş təəssüratla ayrılan Dünya Xəbər Agentlikləri Konqresinin sədri, SPA-nın prezidenti Abdullah bin Fəhd əl-Hüseyn xatirə kitabına ürək sözlərini yazıb.

Paylaş:

Baxılıb: 1385 dəfə