Dünya iqtisadi böhranı Azərbaycanda sosial layihələrin həyata keçirilməsinə mənfi təsir göstərməyəcək

AZ RU EN

Ana səhifə / Müsahibə / Dünya iqtisadi böhranı Azərbaycanda sosial layihələrin həyata keçirilməsinə mənfi təsir göstərməyəcək

Dünya iqtisadi böhranı Azərbaycanda sosial layihələrin həyata keçirilməsinə mənfi təsir göstərməyəcək

09.04.2009 [15:53]

Milli Məclisin Sosial siyasət komitəsinin sədri Hadı Rəcəbli www.yar.org.az saytına müsahibə verib:
- Hadı müəllim, Konstitusiyaya edilmiş əlavə və dəyişikliklərin böyük əksəriyyəti vətəndaşların sosial vəziyyətinin yaxşılaşdırılması, sosial yönümlü iqtisadiyyatın gücləndirilməsi və s. məsələləri özündə ehtiva edir. Təbii ki, bütün bu məsələlər ciddi maliyyə yatırımı də istəyir. Nəzərə alsaq ki, hazırda dünyada qlobal maliyyə böhranı yaşanır, onda maraqlıdır, Azərbaycanda bundan sonra sosial layihələr necə həyata keçiriləcək, Konstitusiyada edilən dəyişikliklərin tələblərinə çatmaq üçün hansı işlər görülməlidir?
- Azərbaycanın bugünkü durumu Konstitusiyanın sosial müddəalarının tələblərinə cavab verir. Bu gün Azərbaycanda insanların layiqli həyat səviyyəsinin təmin olunması üçün görülən işlər həmin dəyişikliyin reallaşmasına təkan verir. Bu gün Azərbaycanda dövlət infrastrukturla məşğuldur. Dövlət bu gün məktəb tikir, yol çəkir. Abadlıq nədir? Məktəb olsun, yol olsun, yaşayış olsun, təmizlik olsun. Əgər, Azərbaycanda bütün dövlət quruculuğu məsələlərinə fikir versək, bütün sahələr üzrə sistemli iş aparlır. Artıq həmin o məsələlərin inkişafı insanların layiqli həyat səviyyəsinin yaradılmasına gətirib çıxarır. Həm 15-ci maddədə olan sosial yönümlü iqtisadiyyat, həm də bu məsələdə biz bir şeyi daim yadda saxlamalıyıq. Prezidentimiz bu məsələyə daim diqqət yetirir. İnsanların layiqli həyat səviyyəsinin yaxşılaşması üçün vacib şərtlərdən biri orta sahibkarlığın inkişafıdır.
İş yerlərinin yaradılmasından söhbət gedirsə, orta sahibkarlıq, insanların güzəranının yaxşılaşmasından söhbət gedirsə, kiçik sahibkarlıq vacib şərtlərdir. Bu sistem möhkəmlənməlidir. Mən hesab edirəm ki, orta bizneslə kiçik biznesə yardımçı olmalıyıq. Biz istəyirik ki, bu yöndə vəziyyət daha da yaxşılaşsın, biz istəyirik ki, kasıblığın səviyyəsi azalsın, istəyirik ki, orta sahibkarlıq artsın. Azərbaycanda sahibkarlığın inkişafına böyük kreditlər ayrılır. Qanunvericilik bazası, Prezident fərmanları, sərəncamları şərait yaradır ki, sahibkarlıq inkişaf etsin, ayaq üstündə dursun.
- Bu ilki büdcəyə yenidən baxılacağı və maliyyə böhranı ilə əlaqədar bəzi sosial layihələrin təxirə salınacağı barədə yayılan xəbərlər haqda nə deyə bilərsiniz?
- Bu söhbətlərin heç bir hüquqi əsası yoxdur. çünki büdcənin bütün maddələri təsdiqlənib. Əgər biz büdcəyə yenidən baxsaq, müddəaları dəyişsək, onda bu söhbəti etmək olar. Bütün maliyyə məsələlərinin hamısı yerindədir. Sosial layihələrin azalmasından söhbət gedə bilməz. Əgər belə bir şey olsa, sosial məsələlər öz yerində qalacaq. Mən bu ilki büdcəmizin siyasi adını yada salmaq istəyirəm- Böhrana davamlı, təmkinli və sosial yönümlü. Əvvəlki ildə isə belə idi- Sıçrayışlı inkişaf, investisiya tutumlu, sosialyönümlü büdcə.
- Deməli, sosialyönümlü layihələrin icrasında heç bir problem olmayacaq? Bu fakt bir daha dövlətimizin uğurlu sosial siyasətinin əyani göstəricisidir...
- Sosial müdafiə dövlətin baş strategiyasıdır. Hökumətimizin maliyyə imkanları buna imkan verir ki, sosial müdafiəni gücləndirək. Bu günkü vəziyyətimiz heç də sosial müdafiənin zəiflətməsinə gətirib çıxardan addımlar atmağa bizi sövq eləmir. Bu baxımdan, bu gün Azərbaycanda sosial müdafiənin daha da gücləndirilməsi üçün addımlar atılır. Pensiyanın baza hissəsi ildə bir dəfə artırılır. Yenə də bu ilin sonu pensiyanın baza hissəsi artacaq. Bu yaxınlarda Əmək Məcəlləsinə 44 dəyişiklik edildi. Hamısı da insanların sosial müdafiəsinə yönəldilmişdi. Belə addımları biz bundan sonra da atacağıq.

Paylaş:

Baxılıb: 1208 dəfə